ភ្នំពេញថ្ងៃទី១៤ ខែកក្កដា ឆ្នាំ២០២២ –
ក្រសួងពាណិជ្ជកម្មថៃបានអំពាវនាវឱ្យបន្តកិច្ចសហប្រតិបត្តិការពីបណ្តាក្រុមហ៊ុនផលិតកម្មដើម្បីរក្សាតម្លៃផលិតផលឱ្យបានយូរតាមដែលអាចធ្វើទៅបាន ដើម្បីទប់ស្កាត់ផលប៉ះពាល់អវិជ្ជមានដល់អ្នកប្រើប្រាស់។
ការអនុវត្តនេះបានកើតឡើងបន្ទាប់ពីបណ្តាក្រុមហ៊ុនផលិតកម្មបានស្នើឱ្យដំឡើងតម្លៃផលិតផលរបស់ពួកគេដើម្បីទប់ទល់នឹងតម្លៃផលិតកម្ម និងវត្ថុធាតុដើមដែលឡើងកាន់តែខ្ពស់។
លោក Wattanasak Sur-iam អគ្គនាយកនៃនាយកដ្ឋានពាណិជ្ជកម្មផ្ទៃក្នុងនៃក្រសួងពាណិជ្ជកម្មថៃ បានប្រាប់ប្រព័ន្ធផ្សព្វផ្សាយក្នុងស្រុកថា នាយកដ្ឋាននេះបានពិភាក្សាជាមួយបណ្តាក្រុមហ៊ុនផលិតកម្មជារៀងរាល់ថ្ងៃ ហើយសូមអរគុណដល់ពួកគេសម្រាប់កិច្ចសហប្រតិបត្តិការដើម្បីរក្សាតម្លៃផលិតផល។
រដ្ឋមន្ត្រីក្រសួងពាណិជ្ជកម្មថៃ លោក Jurin Laksanawisit បានចាត់ឱ្យនាយកដ្ឋានខាងលើបញ្ចុះបញ្ចូលដល់បណ្តាក្រុមហ៊ុនផលិតកម្មឱ្យជួយរក្សាតម្លៃដើម្បីការពារផលប៉ះពាល់ដល់អ្នកប្រើប្រាស់ និងធានាឱ្យមានការផ្គត់ផ្គង់ទំនិញឱ្យបានគ្រប់គ្រាន់។ លោកបាននិយាយបន្ថែមថា គោលដៅ គឺថាក្រុមហ៊ុនផលិតកម្មនឹងនៅតែអាចរកប្រាក់ចំណេញបាន។
នាយកដ្ឋានខាងលើក៏បានសន្យាផងដែរថា នឹងជួយដល់បណ្តាក្រុមហ៊ុនផលិតកម្មក្នុងការនាំចូលវត្ថុធាតុដើមពីអ្នកផ្គត់ផ្គង់ក្នុងតម្លៃសមរម្យ ខណៈដែលតម្លៃនោះមានការកើនឡើងជាបន្តបន្ទាប់ដោយសារតែជម្លោះរវាងរុស្ស៊ី-អ៊ុយក្រែនដែលកំពុងបន្ត និងភាពទន់ខ្សោយនៃរូបិយប័ណ្ណក្នុងស្រុក។
យោងតាមលោក Wattanasak បានឱ្យដឹងថា ក្រសួងពាណិជ្ជកម្មមានការព្រួយបារម្ភអំពីកង្វះខាតទំនិញប្រើប្រាស់ និងម្ហូបអាហារ ប្រសិនបើបណ្តាក្រុមហ៊ុនផលិតកម្មសម្រេចចិត្តកាត់បន្ថយសមត្ថភាពផលិត ឬបញ្ឈប់ការផលិតដោយសារតែការខាតបង់។
លោកបានទទួលស្គាល់ថា នៅទីបំផុត ក្រសួងត្រូវអនុញ្ញាតឱ្យក្រុមហ៊ុនផលិតកម្មដំឡើងតម្លៃលក់រាយ ប៉ុន្តែលោកបានថ្លែងថា ពេលវេលានៃការដំឡើងថ្លៃគួរតែត្រូវបានគណនាដោយប្រុងប្រយ័ត្នដើម្បីមានផលប៉ះពាល់តិចបំផុតដល់អ្នកប្រើប្រាស់។ ក្រសួងក៏បានសន្យាតាមដានឱ្យបានដិតដល់ចំពោះតម្លៃទំនិញទាំងនោះផងដែរ។
ទន្ទឹមនឹងនេះដែរ លោក Siriporn Dechsingha ប្រធានផ្នែកទំនាក់ទំនងសាជីវកម្មនៃក្រុមហ៊ុន Siam Makro Plc ដែលជាប្រតិបត្តិករសាច់ប្រាក់ និងការដឹកជញ្ជូន បាននិយាយថា ការចំណាយរបស់អ្នកប្រើប្រាស់ទូទៅកំពុងមានភាពប្រសើរឡើងជាបណ្តើរៗ។
ទោះជាយ៉ាងណាក៏ដោយ ការកើនឡើងយ៉ាងខ្លាំងនៃតម្លៃថាមពល និងការចំណាយសម្រាប់ការរស់នៅ ក៏ដូចជាល្បឿនយឺតនៃការងើបឡើងវិញនៃសេដ្ឋកិច្ចរបស់ប្រទេសថៃ បាននាំឱ្យប្រជាជនរក្សាការប្រុងប្រយ័ត្នក្នុងការចំណាយរបស់ពួកគេ បើទោះបីជាការមកដល់របស់ភ្ញៀវទេសចរបរទេសមានការកើនឡើងនៅពេលដែលសេដ្ឋកិច្ចបើកឡើងវិញក៏ដោយ៕
