សម្ដេចតេជោ ហ៊ុន សែន ប្រកាសដកកាតព្វកិច្ចពាក់ម៉ាស់នៅទូទាំងប្រទេសសម្រាប់ទីកន្លែងសាធារណៈ និងទីកន្លែងចំហនានា ក្រៅពីកន្លែងបិទជិត

ភ្នំពេញ ថ្ងៃទី២៦ ខែមេសា ឆ្នាំ២០២២-

ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានប្រកាសដកតព្វកិច្ចពាក់ម៉ាសនៅទូទាំងប្រទេស ចំពោះទីកន្លែងសាធារណៈនិងទីកន្លែងចំហនានា ក្រៅតែពីកន្លែងបិទជិត ដោយទុកឱ្យប្រជាពលរដ្ឋធ្វើការសម្រេចចិត្តដោយខ្លួនឯង ពាក់ម៉ាស ឬមិនពាក់ម៉ាស។

ក្នុងសារពិសេសជាសំឡេងនាព្រឹកថ្ងៃទី ២៦ ខែមេសា ឆ្នាំ២០២២ ជូនជនរួមជាតិ សម្ដេចតេជោ ហ៊ុន សែន មានប្រសាសន៍ថា បន្ទាប់ពីការដឹកនាំប្រជុំដោយឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ដែលជាអនុប្រធានប្រចាំការនៃគណៈកម្មាការប្រឆាំងកូវីដ រួមជាមួយមន្ត្រីពាក់ព័ន្ធនានា បានបង្ហាញឱ្យឃើញលទ្ធផល ដែលសម្ដេចបានយកឱកាសនេះដើម្បីទូលប្រគេន និងជម្រាបជូនបងប្អូនប្រជាពលរដ្ឋ សម្រាប់ការអនុវត្តបន្ទាប់ពីការទទួលសារនេះរួចហើយ។

ទីមួយៈ លើកលែងកាតព្វកិច្ចពាក់ម៉ាសនៅទូទាំងប្រទេស ចំពោះទីកន្លែងសាធារណៈ និងទីកន្លែងចំហនានា ក្រៅតែពីកន្លែងបិទជិត ដោយទុកឱ្យប្រជាជនទាំងអស់ធ្វើការសម្រេចចិត្តដោយខ្លួនឯង ពាក់ម៉ាស ឬមិនពាក់ម៉ាស។

សម្ដេចតេជោបន្តថា ដូច្នេះមានន័យថា ចាប់ពីម៉ោងដែលបងប្អូនទទួលបាននូវសារសំឡេងនេះ បងប្អូនអាចជ្រើសរើសដោយខ្លួនឯង បន្តពាក់ម៉ាសតទៅទៀត ឬក៏ឈប់ពាក់ម៉ាស នៅកន្លែងដែលចំហ ក្រៅពីកន្លែងដែលមានការបិទជិត ហើយអត្ថន័យនៃកន្លែងដែលបិទជិត គឺសំដៅទៅលើបន្ទប់នៃការប្រជុំដែលមានការបិទជិត ហើយប្រើម៉ាស៊ីនត្រជាក់ ឬក៏នៅក្នុងរោងភាពយន្ត ដែលមានមនុស្សនៅទីនោះ ហើយដែលមានការបិទជិតប្រើដោយម៉ាស៊ីនត្រជាក់។

ប៉ុន្តែក្នុងករណីដែលមានការលំហ ដូចជាការនៅក្នុងអាគារដដែលប៉ុន្តែមានលំហនៅខាងក្រៅ អាចដោះម៉ាសចេញ ហើយកាន់តែច្បាស់ទៅទៀតនៅតាមផ្លូវសាធារណៈ នៅតាមសួនច្បារ នៅតាមកន្លែងកម្សាន្តផ្សេងៗ ដែលមិនមានការបិទជិតទេនោះ បងប្អូនអាចសម្រេចចិត្តដោយ ខ្លួនឯង ពាក់ម៉ាស ឬមិនពាក់ម៉ាស។

ចំពោះទីតាំងមួយចំនួនផ្សេងទៀត រាជរដ្ឋាភិបាលនៅតែបន្តលើកទឹកចិត្តឱ្យមានការពាក់ម៉ាស់ ក៏ប៉ុន្តែមិនមែនជាកាតព្វកិច្ច ដែលត្រូវតែពាក់នោះទេ។ ប៉ុន្តែរាជរដ្ឋាភិបាលក៏នៅតែយកចិត្តទុកដាក់លើកទឹកចិត្តឱ្យមានការពាក់ម៉ាស នៅកន្លែងដែលមានមនុស្សកកកុញប្រមូលផ្ដុំ និងនៅទីកន្លែងដែលមានការសង្ស័យថាអាចមានករណីកូវីដនៅទីនោះ។

សម្ដេចតេជោនាយករដ្ឋមន្ត្រីគូសបញ្ជាក់ថា ជម្រើសនេះ គឺជាជម្រើសដែលល្អបំផុត សម្រាប់ចូលរួមចំណែកជាមួយនិងបងប្អូនជនរួមជាតិ បន្ទាប់ពីយើងបានចាក់វ៉ាក់សាំងពេញលេញរួចមកហើយ។ ជាមួយគ្នានេះ ចំពោះចំណុចទីកន្លែងដែលធ្លាប់បានអនុវត្តន៍ទៅតាមស្តង់ដារ ដែលរៀបចំដោយក្រសួងសុខាភិបាល ដូចជា ភោជនីយដ្ឋាន ឬក៏ទីកន្លែងមួយចំនួនដែលមានការបិទជិត ក៏ត្រូវបន្តអនុវត្តន៍ទៅតាមនោះ និងទៅតាមការជាក់ស្ដែងនៃទីកន្លែងនីមួយៗ ដោយមិន ស្លាប់ក្រឡានោះទេ។

សម្ដេចតេជោប្រមុខរាជរដ្ឋាភិបាល សង្ឃឹមថា បងប្អូនជនរួមជាតិរបស់យើង នឹងបាន រំដោះខ្លួនចេញពីការលំបាកនៃការចំណាយ ដោយយើងបានយកវ៉ាក់សាំងមកជំនួសឱ្យការពាក់ម៉ាស៕