ឯកឧត្តមខៀវ កាញារីទ្ធ រដ្ឋមន្ត្រី ក្រសួងព័ត៌មាន ប្រធានក្រុមការងាររាជរដ្ឋាភិបាលចុះមូលដ្ឋានស្រុកកោះសូទិន និង ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម អញ្ជើញជាអធិបតីក្នុងពិធីប្រជុំបូកសរុបការងារក្រុមគ្រូពេទ្យស្ម័គ្រចិត្ត ឯកឧត្តម ខៀវ កាញារីទ្ធ ចុះពិនិត្យជំងឺជូនប្រជាពលរដ្ឋឥតគិតថ្លៃនៅទូទាំងស្រុកកោះសូទិន ខេត្តកំពង់ចាម នៅព្រឹកថ្ងៃទី២៦ ខែឧសភា ឆ្នាំ២០២២ នាខេត្តកំពង់ចាម ។
ឯកឧត្តម វេជ្ជបណ្ឌិត សៅ សំបូរ ទីប្រឹក្សាក្រសួងព័ត៌មាន និងជាប្រធានក្រុមគ្រូពេទ្យស្មគ្រ័ចិត្ត ឯកឧត្តម ខៀវ កាញារីទ្ធ បានជម្រាបជូនថា ក្រុមគ្រូពេទ្យស្មគ្រ័ចិត្ត បានបង្កើតឡើងកាលពីខែមិនាឆ្នាំ ២០១៩ ដែលបច្ចុប្បន្នមានសមាសភាពសរុបចំនួន ៩២ នាក់ ក្នុងនេះវេជ្ជបណ្ឌិតចំនួន ១០ នាក់ ទន្តបណ្ឌិត ១ នាក់ គ្រូពេទ្យ ៤នាក់ គិលានុបដ្ឋាក យិកា៦២ នាក់ និងនិស្សិតគិលានុបដ្ឋាក ទន្តគិលាន ១៥នាក់ ។ ផ្តើមចេញពីនេះ ក្រុមគ្រូពេទ្យក៍បានធ្វើសកម្មភាពជាបន្តបន្ទាប់បានចំនួន៥លើក ក្នុង៤ឃុំនៅស្រុកកោះសូទិន ពិនិត្យជំងឺសរុបបាន ១៩៣៨នាក់ ស្រី១៣៤៣នាក់។ដោយសារការផ្ទុះឡើងរីករាលដាលជាសកលនូវជំងឺកូវីដ១៩ សកម្មភាពក្រុមគ្រូពេទ្យស្មគ្រ័ចិត្តត្រូវរាំងស្ទះខកខានរហូតមកដល់ដើមខែមេសាឆ្នាំ២០២២ ក៏បានចាប់ផ្ដើមធ្វើសកម្មភាពជាថ្មីតាម កាលវិភាគរហូតដល់ថ្ងៃទី១៥ ខែឧសភា ឆ្នាំ២០២២ ដោយផ្តល់សេវាចំនួន៤គឺ ១-ពិនិត្យព្យាបាលជំងឺទូទៅគ្រប់វ័យ២- ពិនិត្យពិគ្រោះធ្មេញ ដកធ្មេញ ៣-ចាក់វ៉ ក់សាំងការពារជំងឺកូវីដ១៩ និង ៤ ពិនិត្យវាស់ភ្នែកនិងផ្តល់ជូនវ៉ែនតា បានគ្រប់ ឃុំទាំង៨ក្នុងស្រុកកោះសូទិនប្រកបដោយលទ្ធផលគួរជាទីមោទនៈ។
ឯកឧត្តម វេជ្ជបណ្ឌិត សៅ សំបូរ ជំនួសមុខក្រុមគ្រូពេទ្យស្មគ្រ័ចិត្តឯកឧត្តមខៀវ កាញារីទ្ធ សូមគោរពថ្លែងអំណរគុណយ៉ាងជ្រាលជ្រៅ ចំពោះ ឯកឧត្តម រដ្ឋមន្ត្រីក្រសួងព័ត៌មាន ឯកឧត្តម អភិបាលខេត្តកំពង់ចាម និងក្រុមការងារចុះឃុំទាំង៨ ដែលបានផ្ដល់ទំនុកចិត្ត ជំនឿមកលើក្រុមគ្រូពេទ្យដោយបានឧបត្ថម្ភគាំទ្រទាំងស្មារតីនិងសំភារៈ ថវិកា ជាមូលដ្ឋានគ្រឹះមិនអាចខ្វះបានសំរាប់ក្រុមគ្រូពេទ្យស្មគ្រ័ចិត្តមានលទ្ធភាព គ្រប់គ្រាន់ក្នុងការពិនិត្យព្យាបាលជំងឺជូនប្រជាពលរដ្ឋ សរុបចំនួន ៤ ៦៦៣ នាក់ ក្នុងនោះ ជំងឺទូទៅ ៣ ៨៤៥ នាក់ ដកធ្មេញ ៣៥១ នាក់ ចាក់វ៉ាក់សាំង បាន ៣៦៨ នាក់ វាស់ភ្នែក ផ្តល់ជូនវែនតា បាន ១០០ នាក់ ។ ថវិកា ចំណាយអស់ជាង ៧៦ លានរៀល ។
