ខេត្តកណ្តាល៖ កាលពីព្រឹកថ្ងៃទី២០ ខែកក្កដា ឆ្នាំ២០២២នេះ ឯកឧត្តម តាំង ម៉េងលាន អភិបាលរងខេត្តកណ្តាល ឯកឧត្តម ពេជ្រ វាសនា អនុរដ្ឋលេខាធិការក្រសួងធនធានទឹក និងឧតុនិយម និង ឯកឧត្តម Miyasaki Masao តំណាងរាស្រ្តជប៉ុន និងជាអនុរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទជប៉ុន ព្រមទាំងមន្ទី អង្គភាពពាក់ព័ន្ធ អាជ្ញាធរស្រុក និងមន្ត្រីជំនាញ បានចុះពិនិត្យគម្រោងស្ដារស្ទឹងតូច និងទ្វារទឹក ៧ មករា និងបន្តទៅចុះពិនិត្យទីលានចាក់សំរាម នៃគម្រោងកែលំអរការគ្រប់គ្រងសំរាម នៅភូមិសាស្ត្រស្រុកកណ្ដាលស្ទឹងចំនួន ៥ទីតាំង។
ក្នុងការចុះពិនិត្យនេះ ឯកឧត្តម Miyasaki Masao បានមានប្រសាសន៍ថា ជប៉ុន នឹងពង្រឹងចំណងមិត្តភាព កិច្ចសហប្រតិបត្តិការ និងខិតខំ ប្រឹងប្រែងជួយមិត្តកម្ពុជា ក្នុងវិស័យកសិកម្ម រួមទាំងការកសាងហេដ្ឋារចនាសម្ព័ន្ធ ប្រព័ន្ធធារាស្ត្រ ដើម្បីជួយលើកកម្ពស់កម្រិតជីវភាពប្រជាពលរដ្ឋកម្ពុជា ។
ឯកឧត្តមបន្តថា គម្រោងស្ដារស្ទឹងតូច និងទ្វារទឹក ៧មករា គឺមានគោលបំណងដើម្បីបម្រើឱ្យវិស័យកសិកម្ម និងការពារពីទឹកជំនន់ ហើយគម្រោងនេះនឹងចាប់ផ្ដើមនៅពេលឆាប់ៗខាងមុខ ដែលសិក្សាគម្រោងដោយអង្គការ JICA ។
នាឱ្យកាសនោះដែរ ឯកឧត្តម តាំង ម៉េងលាន បានថ្លែងអំណរគុណ ចំពោះរដ្ឋាភិបាល និងប្រជាជនជប៉ុន តាមរយៈទីភ្នាក់ងារអភិវឌ្ឍន៍របស់ជប៉ុន (JICA) ដែលបានសិក្សាយ៉ាងច្បាស់លាស់លើការការពារទឹកជំនន់ និងការកែលម្អប្រព័ន្ធប្រឡាយលូននៅក្នុងភូមិសាស្ត្រខេត្តកណ្តាល។
សូមបញ្ជាក់ថា សម្រាប់គម្រោងសាងសងទីលានចាក់សំរាមវិញ គឺក្រុមការងារ ធនាគារពិភពលោក កំពុងតែធ្វើការសិក្សា ស្វែងរកទីតាំងដែលមានលក្ខណ:ល្អប្រសើរជាងគេ១ក្នុងចំណោម៥ទីតាំង តាមលក្ខណ:វិនិច្ឆ័យ លក្ខណៈច្បាប់ និងតាមបច្ចេកទេស ដោយអនុលោមតាមគោលការណ៍របស់រាជរដ្ឋាភិបាល និងធនាគារពិភពលោកផងដែរ។
