ថ្នាក់ដឹកនាំខេត្តកំពង់ឆ្នាំង អញ្ជើញចូលរួមជាអធិបតីក្នុងកិច្ចប្រជុំបូកសរុបលទ្ធផលការងារប្រចាំត្រីមាសទី២ ឆ្នាំ២០២២ និងពិគ្រោះយោបល់លើការអនុវត្តគម្រោងគាំពារសង្គមដើម្បីបញ្ចប់ភាពក្រីក្រ

កំពង់ឆ្នាំង ÷ ព្រឹកថ្ងៃទី១៨ ខែសីហា ឆ្នាំ២០២២ រដ្ឋបាលខេត្តកំពង់ឆ្នាំង ដោយមានកិច្ចសហការពីអង្គការទស្សន:ពិភពលោក បើកកិច្ចប្រជុំបូកសរុបលទ្ធផលការងារប្រចាំត្រីមាសទី២ ឆ្នាំ២០២២ និងពិគ្រោះយោបល់លើការអនុវត្តគម្រោងគាំពារសង្គមដើម្បីបញ្ចប់ភាពក្រីក្រ ក្រោមអធិបតីភាពលោក អម សុភា អភិបាលរងខេត្ត និងជាប្រធានក្រុមការងារកិច្ចគាំពារសង្គមដើម្បីបញ្ចប់ភាពក្រីក្រ និងមានការចូលរួមពី នាយករងរដ្ឋបាលសាលាខេត្ត និងមន្ទីរស្ថាប័នពាក់ព័ន្ធ តំណាងអង្គការទស្សនៈពិភព ព្រមទាំងលោក លោកស្រីមកពីមូលដ្ឋានស្រុក ឃុំគោលដៅសរុប១០២នាក់ ។

មានប្រសាសន៍បើកក្នុងឱកាសនោះ លោក អម សុភា បានមានប្រសាសន៍ថាគម្រោងកិច្ចគាំពារសង្គមដើម្បីបញ្ចប់ភាពក្រីក្រគឺជាគម្រោងសាកល្បងមួយដែលផ្តោតលើការលើកស្ទួយជីវភាពគ្រួសារក្រីក្រ១៥៧២គ្រួសារនៅស្រុកទឹកផុសខេត្តកំពង់ឆ្នាំងនិងស្រុករវៀង ខេត្តព្រះវិហារ ដោយឡែកស្រុកទឹកផុសមាន៧៦០គ្រួសារ ដែលកំពុងទទួលផលពីគម្រោងដោយផ្ទាល់ក្នុងនោះចំនួន៣៩៩គ្រួសារស្ថិតក្នុងទ្រព្យសកម្មនិង៣៦១គ្រួសារស្ថិតក្នងក្រុមទទូលបានការឧបត្ថម្ភសាច់ប្រាក់ប្រចាំខែនិងដើមទុន ។

លោកអភិបាលរងខេត្ត គូសបញ្ជាក់បន្ថែមថា អង្គការក្រៅរដ្ឋាភិបាលគឺជាដៃគូដ៏សំខាន់មិនអាចខ្វះបានជាមួយរដ្ឋបាលថ្នាក់ក្រោមជាតិជួយគាំទ្រ ថ្មីៗនេះរាជរដ្ធាភិបាលបានដាក់ចេញនូវច្បាប់សហគមន៍និងអង្កការមិនមែនរដ្ធាភិបាលដើម្បីបង្កើនបរិយាកាសនៃភាពជាដៃគូរប្រកបដោយ សុដុមណីយកម្ម ជាក់ស្តែងយុទ្ធសាស្ត្រចតុកោណរបស់រាជរដ្ឋាភិបាលអាណត្តិទី៦បន្តជំរុញភាពជាដៃគូរប្រកបដោយ បរិយាបន្ន ដើម្បីកៀរគធនធានហិរញ្ញប្បទានពីគ្រប់ប្រភពយកមកបំរើអោយការខិតខំប្រឹងប្រែងលើគោលដៅអភិវឌ្ឍន៍ ។

ឯកឧត្តមមានប្រសាសន៍បន្តថា ដូច្នេះដើម្បីរក្សាបាននូវនិរន្តរភាពនិងធានាបានសម្រេចគោលដៅគម្រោងជាប្រយោជន៍ក្នុងការជួយដល់ប្រជាពលរដ្ឋក្រីក្រអាស្រ័យលើការសហការការធ្វើផែនការរួមគ្នានឹងចូលរួមអនុវត្តដើម្បីលើកទឹកចិត្តជម្រុញគាំទ្រនិងការប្រឹក្សាជាប្រចាំដល់កសិករក្រោមបរិកាសយោគយល់ អធ្យាស្រ័យនិងការអោយតម្លៃគ្នាទៅវិញទៅមក ធ្វើយ៉ាងណាអោយប្រជាពលរដ្ឋមានជីវភាពធូរធាឡើង ។