ឯកឧត្តមអ៊ុន ចាន់ដា បានចាត់ទុកក្រុមគ្រូពេទ្យស្មគ្រ័ចិត្ត ឯកឧត្តម ខៀវ កាញារីទ្ធ ដែលបានចុះមកស្រុកកោះសូទិន មិនត្រឹមតែចូលរួមក្នុងការផ្តល់សេវាសុខាភិបាលជូនដល់ប្រជាពលរដ្ឋ ប៉ុណ្ណោះទេ ថែមទាំងប្រយុទ្ធប្រឆាំងជំងឺកូវីដ-១៩ តាមរយៈការចាក់វ៉ាក់សាំងជូនប្រជាពលរដ្ឋ ដើម្បីអោយភាពសាំក្នុងសហគម ។ សកម្មភាពពិនិត្យ ព្យាបាលជំងឺឥតគិតថ្លៃនេះ គឺជាការចូលរួមកាត់បន្ថយការចំណាយរបស់ប្រជាពលរដ្ឋ ដែលចំណាយទៅលើគ្លីនិកឯកជន ឬពេទ្យរដ្ឋ ដែលយកសេវា ។ ឯកឧត្តម អភិបាលខេត្ត បានកោតសរសើរ និងគាំទ្រចំពោះសកម្មភាពការងាររបស់ក្រុមគ្រូពេទ្យស្ម័គ្រចិត្ត ឯកឧត្តម ខៀវ កាញារីទ្ធ ទាំងអស់ ហើយសូមបន្តសកម្មភាពនេះទៅមុខទៀត ដើម្បីសុខមាលភាព របស់ប្រជាពលរដ្ឋ ដែលជាគោលការណ៍របស់រាជរដ្ឋាភិបាល ក្នុងការ ការពារសុខភាពរបស់ប្រជាពលរដ្ឋ អោយបានល្អ។
ឯកឧត្តមរដ្ឋមន្ត្រី ខៀវ កាញារីទ្ធ មានប្រសាន៍លើកឡើងថា ការជួបជុំគ្នានាឱកាសនេះ គឺជាការបញ្ចប់បេសកកម្មរបស់ក្រុមគ្រូពេទ្យស្មគ្រ័ចិត្ត ចុះពិនិត្យព្យាបាលជំងឺជូនប្រជាពលរដ្ឋ ក្នុងឃុំទាំង ៨ នៃស្រុកកោះសូទិន ខេត្តកំពង់ចាម ។ ជាផែនការបន្ត គឺ ១ ខែ ឬ ២ ខែ ក្រុមគ្រូពេទ្យនឹងចុះពិនិត្យព្យាបាលជំងឺជូនប្រជាពលរដ្ឋឥតគិតថ្លៃបន្តទៀត ។ ឯកឧត្តម រដ្ឋមន្ត្រី បានសំដែងនូវការអរគុណចំពោះក្រុមគ្រូពេទ្យទាំងអស់ដែលបានចំណាយពេលវេលា និងកំលាំងកាយចិត្ត ក្នុងការចុះព្យាបាលជំងឺជូនប្រជាពលរដ្ឋ ហើយ ឯកឧត្តម នឹងស្នើទៅរាជរដ្ឋាភិបាល ក្នុងការផ្តល់ជូននូវមេដាយ ការងារជូនដល់ក្រុមគ្រូពេទ្យស្មគ្រ័ចិត្តទាំងអស់ ដើម្បីជាការលើកទឹកចិត្ត នឹងបន្តជម្រុញសកម្មភាពនេះទៅមុខទៀត ក្នុងការធ្វើយ៉ាងណារួមចំណែកលើកកម្ពស់សុខភាពជូនប្រជាពលរដ្ឋនៅតាមទីជនបទ បានកាន់តែប្រសើរល្អ ។
នៅក្នុងឱកាសនេះដែរ ឯកឧត្តម រដ្ឋមន្ត្រី ខៀវ កាញារីទ្ធ បានផ្តល់ជូននូវលិខិតសរសើរដល់ លោកជំទាវ សាស្ត្រាចារ្យ ឱសថបណ្ឌិត ខៀវទេព រង្សុីកាញារីទ្ធ ប្រធានកិត្តិយសក្រុមគ្រូពេទ្យស្មគ្រ័ចិត្ត ឯកឧត្តម ខៀវ កាញារីទ្ធ និងជូនដល់ ប្រធាន អនុប្រធាន និងក្រុមគ្រូពេទ្យទាំងអស់ ចំនួន ៨៣ នាក់ ដែលបានលះបង់ពេលវេលា យកអស់កម្លាំងកាយចិត្ត ដើម្បីចូលរួមក្នុងយុទ្ធនាការពិនិត្យសុខភាព ព្យាបាលជំងឺនិងចែកថ្នាំជូនដល់ប្រជាជនក្នុងស្រុកោះសូទិន ខេត្តកំពង់ចាម ៕
