ម៉ាឡេស៊ីរំពឹងសម្រាប់កំណើនសេដ្ឋកិច្ចកាន់តែខ្លាំងនៅក្នុងត្រីមាសបន្ទាប់ៗ

កំណើនសេដ្ឋកិច្ចរបស់ប្រទេសម៉ាឡេស៊ីត្រូវបានគេរំពឹងថានឹងមានការកើនឡើងបន្ថែមទៀតនៅក្នុងត្រីមាសទី២ និងទី៣ នៃឆ្នាំនេះ ដែលជំរុញដោយកិច្ចខិតខំប្រឹងប្រែងបន្តរបស់រដ្ឋាភិបាលម៉ាឡេស៊ីក្នុងការទាក់ទាញការវិនិយោគពីបរទេស ក៏ដូចជាភាពជោគជ័យនៃកម្មវិធីចាក់វ៉ាក់សាំងការពារជំងឺកូវីដ-១៩។

ទេសរដ្ឋមន្ត្រី និងជារដ្ឋមន្រ្តីក្រសួងពាណិជ្ជកម្ម និងឧស្សាហកម្មអន្តរជាតិម៉ាឡេស៊ី លោក Datuk Seri Mohamed Azmin Ali ត្រូវបានដកស្រង់សម្តីដោយប្រព័ន្ធផ្សព្វផ្សាយក្នុងស្រុកថា កំណើនសេដ្ឋកិច្ច ៥ភាគរយដែលបានកត់ត្រានៅក្នុងត្រីមាសទីមួយនៃឆ្នាំនេះ គឺជាសញ្ញាបង្ហាញថា ដំណើរការសេដ្ឋកិច្ចរបស់ប្រទេសនេះនឹងបន្តមានភាពប្រសើរឡើង។

លោកបាននិយាយថា នេះជាការអរគុណចំពោះគោលនយោបាយ និងកម្មវិធីដែលផ្តួចផ្តើមឡើងដោយអតីតនាយករដ្ឋមន្ត្រីម៉ាឡេស៊ី លោក Tan Sri Muhyiddin Yassin ដើម្បីពន្លឿនកម្មវិធីចាក់វ៉ាក់សាំងរបស់ប្រទេសនេះ ដោយឥឡូវនេះមានជាង ៩៨,៥ភាគរយនៃចំនួនប្រជាជនពេញវ័យរបស់ប្រទេសម៉ាឡេស៊ីបានទទួលការចាក់វ៉ាក់សាំងដែលអនុញ្ញាតឱ្យប្រទេសនេះបើកព្រំដែនរបស់ខ្លួនឡើងវិញ។

លោកបាននិយាយថា ហេតុដូច្នេះហើយ ដោយសារតម្រូវការខាងក្រៅមានការកើនឡើង ដូច្នេះបណ្តាក្រុមហ៊ុនក្នុងស្រុករួមទាំងសហគ្រាសធុនតូច និងមធ្យម ចាំបាច់ត្រូវបង្កើនផលិតភាពរបស់ខ្លួនដើម្បីបំពេញតម្រូវការខាងក្រៅ។

លោកបាននិយាយបន្ថែមថា ក្រសួងពាណិជ្ជកម្ម និងឧស្សាហកម្មអន្តរជាតិ រួមជាមួយនឹងអាជ្ញាធរអភិវឌ្ឍន៍ការវិនិយោគម៉ាឡេស៊ី និងសាជីវកម្មអភិវឌ្ឍន៍ពាណិជ្ជកម្មខាងក្រៅម៉ាឡេស៊ី នឹងបន្តខិតខំទាក់ទាញការវិនិយោគដែលនឹងបង្កើតឱកាសការងារប្រកបដោយគុណភាពសម្រាប់ប្រជាជនម៉ាឡេស៊ី។

លោក Mohamed Azmin បាននិយាយថា រដ្ឋាភិបាលរបស់លោកក៏នឹងបន្តធានាថា អ្នកវិនិយោគនៅតែមានទំនុកចិត្តទៅលើបរិយាកាសធុរកិច្ច និងប្រព័ន្ធអេកូឡូស៊ីរបស់ប្រទេសនេះ។ លោកបាននិយាយបន្ថែមថា សេដ្ឋកិច្ចរបស់ប្រទេសម៉ាឡេស៊ីកំពុងដើរលើផ្លូវត្រឹមត្រូវក្នុងការងើបឡើងវិញពីផលវិបាកនៃជំងឺរាតត្បាតកូវីដ-១៩ ដោយលោកបានសង្កត់ធ្ងន់ថា រដ្ឋាភិបាលម៉ាឡេស៊ីត្រូវការពេលវេលាខ្លះដើម្បីធានាថា កម្មវិធីស្តារឡើងវិញទាំងអស់ដំណើរការដោយរលូន៕(ប្រភព VNA បកប្រែដោយលោក យា ចិន្តាខន្តី)