ក្រសួងទទួលបន្ទុកជនភៀសខ្លួន និងកិច្ចការធ្វើមាតុភូមិនិវត្តន៍របស់ប្រទេសអាហ្វហ្គានីស្ថានបានចែកចាយជំនួយមនុស្សធម៌ដែលបរិច្ចាគដោយប្រទេសចិនដល់ប្រជាជនទុរគតចំនួន ១ ៥០០នាក់កាលពីថ្ងៃសៅរ៍។
រដ្ឋមន្ត្រីនៃក្រសួងទទួលបន្ទុកជនភៀសខ្លួន និងការធ្វើមាតុភូមិនិវត្តន៍ លោក Khalil-ur-Rahman Haqqani បានប្រាប់ក្រុមអ្នកសារព័ត៌មានថា «នៅថ្ងៃនេះ យើងបានចែកចាយជំនួយមនុស្សធម៌ដល់ប្រជាជនក្រីក្រចំនួន ១ ៥០០នាក់ ហើយនឹងបន្តជួយដល់គ្រួសារដែលខ្វះខាតផ្សេងៗទៀតនៅសប្តាហ៍ក្រោយ»។
ទន្ទឹមនឹងនោះដែរ អ្នកនាំពាក្យក្រសួងនេះ លោក Abdul Mutalib Haqqani បាននិយាយថា ជនក្រីក្រម្នាក់ៗទទួលបានអង្ករ ៥០គីឡូក្រាមដែលផ្តល់ឱ្យដោយប្រទេសចិនដែលជាជំនួយមនុស្សធម៌ដល់ប្រជាជនអាហ្វហ្គានីស្ថាន។
លោក Haqqani បាននិយាយថា «យើងសូមថ្លែងអំណរគុណចំពោះប្រទេសចិនដែលបានផ្តល់ជំនួយដល់ប្រជាជនអាហ្វហ្គានីស្ថានក្នុងដំណាក់កាលដ៏សំខាន់នេះ»។
ប្រទេសអាហ្វហ្គានីស្ថានដែលហែកហួរដោយសង្រ្គាម បាននិងកំពុងប្រឈមមុខនឹងបញ្ហាសេដ្ឋកិច្ចយ៉ាងខ្លាំងចាប់តាំងពីការបរាជ័យនៃកងកម្លាំងដែលដឹកនាំដោយសហរដ្ឋអាមេរិក និងការជម្លៀសរបស់ពួកគេចេញពីប្រទេសអាហ្វហ្គានីស្ថានកាលពីខែសីហាឆ្នាំមុន។ ទីក្រុងវ៉ាស៊ីនតោនបានបង្កកទ្រព្យសម្បត្តិរបស់អាហ្វហ្គានីស្ថានជាង ៩,៥ប៊ីលានដុល្លារអាម៉េរិកនៅក្នុងធនាគាររបស់សហរដ្ឋអាមេរិកដែលធ្វើឱ្យសេដ្ឋកិច្ចដ៏ផុយស្រួយរបស់ប្រទេសអាហ្វហ្គានីស្ថានកាន់តែអាក្រក់ទៅៗ។
អ្នកទទួលជំនួយម្នាក់ឈ្មោះ Farid Ahmad អាយុ ៣៥ឆ្នាំ ដែលជាមេគ្រួសារដែលមានសមាជិក ១០នាក់ បាននិយាយថា «ខ្ញុំសូមដឹងគុណដល់ប្រទេសចិន និងប្រទេសផ្សេងៗទៀត រួមទាំងបណ្តារដ្ឋជិតខាងដែលបានផ្តល់ជំនួយមនុស្សធម៌ដល់ពួកយើង ហើយសង្ឃឹមថាកិច្ចសហប្រតិបត្តិការបែបនេះនឹងបន្តទៅមុខទៀត»។
ដោយសប្បាយរីករាយក្នុងការទទួលបានជំនួយនោះ ស្ត្រីមេម៉ាយវ័យចំណាស់ម្នាក់ឈ្មោះ Halima អាយុ ៦០ឆ្នាំបាននិយាយថា «ខ្ញុំបានទទួលអង្ករមួយថង់ ហើយត្រូវចម្អិនវាដោយគ្មានប្រេងឆាដើម្បីចិញ្ចឹមគ្រួសារដែលមានសមាជិកបីនាក់»៕(ប្រភព People’s Daily បកប្រែដោយលោក យា ចិន្តាខន្តី)
