សម្តេចតេជោ បានណែនាំដល់កីឡាករ កីឡាការិនី ត្រូវយកចិត្តទុកដាក់ប្រឹងប្រែងប្រកួត ហើយត្រូវតែចៀសវាងការបំពានច្បាប់ និងលក្ខខណ្ឌប្រកួត ក៏ដូចជាការប្រើប្រាស់សារធាតុប៉ូវកម្លាំង ដែលនាំឱ្យប៉ះពាល់ ដល់សេចក្តីថ្លៃថ្នូរនិងកិត្តិយសប្រទេសជាតិ។
ថ្លែងក្នុងពិធីជួបសំណេះ សំណាល និង ផ្តល់អនុសាសន៍ ដល់កីឡាករ កីឡាការិនី និងអត្តពលិក មុនពេលចេញទៅប្រកួតកីឡាស៊ីហ្គេម (SEA Games) លើកទី៣១ នៅប្រទេសវៀតណាម នាថ្ងៃទី២៨ ខែមេសា ឆ្នាំ២០២២នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានរំលឹកដល់ក្រុមកីឡាករ កីឡាការិនីថា ការចេញទៅប្រកួត កីឡាស៊ីហ្គេម (SEA Games) លើកទី៣១ នៅប្រទេសវៀតណាមនេះ គឺតំណាងឱ្យប្រទេសជាតិទាំងមូល ដែលមានអង្គព្រះមហាក្សត្រ នីតិប្បញ្ញតិ្ត រដ្ឋសភា ព្រឹទ្ធសភា និង នីតិប្រតិបត្តិ ជាពិសេសមាន ប្រជាជនជិត១៧លាននាក់ ដូច្នោះត្រូវយកចិត្តទុកដាក់ប្រឹងប្រែងប្រកួត ហើយត្រូវតែចៀសវាងការបំពានច្បាប់ និងលក្ខខណ្ឌ ប្រកួត ក៏ដូចជាការប្រើប្រាស់សារធាតុប៉ូវកម្លាំង ឬសារធាតុញៀន ដែលនាំឱ្យប៉ះពាល់ ដល់សេចក្តីថ្លៃថ្នូរនិងកិត្តិយសប្រទេសជាតិ។
សម្តេចសង្កត់ធ្ងន់ថា សេចក្តីថ្លៃថ្នូររបស់ជាតិ គឺសំខាន់ណាស់សម្រាប់ប្រទេស ដែលមិនត្រូវធ្វើអ្វី ដែលនាំដល់ការអាប់ឱនកិត្តិយសជាតិនោះឡើយ។ សម្តេចចាត់ទុកថា ទោះបីកម្ពុជាទទួលបានមេដាយមាសក៏ដោយ ប៉ុន្តែស្អុយឈ្មោះដោយប្រើប្រាស់សារធាតុញៀន ឬសារធាតុប៉ូវកម្លាំងដែលមានការហាមឃាត់ គឺគ្មានន័យនោះទេ។
« មិនឱ្យសារធាតុគ្រឿងញៀនឬគ្រឿងប៉ូវកម្លាំងនេះ ហាមដាច់ខាតប្រកួតអាចមានការថ្លោះធ្លោយដោយអចេតនា ប៉ុន្តែសម្រាប់ការប្រើប្រាស់សារធាតុញៀន គឺសារធាតុប៉ូវកម្លាំង គឺជាចេតនាពិតប្រាកដ ដូច្នេះប្រសិនបើមានកំហុសនេះកើតឡើងវាជារឿងអាសោច សម្រាប់មុខមាត់ប្រទេសជាតិរបស់យើងដែលមិនត្រូវឱ្យមានកើតឡើងជាដាច់ចាត់។ ហើយនៅក្នុងចំណោមកីឡារបស់យើង ទោះបីជាយើងដាក់ចេញគោលដៅបែបណា ក៏ដោយ ដើម្បីទទួលបានមេដាយមាសឱ្យបានចំនួនប៉ុណ្ណេះ មេដាយប្រាក់ឱ្យបានចំនួនប៉ុណ្ណោះ ប៉ុន្តែប្រសិនបើមានខូចឈ្មោះហើយ ទោះបីជាកីឡាប៉ុន្មាននាក់ទៀត ក៏ធ្វើឱ្យបាត់បង់មុខមាត់ប្រទេសជាតិតែម្តង។ ដូច្នេះខ្ញុំសូមស្នើឱ្យមានការយកចិត្តទុកដាក់បំផុតទៅលើបញ្ហាវិន័យនៃកីឡា ដែលក្នុងហ្នឹង គឺបញ្ហាសារធាតុនៃការលើកកម្លាំងខុសរបៀប ខុសបទបញ្ញត្តិត្រូវតែបានធានាថា គ្មាននៅក្នុងចំណោមក្រុមកីឡារបស់យើង។»
គួរជម្រាបថា កីឡាករ កីឡាការិនី និងអត្តពលិករបស់កម្ពុជា ដែលត្រូវបានរៀបចំជ្រើសរើសដោយក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិលើស្មារតីតម្លាភាព និងកម្រិតគុណផលកីឡាខ្ពស់ជាងគេមានសរុប ៥៦០នាក់ ដែលត្រូវ ចេញទៅប្រកួតកីឡាស៊ីហ្គេម (SEA Games) លើកទី៣១ នៅប្រទេសវៀតណាម ។ ក្នុងនោះកម្ពុជាបានត្រៀមចូលរួមប្រកួត៣៣ប្រភេទកីឡា ដែលរួមមាន៖ កីឡាអត្តពលកម្ម, កីឡាហែលទឹក, កីឡាកាយសម្ព័ន្ធ, កីឡាបាល់ទាត់ U20 (បុរស-នារី), កីឡាបាល់ទះលើក្តារ-ឆ្នេរខ្សាច់, កីឡាបាល់បោះ 5X5, 3X3, កីឡាសីដក់, កីឡាវាយកូនឃ្លីលើតុ, កីឡាវាយសី, កីឡាបាញ់កាំភ្លើង, កីឡាតេក្វាន់ដូ WT, កីឡាប្រណាំងទោចក្រយាន, កីឡាវាយកូនបាល់, កីឡាគុនដាវ, កីឡាយូដូ, កីឡាវាយកូនគោល, កីឡាវូស៊ូ, កីឡាចំបាប់, កីឡាប្រដាល់សកល, កីឡាការ៉ាតេ, កីឡារាំ, កីឡាទ្រីយ៉ាត្លុង, កីឡាជីជីតស៊ូ, កីឡាលើកទម្ងន់, កីឡាកានូ/កាយ៉ាក, កីឡាវ៉ូវីណាម, កីឡាប្រដាល់គុនខ្មែរ, កីឡាប្រដាល់ Kik boxing, កីឡាប៉េតង់, កីឡាកាយវប្បកម្ម, កីឡាប៊ីយ៉ា-ស្នូកឃ័រ, កីឡាអេឡិចត្រូនិក (E-Sport) និងកីឡាអុកចិន៕
