ភ្នំពេញ ថ្ងៃទី០៨ ខែមិថុនា ឆ្នាំ២០២២–
កម្ពុជា នាំចេញអង្ករទៅកាន់ទីផ្សារអឺរ៉ុបកើនឡើងប្រមាណ ៥០ភាគរយ ច្រើនជាង ការនាំចេញទៅកាន់ទីផ្សារប្រទេសជាសមាជិកអាស៊ាន ដែលមានចំនួនជាង ២ម៉ឺន៥ពាន់តោន កើនឡើងត្រឹមតែ ១៧ភាគរយ បើធៀបនឹងរយៈពេលដូចគ្នាកាលពីឆ្នាំ២០២១។
លោកឧកញ៉ា សុង សារ៉ន អគ្គនាយកក្រុមហ៊ុន Amru Rice Cambodia និងជាប្រធាន សហព័ន្ធស្រូវអង្ករកម្ពុជា បានឱ្យដឹងនាព្រឹកថ្ងៃទី០៨ ខែមិថុនានេះថា ការកើនឡើង នៃការនាំ ចេញអង្ករទៅកាន់ទីផ្សារអឺរ៉ុប ក្នុងរយៈពេល៥ខែដំបូងដើមឆ្នាំ២០២២នេះ គឺដោយសារតែ ឆ្នាំ២០២២ គឺជាឆ្នាំដែលកម្ពុជារួចពន្ធលើទំនិញ ដែលត្រូវបាននាំចេញទៅកាន់សហភាពអឺរ៉ុប និងការសម្រួលដល់ការដឹកជញ្ជូនទំនិញមានភាពល្អប្រសើរ រួមជាមួយនឹងប្រទេសនៅប៉ែក អឺរ៉ុប បានបើកឱ្យមាននូវការជួបជុំឡើងវិញ ហើយតម្រូវការផ្នែកអាហារក៏មានការកើនឡើង ចំណែកបញ្ហាសង្គ្រាមរវាងរុស្សី និងអ៊ុយគ្រែន ក៏ជាផ្នែកមួយធ្វើឱ្យតម្រូវការស្បៀង អាហារមានការកើនឡើងផងដែរ ។
លោកឧកញ៉ាបន្តថា បើយើងមើលទៅទីផ្សារអាស៊ានវិញ កំណើននៃការនាំចេញ មិនមានអ្វីប្រែប្រួលច្រើនទេ ដោយសារតែអាស៊ានក៏ជាប្រទេសផលិតស្រូវអង្ករដែរ ដូច្នេះការ នាំចេញអង្ករយើងទៅកាន់ប្រទេសអាស៊ាននៅមានចំនួនមិនច្រើនដូចទីផ្សារចិន និងប្រទេស នៅប៉ែកអឺរ៉ុបនោះទេ។
បើតាមរបាយការណ៍ពីសហព័ន្ធស្រូវអង្ករកម្ពុជាបានបង្ហាញថា ក្នុងរយៈពេល ៥ខែ ដើមឆ្នាំ២០២២ កម្ពុជាបាននាំចេញអង្ករគ្រប់ប្រភេទទៅកាន់ទីផ្សារអន្តរជាតិ តាមរយៈ ក្រុមហ៊ុនចំនួន ៥៣ក្រុមហ៊ុន បានអង្ករចំនួន ២៨ម៉ឺនតោន ដែលគិតជាទំហំទឹកប្រាក់ប្រមាណ ១៧៣លានដុល្លារសហរដ្ឋអាមេរិក ដែលក្នុងនោះ មានប្រទេសចិន រួមទាំងតំបន់ស្វយ័ត ហុងកុង ម៉ាកាវ មានកំណើនប្រមាណ ២៣ភាគរយ បើធៀបទៅនឹងរយៈពេលដូចគ្នា ក្នុង ឆ្នាំ២០២១ ដោយការនាំចេញទៅកាន់ប្រទេសនានានៅក្នុងទ្វីបអឺរ៉ុប មានចំនួន ២៣ប្រទេស កើនឡើងប្រមាណ៥០ភាគរយ ការនាំចេញទៅកាន់ ប្រទេសក្នុងសមាជិកអាស៊ាន កើនឡើង ប្រមាណ ១៧ភាគរយ និងការនាំចេញទៅកាន់គោលដៅផ្សេងៗ មានប្រមាណ ៧ភាគរយ។
គួរបញ្ជាក់ថា ប្រទេសចិននៅតែឈរជាទីផ្សារនាំមុខគេ សម្រាប់ការនាំចេញអង្កររបស់ កម្ពុជា ដោយ៥ខែមកនេះ ចិនកាន់កាប់ចំណែក ៥២ភាគរយ នៃការនាំចេញអង្ករសរុបរបស់ កម្ពុជា ហើយបន្ទាប់ពីនោះ គឺសហភាពអឺរ៉ុប ជាអ្នកទិញអង្ករកម្ពុជា លំដាប់ទី២ ហើយអាស៊ាន ក៏ជាទីផ្សារនាំចេញបន្ទាប់របស់កម្ពុជាផងដែរ៕
