កំពង់ស្ពឺ៖បុរសខាងលើត្រូវបានចាប់ខ្លួននៅថ្ងៃទី៣១ ខែកក្កដា ឆ្នាំ២០២២ ក្នុងភូមិត្រពាំងទន្ទឹម ឃុំពោធិ៍ចំរើន ស្រុកបរសេដ្ឋ ខេត្តកំពង់ស្ពឺ.
បើតាមប្រសាសន៍របស់លោកស្រី ព្រំ សុខា មេឃុំពោធិ៍ចម្រើន បានប្រាប់តាមទូរសព្ទ័នៅថ្ងៃទី៣១ខែកក្កដា ឆ្នាំ២០២២នេះថា «បុរសដែលសមត្ថកិច្ចបានចាប់ខ្លួនមានឈ្មោះ សៀក ទ្រី អាយុ ៤២ឆ្នាំ រស់នៅភូមិត្រពាំងទន្ទឹម ឃុំពោធិ៍ចំរើន ស្រុកបរសេដ្ឋ ខេត្តកំពង់ស្ពឺ។ បុរសរូបនេះបានប្រើប្រាស់សារធាតុញៀនលើសកម្រិត បណ្តាលឱ្យសតិមានភាពមិនប្រក្រតី ហើយតែងប្រើហឹង្សាញឹកញ៉ាប់ទៅលើប្រពន្ធ ហើយសមត្ថកិច្ចក៏បានឃាត់ខ្លួនច្រើនដងដើម្បីយកមកអប់រំ»។
លោកស្រីមេឃុំ បានបន្ថែមថា« ច្រើនលើកច្រើនសារហើយដែលសមត្ថកិច្ចឃាត់ខ្លួនបុរសជាប្តីយកមកកាន់អធិការស្រុក គឺប្រពន្ធតែងតែមកយំស្រែកអង្វរ នៅចំពោះមុខសមត្ថកិច្ចឱ្យមានការដោះលែងបុរសជាប្តីនោះត្រឡប់ទៅវិញ។ ដោយមើលឃើញពីជីវភាពមានការខ្វះខាតក្នុងគ្រួសារ ដែលមិនអាចអត់បុរសជាប្តីជំហរ សមត្ថកិច្ចក៏សម្រេចដោះលែងឱ្យត្រឡប់ទៅវិញដោយគ្រាន់តែឱ្យធ្វើកិច្ចសន្យាបញ្ឈប់ការប្រើហឹង្សាបន្តទៀត»។
មេឃុំពោធិ៍ចម្រើនលោកស្រី ព្រំ សុខា បានបញ្ជាក់ទៀតថា«ករណីហឹង្សាទៅលើក្រុមគ្រួសារពិសេសលើប្រពន្ធ បានក្លាយទៅជាប្រវត្តិសាស្ត្រជ្រាំ ដែលសម្រាប់គ្រួសារមួយនេះ ហើយនៅថ្ងៃទី២៥ ខែកក្កដា ឆ្នាំ២០២២ ពេលដែលបុរសប្តីបានផឹកស្រាក៏កើតហឹង្សាជាថ្មីម្តងទៀត ដោយប្តីបានយកកាំបិតកាប់ទៅលើប្រពន្ធមួយកាំបិតបណ្តាលឱ្យរងរបួសដៃ គ្រានោះប្រពន្ធក៏បានរត់គេចចេញពីផ្ទះដោយទុកកូនស្រីតូចអាយុ ទើបតែមួយខែជាងចោលនៅផ្ទះ។ក្រោយប្រពន្ធគេចខ្លួនបាត់ អ្នកភូមិក្បែរផ្ទះបានឃើញបុរសជាប្តីច្របាច់កនិងសង្កត់ទ្រូងកូនស្រីតូចដែលម្តាយទុកចោលនោះ ហើយនៅព្រលប់ថ្ងៃទី៣០ខែកក្កដាឆ្នាំ២០២២កូនស្រីនោះក៏បានស្លាប់បាត់បង់ជីវិតបាត់ទៅ»។
ក្រោយការស្លាប់របស់ទារិកានោះក៏មានកាភ្ញាក់ផ្អើលដល់សមត្ថកិច្ចនិងអាជ្ញាធរមូលដ្ឋានបានចុះមកពិនិត្យនិងសួរនាំទើបដឹងថាការស្លាប់របស់ទារិកាកំសត់ ផ្តើមចេញពីការធ្វើទារុណ្ឌកម្មធ្ងន់ធ្ងរនិងទារិកាមានជំងឺផ្លូវដង្ហើមស្រាប់ផងក៏បណ្តាលឱ្យស្លាប់តែម្តងទៅ។
បច្ចប្បន្នបុរសជាឪពុកតិរិច្ឆាន ត្រូវបានឃាត់ខ្លួននៅអធិការដ្ឋានស្រុកបរសេដ្ឋដើម្បីកសាងសំណុំរឿងបញ្ជូនទៅសាលាដំបូងខេត្ត៕
