សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានគូសបញ្ជាក់ថា ថ្ងៃនេះ បើតាមលទ្ធផលរបស់ក្រសួងសុខាភិបាលបានរកឃើញអ្នក ឆ្លងជំងឺកូវីដ១៩ តែចំនួន០២នាក់ ប៉ុណ្ណោះ ដែលជាព្រឹត្តិការណ៍មួយមិនធ្លាប់មាន។
ក្នុងសារសំឡេងពិសេសចេញនៅព្រឹកថ្ងៃទី២៦ ខែមេសា ឆ្នាំ២០២២ សម្តេចតេជោ ហ៊ុន សែន បានថ្លែងថា ថ្ងៃនេះនៅទូទាំងប្រទេសកម្ពុជាមានអ្នកឆ្លងជំងឺកូវីដ១៩ ត្រឹមតែ ០២ នាក់ ប៉ុណ្ណោះ ដែលជាព្រឹត្តិការណ៍មិនធ្លាប់មាន ហើយជាលើកដំបូងក្នុងប្រវត្តិសាស្រ្ដ ជិតមួយឆ្នាំសម្រាប់រាជធានីភ្នំពេញមិនមានអ្នកឆ្លងទេនៅថ្ងៃទី២៥ ខែមេសា ឆ្នាំ២០២២។ សម្តេចតេជោបានលើកឡើងថា ចំពោះការដែលធ្វើឱ្យកម្ពុជាមានអ្នកឆ្លងជំងឺកូវីដ១៩ ថយ មក០២នាក់នេះ គឺជាការត្រេកអរយ៉ាងខ្លាំងដែលមានការចួលរួមយ៉ាងសកម្មពីប្រជាពលរដ្ឋ និងការខិតខំប្រឹងប្រែងរបស់ស្ថាប័នមានសមត្ថកិច្ចជា ពិសេសក្រុមគ្រូពេទ្យ ក៏ដូចជាផ្នែក ពាក់ព័ន្ធនានា ដែលចូលរួម។
សម្តេចតេជោថ្លែងបញ្ជាក់ថា “ខ្ញុំព្រះករុណាខ្ញុំ សូមរួមចំណែកជាប្រជាពលរដ្ឋ ដែល បានរំដោះខ្លួនចេញពីការកាតព្វកិច្ចពាក់ម៉ាស និងសូមអំពាវនាវឱ្យមានការទុកម៉ាសជាប់ខ្លួនដើម្បីពាក់នៅកន្លែងដែលបានកំណត់ ដែលក្រសួងសុខាភិបាល និងផ្នែកពាក់ពាក់ព័ន្ធនឹងរៀបចំវិធានការបញ្ជាក់ជូននៅពេលក្រោយ”។ សម្ដេចតេជោនាយករដ្ឋមន្រ្ដីបានបន្ថែមថា ការមិនពាក់ម៉ាសគឺជាចំណុចដែលជាការចង់បានរបស់ប្រជាពលរដ្ឋ ហើយក៏ជាការចង់បានរបស់រាជរដ្ឋាភិបាល ដើម្បីចូលរួមការសន្សំសំចៃ និងបង្វែរថវិកាទៅចំណាយផ្នែកផ្សេងទៀត៕
