ភ្នំពេញ ៖ កាលពីថ្ងៃទី២២ ខែមេសា ឆ្នាំ២០២២ អង្គការ ហេឡែន ខេលល័រ (Helen Keller) សហការជាមួយ ក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ (ក.ក.ជ) និងក្រសួងសុខាភិបាល រៀបចំសិក្ខាសាលាស្តីពីសារព័ត៌មានអាហារូបត្ថម្ភ និងពិធីប្រគល់រង្វាន់សារព័ត៌មានជើងឯកអាហារូបត្ថម្ភ នាសណ្ឋាគារភ្នំពេញ ដោយមានការអញ្ជើញចូលរួមជាអធិបតីពី លោកជំទាវវេជ្ជបណ្ឌិត ប្រាក់ សោភ័ណ្ឌនារី រដ្ឋលេខាធិការក្រសួងសុខាភិបាល ឯកឧត្តម ឃួន លឹមឈាន់ អគ្គលេខាធិការរងក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទនៃទីស្តីការគណៈរដ្ឋមន្ត្រី លោក ឌឹម ថេង អគ្គនាយករងអគ្គនាយកដ្ឋាន ក.ប.ប.នៃក្រសួងពាណិជ្ជកម្ម លោក ម៉ម បូរ៉ាត់ ប្រធាននាយកដ្ឋានលើកកម្ពស់អាហារូបត្ថម្ភនៃក្រសួងផែនការ លោកស្រី នង ធួក នាយិការងនៃអគ្គនាយកដ្ឋានទូរទស្សន៍ជាតិកម្ពុជា លោក អ៊ុន សំអឿន តំណាងគម្រោង MUSEFO-GIZ លោកស្រី Gwyneth Cotes នាយិកាអង្គការ Helen Keller សហការី និងអ្នកសារព័ត៌មានមកពីស្ថាប័នផ្សេងៗប្រមាណ៥០នាក់ ។
ក្នុងឱកាសនោះ លោកជំទាវវេជ្ជបណ្ឌិត ប្រាក់ សោភ័ណ្ឌនារី បានមានប្រសាសន៍កោតសរសើរដោយស្មោះ ចំពោះការផ្សព្វផ្សាយព័ត៌មានអាហារូបត្ថម្ភដ៏មានសារៈសំខាន់ទាំងអស់នេះ និងសូមអំពាវនាវដល់អ្នកសារព័ត៌មានទាំងអស់ រួមគ្នាបន្តការផ្សព្វផ្សាយព័ត៌មានពាក់ព័ន្ធអាហារូបត្ថម្ភនេះឲ្យបានច្រើនបន្តទៀត ដើម្បីចូលរួមលប់បំបាត់បញ្ហាអាហារូបត្ថម្ភគ្រប់ទម្រង់នៅកម្ពុជា ដែលជាអាទិភាពដ៏ចម្បងមួយរបស់ រាជរដ្ឋាភិបាលកម្ពុជា។
ជាមួយគ្នានេះដែរ លោកជំទាវក៏សូមឱ្យអ្នកសារពត៌មានមានទាំងអស់ សូមគិតគូរអំពីសុក្រិតភាពរបស់ទិន្នន័យ ប្រភពព័ត៌មាន មានការផ្ទៀងផ្ទាត់លើព័ត៌មានអាហារូបត្ថម្ភឱ្យបានច្បាស់លាស់និងត្រឹមត្រូវ មុនពេលចេញផ្សាយអត្ថបទនីមួយៗ ព្រោះថាប្រសិនបើការផ្សាយពត័មានឬ ទិន្នន័យអាហារូបត្ថម្ភខុសនឹងធ្វើសាធារណជនយល់ខុសនិងអនុវត្តខុសតាមការផ្សព្វផ្សាយនោះដែរ។
លោកស្រី នង ធួក នាយិការងនៃអគ្គនាយកដ្ឋានទូរទស្សន៍ជាតិ បានលើកឡើងថា ចំពោះការងារផ្សព្វផ្សាយអំពីអាហារូបត្ថម្ភ ប្រព័ន្ធផ្សព្វផ្សាយមានសក្តានុពលមិនត្រឹមតែលើកកម្ពស់ចំណេះដឹងរបស់សាធារណៈជន ពីសារសំខាន់នៃអាហារូបត្ថម្ភប៉ុណ្ណោះទេ ហើយថែមទាំងបានរួមចំណែកក្នុងការជំរុញកិច្ចខិតខំប្រឹងប្រែងរបស់អ្នកពាក់ព័ន្ធ ក្នុងការពង្រីកអន្តរាគមន៍កម្មវិធីអាហារូបត្ថម្ភយ៉ាងមានប្រសិទ្ធភាពទៀតផង។
បន្ថែមលើនេះ ប្រព័ន្ធផ្សព្វផ្សាយមានតួនាទីយ៉ាងចាំបាច់ក្នុងការលើកកម្ពស់កិច្ចខិតខំប្រឹងប្រែងលើការងារតស៊ូមតិដើម្បីធានាថាអាហារូបត្ថម្ភនៅតែជាអាទិភាព ក្នុងរបៀបវារៈនយោបាយនិងគោលនយោបាយជាតិ ៕
