នៅក្នុងពិធីសំណេះសំណាល និងសួរសុខទុក្ខសិស្សនាយនគរបាល និងសិស្សនាយ នគរបាលរងវគ្គបណ្ដុះបណ្ដាលកម្រិតបឋមវិជ្ជាជីវៈនគរបាលជំនាន់ទី១៥ លើកទី២ នៅ សាលានគរបាលជាតិភូមិភាគ៤ ខេត្តសៀមរាប នៅព្រឹកថ្ងៃទី១៦ ខែសីហា ឆ្នាំ២០២២នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ ថា ទោះបីជាសមត្ថកិច្ចធ្វើការបង្ក្រាប ខ្លាំងយ៉ាងណាក៏ដោយ ការរឹមអូសសារធាតុផ្សំគ្រឿង ញៀនរាប់រយតោន ប៉ុន្តែបទល្មើសនេះ នៅតែមាន និងបានរីកសាយដល់តំបន់ជនបទ ផងដែរ។
សម្តេចបានជំរុញឱ្យគណៈបញ្ជាការឯកភាពខេត្ត ស្រុក មន្រ្តីនគរបាលពាក់ព័ន្ធទាំង អស់ រួមជាមួយប្រជាពលរដ្ឋ សូមមេត្តារួមគ្នាទប់ស្កាត់ និងបង្ក្រាបគ្រឿងញៀន។ ជាពិសេស សមត្ថកិច្ចទាំងអស់ កុំពាក់ព័ន្ធ កុំប្រើប្រាស់គ្រឿងញៀន កុំចែកចាយគ្រឿងញៀន កុំអន្ត រាគមន៍ កុំធ្វើខ្នងបង្អែក កុំឃុបឃិត កុំរារាំងការអនុវត្តច្បាប់ និងកុំលើកលែង។ ដើម្បីឱ្យ ការបង្ក្រាបគ្រឿងញៀនឱ្យកាន់តែមានប្រសិទ្ធភាព និងសង្គមកម្ពុជាមានស្ថិរភាព។
សម្ដេចក្រឡាហោម ក៏បានមានប្រសាសន៍អំពីសារៈសំខាន់ នៃការអនុវត្តគោល នយោបាយភូមិ ឃុំសង្កាត់មានសុវត្ថិភាព ការអនុវត្តសាកល្បងការអនុវត្តទោសក្រៅពន្ធនាគារ និងការធ្វើកំណែទម្រង់ប៉ុស្តិ៍នគរបាលរដ្ឋបាល ពិសេសការរំលែកក្របខ័ណ្ឌមន្រ្តីមកឱ្យ អធិការដ្ឋាន និងប៉ុស្តិ៍រដ្ឋបាលឃុំ សង្កាត់។ សម្ដេចក៏បានស្នើរដ្ឋបាលខេត្ត ក្រុង ស្រុក និងឃុំ សង្កាត់ បន្តផ្ដល់ការគាំទ្រដល់កម្លាំងប្រជាការពារដែលជាកម្លាំងរួម ចំណែកពង្រឹងការងារ សន្តិសុខនៅតាមមូលដ្ឋានជាមួយនឹងប៉ុស្តិ៍រដ្ឋបាល។
បើតាមរបាយការណ៍របស់លោកឧត្តមសេនីយ៍ទោ សាយ រិទ្ធីសក្ដិ នាយកសាលា នគរបាលជាតិភូមិភាគ៤ ដោយមានការគាំទ្រ និងឧបត្ថម្ភពីសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងមនុញ្ញផលនៃសុខសន្តិភាព បច្ចុប្បន្នសាលា នគរបាលជាតិភូមិភាគ៤ មានអគាររដ្ឋបាលកម្ពស់១ជាន់ចំនួន១ខ្នង អគារសិក្សាកម្ពស់១ ជាន់ចំនួន១ខ្នង អគារស្នាក់នៅកម្ពស់១ជាន់ចំនួន៣ខ្នង អគារអាហារដ្ឋានកម្ពស់១ ជាន់ចំនួន១ខ្នង និងរបងព័ទ្ធជុំវិញហើយ។
លោកបន្តថា ដើម្បីបំពេញបន្ថែមតម្រូវការបណ្ដុះបណ្ដាល សម្ដេចក្រឡាហោម ស ខេង បានផ្ដួចផ្ដើមគំនិតឱ្យមានការចូលរួមអភិវឌ្ឍន៍ហេដ្ឋារចនាសម្ព័ន្ធបន្ថែមពី ឯកឧត្តម អភិបាលខេត្ត និងសប្បុរសជន ហើយជាលទ្ធផលអភិបាលខេត្តសៀមរាបបានជួយស្ថាបនាផ្លូវ បេតុងប្រវែង១៩០០ម៉ែត្រ និងប្រព័ន្ធលូបង្ហូរទឹកប្រវែង៥០០ម៉ែត្រ ខណៈឯកឧត្តមរដ្ឋមន្រ្តី ក្រសួងបរិស្ថានបានជួយសាងសង់ឡដុតសំរាមខ្នាតមធ្យម៕
