ឯកឧត្ដមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ នៅព្រឹកថ្ងៃទី១៩ ខែមេសា ឆ្នាំ២០២២នេះ បានអញ្ជើញបើកកិច្ចប្រជុំស្តីពីវឌ្ឍនភាពការចាកវ៉ាក់សាំងការពារជំងឺកូវីដ-១៩ ក្នុងខេត្តត្បូងឃ្មុំ ក្នុងនោះ ក៏មានការអញ្ជើញចូលរួមពី ឯកឧត្តម លោកជំទាវ អភិបាលរងខេត្ត ប្រធាន/អនុប្រធានមន្ទីរ អភិបាលស្រុក/ក្រុងទាំង៧ ប្រធានប្រតិបត្តិស្រុក/ក្រុងទាំង៧នៃមន្ទីរសុខាភិបាល និងអ្នកពាក់ព័ន្ធជាច្រើនរូបទៀត។
មានប្រសាសន៍នាឱកាសនោះ ឯកឧត្ដមបណ្ឌិត ជាម ច័ន្ទសោភ័ណ បានថ្លែងអំណរគុណយ៉ាងជ្រាលជ្រៅជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ចំពោះភាពជោគជ័យនៃយុទ្ធសាស្ត្រវ៉ាក់សាំងនិងយុទ្ធនាការប្រយុទ្ធទប់ស្កាត់កូវីដ-១៩ របស់សម្តេចដោយជឿជាក់យ៉ាងមុតមាំ លើចលនាជាតិ ក្រោមមគ្គុទេ្ទសក៏ដ៏ឈ្លាសវៃរបស់សម្តេចតេជោ ហ៊ុន សែន ថាយើងពិតជាប្រយុទ្ធឈ្នះកូវីដ-១៩ ដើម្បីអនាគតភ្លឺស្វាងរបស់ប្រទេសជាតិ និងប្រជាជនក្នុងខេត្តត្បូងឃ្មុំ យើងជាក់ជាមិនខាន។
ឯកឧត្តមបណ្ឌិត បានធ្វើការអរគុណចំពោះកិច្ចខិតខំប្រឹងប្រែងរបស់អាជ្ញាធរគ្រប់លំដាប់ថ្នាក់ ដែលតែងតែយកចិត្តទុកដាក់ ក្នុងការសម្រសម្រួល ដល់យុទ្ធការចាក់វ៉ាក់សាំងជូនប្រជាពលរដ្ឋមិនថាថ្ងៃឈប់សម្រាក់។
ឯកឧត្តមបណ្ឌិត អភិបាលខេត្ត បានធ្វើការអំពាវនាវ ដល់កុមារនិងយុវវ័យដែលមានអាយុចាប់ពី៣ឆ្នាំ ឡើងទាំងអស់ ទូទាំងខេត្តត្បូងឃ្មុំ ក្រោយទទួលបានការចាក់សាំងការពារជំងឺកូវីដ១៩រួចហើយ ត្រូវបន្តចូលរួមប្រកាន់ភ្ជាប់ នូវវិធានការ ”៣ការ ពារ ៣កុំ” របស់ប្រមុខរាជរដ្ឋាភិបាលឱ្យបានខ្ជាប់ខ្ជួន ដើម្បីទប់ស្កាត់ការឆ្លងរីករាលដាលនៅភូមិសាស្រ្តខេត្តត្បូងឃ្មុំបន្តទៀត។
ឯកឧត្តមបណ្ឌិត ជាម ច័ន្ទសោភ័ណ បានផ្ដាំផ្ញើដល់អាជ្ញាធរមូលដ្ឋាន ជួយផ្សព្វផ្សាយពីយុទ្ធនាការចាក់វ៉ាក់សាំងកូវីដ១៩ របស់ក្រុមគ្រូពេទ្យស្រុកប្រតិបត្តិ និងក្រុមគ្រូពេទ្យរបស់ឯកឧត្តម ហ៊ុន ម៉ានី ចាក់ជូនដល់ប្រជាពលរដ្ឋដែលមិនទាន់ចាក់ដូសជំរុញ រឺដូសទី១ សូមអញ្ជើញពួកគាត់មកទទួលការចាក់វ៉ាក់សាំងឱ្យបានគ្រប់គ្នាផងដែរ។
បើតាមការបញ្ជាក់ពីលោក កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ បានឱ្យដឹងថា គិតត្រឹមថ្ងៃទី១៨ ខែមេសា ឆ្នាំ២០២២ ខេត្តត្បូងឃ្មុំ មានប្រជាពលរដ្ឋចាក់វ៉ាក់សាំងការពារជំងឺកូវីដ១៩ លើកទី១មានចំនួនសរុប៦២២ ៧៩៤នាក់ ចាក់លើកទី២មានចំនួនសរុប ៥៧៦ ៩២៦នាក់ ចាក់លើកទី៣ មានចំនួនសរុប២៧៧ ៤០៤នាក់ ចាក់លើកទី៤ មានចំនួនសរុប១៣៤ ៩៧នាក់។ក្នុងនោះ កុមារអាយុ០៣ដល់ក្រោម០៥ឆ្នាំ ចាក់លើកទី១ សរុបចំនួន១១ ៤៩៤នាក់ផងដែរ៕
