បច្ចុប្បន្ននេះ ប្រមាណជាពាក់កណ្តាលនៃចំនួនប្រជាជនក្នុងប្រទេសថៃបានទទួលភាពស៊ាំប្រឆាំងនឹងជំងឺកូវីដ-១៩ ប៉ុន្តែវានៅមានកម្រិតទាបនៅឡើយបើធៀបនឹងគោលដៅ ៨០ភាគរយរបស់រដ្ឋាភិបាលថៃ។ នេះបើយោងតាមនាយកដ្ឋានគ្រប់គ្រងជំងឺ (DoDC) របស់ប្រទេសថៃ។
លោកវេជ្ជបណ្ឌិត Chakkarat Pitayowonganon នាយកផ្នែករោគរាតត្បាតរបស់ DoDC បាននិយាយថាប្រហែល ១០ភាគរយនៃប្រជាជនថៃដែលមានចំនួន ៦៧,៥លាននាក់ត្រូវបានគេប៉ាន់ស្មានថាបានឆ្លងជំងឺរាតត្បាតកូវីដ-១៩ ដោយគិតរហូតមកដល់ពេលនេះ។ នៅពេលដែលមានការចាក់ដូសជំរុញដល់អ្នកដែលបានចាក់វ៉ាក់សាំងគ្រប់ដូសមូលដ្ឋានរួច បានធ្វើឱ្យចំនួនអ្នកដែលមានភាពស៊ាំប្រឆាំងនឹងវីរុសនេះមានប្រមាណ ៥០ភាគរយនៃចំនួនប្រជាជនសរុប។
លោកបាននិយាយថា ការចាក់វ៉ាក់សាំងដូសជំរុញត្រូវតែត្រូវបានផ្តល់អាទិភាពជាពិសេសសម្រាប់ក្រុមប្រជាជនងាយរងគ្រោះ ដូចជាក្រុមមនុស្សចាស់ និងអ្នកដែលមានជំងឺប្រចាំកាយធ្ងន់ធ្ងរ។
យោងតាមលោកវេជ្ជបណ្ឌិត Chakkarat បានឱ្យដឹងថា ក្នុងអំឡុងពេលនៃពិធីបុណ្យសង្ក្រាន្តឆ្នាំថ្មីកាលពីសប្តាហ៍មុន មនុស្សជាច្រើនក្នុងវ័យធ្វើការងារបានចេញទៅកម្សាន្តនៅទីសាធារណៈ។ ពួកគេមានហានិភ័យទាបក្នុងការវិវត្តទៅជារោគសញ្ញាធ្ងន់ធ្ងរ ប្រសិនបើពួកគេបានឆ្លងជំងឺរាតត្បាតនេះ ដោយសារពួកគេភាគច្រើនបានទទួលការចាក់វ៉ាក់សាំងពេញលេញ និងបានទទួលការចាក់វ៉ាក់សាំងដូសជំរុញមួយដូស ឬពីរដូសរួចហើយ។
លោកបាននិយាយថា ប្រមាណ ៥៥ភាគរយនៃប្រជាជននៅក្នុងក្រុមដែលងាយរងគ្រោះមិនទាន់ទទួលបានការចាក់វ៉ាក់សាំងការពារជំងឺកូវីដ-១៩ ទេ។
លោកបានណែនាំដល់ប្រជាពលរដ្ឋដែលមានទំនាក់ទំនងជិតស្និទ្ធជាមួយក្រុមជនងាយរងគ្រោះឱ្យពាក់ម៉ាស់ការពារ គេងក្នុងបន្ទប់ដាច់ដោយឡែកពីគ្នា អនុវត្តវិធានការគម្លាតសង្គមពេលញ៉ាំអាហារ៕(ប្រភព VNA បកប្រែដោយលោក យា ចិន្តាខន្តី)
