អាជ្ញាធរខេត្តកណ្ដាល ស្នើដល់មន្ត្រីរាជការ កងកម្លាំងមានសមត្ថកិច្ច និងប្រជាពលរដ្ឋទាំងអស់ សូមបន្តថែរក្សាពង្រឹងសន្តិភាព ស្ថិរភាពនយោបាយ ស្ថិរភាពសង្គម សន្តិសុខ សណ្តាប់ធ្នាប់សាធារណៈ និងខិតខំរួមគ្នាធ្វើការអភិវឌ្ឍស្រុកមុខកំពូល ឱ្យកាន់តែមានការរីកចម្រើនលើគ្រប់វិស័យបន្តទៀត។
នេះជាការលើកឡើងរបស់ ឯកឧត្តម នូវប៉េង ច័ន្ទតារា អភិបាលរងខេត្តកណ្ដាល ក្នុងឱកាស ឯកឧត្តម អញ្ជើញជាអធិបតីក្នុងពិធីប្រកាសតែងតំាង អភិបាលរង នៃគណៈអភិបាលស្រុកមុខកំពូល ខេត្តកណ្ដាល នារសៀលថ្ងៃទី២៥ ខែមេសា ឆ្នាំ២០២២ ។
ឯកឧត្តមអភិបាលរងខេត្ត បន្តថា អាជ្ញាធរគ្រប់លំដាប់ថ្នាក់ ត្រូវរួមសាមគ្គីសហការគ្នា ខិតខំប្រឹងប្រែងយ៉ាងសកម្មក្នុងការដឹកនាំ គ្រប់គ្រង និងអភិវឌ្ឍ មូលដ្ឋានឱ្យមានការរីកចម្រើនលើគ្រប់វិស័យ រួមមានការផ្តល់សេវាសាធារណៈ ការអភិវឌ្ឍមូលដ្ឋាន ការជួយសង្គ្រោះប្រជាពលរដ្ឋពីគ្រោះធម្មជាតិនានា ការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពជូនប្រជាពលរដ្ឋក្នុងមូលដ្ឋានរបស់ខ្លួន។
ឯកឧត្តមអភិបាលរងខេត្ត បានកោតសរសើរ ដល់អាជ្ញាធរស្រុកមុខកំពូល ដែលបានយកចិត្តទុកដាក់ចូលរួមយ៉ាងសកម្ម និងប្រកបដោយភាពម្ចាស់ការ ក្នុងការអនុវត្តវិធានការនានារបស់រាជរដ្ឋាភិបាល និងក្រសួងសុខាភិបាលក្នុងការបង្ការ និងទប់ស្កាត់ការរីករាលដាលនៃជំងឺកូវីដ-១៩ ព្រមទាំងជំរុញ និងអនុវត្ត យុទ្ធសាស្ត្រចាក់វ៉ាក់សាំងរបស់រាជរដ្ឋាភិបាលឱ្យទទួលបានជោគជ័យទាំងក្នុងកម្រិតជាតិ និងកម្រិតខេត្ត ពិសេសនៅក្នុងភូមិសាស្ត្រស្រុកមុខកំពូល ដែលធ្វើឱ្យព្រះរាជាណាចក្រកម្ពុជាក្លាយជាប្រទេស មួយស្ថិតក្នុងចំណោមប្រទេស ដែលបានចាក់វ៉ាក់សាំងជូនប្រជាជនបានច្រើន និងបានបង្កើត ឡើងនូវមូលដ្ឋានរឹងមាំសម្រាប់រាជរដ្ឋាភិបាលក្នុងការប្រកាសពីការរស់នៅជាមួយជំងឺកូវីដ-១៩ និង ការបើកប្រទេសឡើងវិញលើគ្រប់វិស័យជាបណ្តើរៗសំដៅស្តារ និងជំរុញកំណើនសេដ្ឋកិច្ចឡើង វិញតាមគន្លងប្រក្រតីភាពថ្មីប្រកបដោយភាពជឿជាក់។
សូមបញ្ជាក់ផងដែរថា លោក សោម ផល្លា ត្រូវបានតែងតាំងជាអភិបាលរងស្រុកមុខកំពូល ជំនួសលោក ឆាយ សុណា ដែលត្រូវផ្លាស់ប្ដូរទៅកាន់មុខតំណែងជាអភិបាលរងស្រុកលើកដែក និងលោក ហុង គីរី ជាអភិបាលរងស្រុកមុខកំពូល ជំនួសលោក រ៉េន សុវន្នី ដែលត្រូវបានផ្ទេរចេញ។
