ភ្នំពេញ ថ្ងៃទី២០ ខែមេសា ឆ្នាំ២០២២
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជាបានគូសបញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំ សង្កាត់នៅពេលខាងមុខនេះ ប្រជាពលរដ្ឋស្រឡាញ់គណបក្សនយោបាយណាសូមបោះឆ្នោតជូនគណបក្សហ្នឹងទៅ តែសម្តេចមិនចេញឃោសនាជូនមេឃុំណាមួយនោះទេ។
ថ្លែងក្នុងពិធីសម្ពោធសមិទ្ធផលនានា ដែលជាគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤ នាព្រឹកថ្ងៃទី២០ ខែមេសា ឆ្នាំ២០២២ សម្តេចតេជោ ហ៊ុន សែន បានថ្លែងថា សម្ដេចមិនចេញធ្វើការឃោសនាដើម្បីមេឃុំណាមួយនោះទេ គឺទុកឱ្យបេក្ខជន មេឃុំធ្វើការឃោសនាដើម្បីយកសន្លឹកឆ្នោតដោយខ្លួនឯងសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់នៅពេលខាងមុខនេះដោយខ្លួនឯង ហើយស្នើសុំធានាកុំឱ្យមានហិង្សា កើតឡើងដោយរូបភាពណាមួយ។
សម្តេចតេជោបានថ្លែងបញ្ជាក់ថា “ខ្ញុំមិនចេញឃោសនាសបោះឆ្នោតសម្រាប់មេឃុំណាមួយនោះទេ ទុកឱ្យមេឃុំនាំគ្នាធ្វើការឃោសនាដោយខ្លួនឯងទៅ តែខ្ញុំសូមអំពាវនាវដល់គ្រប់ទីកន្លែងទាំងអស់ខិតខំដើម្បីឱ្យប្រជាពលរដ្ឋចូលរួមបោះឆ្នោត និងជ្រើសរើសដោយសេរី ស្រឡាញ់គណបក្សមួយណា ស្រឡាញ់បេក្ខជនមួយណាបោះឱ្យបេក្ខជនមួយហ្នឹងទៅ”។
សម្តេចតេជោលើកឡើងថាប្រជាពលរដ្ឋដឹងហើយអ្វីដែលត្រូវធ្វើ និងអ្វីមិនត្រូវធ្វើ ពីព្រោះនៅពេលគណបក្សប្រជាជនកម្ពុជាគ្រប់គ្រងអំណាចបងប្អូនប្រជាពលរដ្ឋ យល់ឃើញយ៉ាងម៉េច រស់នៅយ៉ាងម៉េច និង និយាយតាមមួយបែបថ្មីបើសិនគណបក្សប្រជាជនឈ្នះដឹកនាំប្រទេស អ្នកណា គណបក្សណាក៏រស់នៅបានដែរ។
សម្តេចតេជោបានបន្តថា ការបោះឆ្នោតជ្រើសរើសក្រុមប្រឹក្សាឃុំ សង្កាត់នៅពេល ខាងមុខនេះមានគណបក្សនយោបាយចូលរួមប្រកួតប្រជែងចំនួន១៧ ប៉ុន្តែក៏មានគណបក្សនយោបាយមួយចំនួនមិនបានចូលរួមប្រកួតប្រជែងបោះឆ្នោត ឃុំ តែគាត់ត្រៀមចូលរួមបោះឆ្នោតជ្រើសរើសតំណាងរាស្ត្រវិញ។
សម្តេចតេជោបានមានប្រសាសន៍ថា “អីចឹងខ្ញុំមិនធ្វើការឃោសនានោះទេ ប៉ុន្តែសូមកុំឱ្យមានហិង្សាឱ្យសោះ នៅក្នុងដំណើរការបោះឆ្នោតនៅកម្ពុជា មិនថាហិង្សាទៅវ៉ៃតប់គ្នា ឬហិង្សាពាក្យសំដីនោះទេ”។
សម្តេចតេជោបានអះអាងថាបរិយាកាសនយោបាយអព្យាក្រឹត្យពិតជាចាំបាច់ធ្វើសកម្មភាពនូវការឃោសនាបោះឆ្នោត ដែលអាជ្ញាធរគ្រប់លំដាប់ថ្នាក់ត្រូវបង្កលក្ខខណៈសម្បត្តិដល់គណបក្សនយោបាយទាំងអស់ឱ្យមានគ្រប់ៗគ្នា។
ទន្ទឹមនេះ សម្ដេចតេជោបានលើកជាឧទាហរណ៍ថា បើគណបក្សប្រជាជនធ្វើការជួបជុំនៅកន្លែងណាមួយ គណបក្សផ្សេងក៏មានសិទ្ធិធ្វើការជួបគ្នានៅកន្លែងនោះដែរ ពោលគឺទាំងគណបក្សកាន់អំណាច និងគណបក្សមិនកាន់អំណាចអាចធ្វើបានដូចគ្នា។
សម្តេចតេជោបន្ដថា ការធ្វើបែបនេះគឺបរិយាកាសនយោបាយស្ងប់ស្ងាត់នៅក្នុងពេលបោះឆ្នោត ហើយជាការប្រកួតប្រជែងមួយសម្រាប់ការគ្រប់គ្រងបន្តនៅមូលដ្ឋាន។
ជាមួយគ្នានោះដែរ សម្តេចតេជោក៏បានបន្ថែមថាសម្រាប់ថ្ងៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ គឺនៅថ្ងៃទី២១ ខែឧសភា ដែលសម្តេចនឹងចេញដំណើរទៅក្រៅប្រទេស ហើយថ្ងៃទី២៦ ខែឧសភា ឆ្នាំ២០២២ សម្តេចនឹងត្រឡប់មកវិញ៕
