ប្រទេសថៃ៖ គ្រោះថ្នាក់ចរាចរណ៍បានឆក់យកជីវិតមនុស្ស ២៧៨នាក់ក្នុងពិធីបុណ្យសង្ក្រាន្តឆ្នាំថ្មី

លោក Nirat Pongsitthithaworn អនុលេខាធិការអចិន្ត្រៃយ៍មហាផ្ទៃរបស់ប្រទេសថៃបាននិយាយកាលពីថ្ងៃទី១៨ ខែមេសាថា គ្រោះថ្នាក់ចរាចរណ៍នៅប្រទេសថៃបានកើតឡើងចំនួន ១៩១៧ ករណីដែលបានបណ្តាលឱ្យមនុស្សចំនួន ២៧៨នាក់ស្លាប់ និង១ ៨៦៩នាក់ផ្សេងទៀតរងរបួសក្នុងអំឡុងរយៈពេលប្រាំពីរថ្ងៃនៃយុទ្ធនាការសុវត្ថិភាពចរាចរណ៍ផ្លូវគោករបស់រដ្ឋាភិបាលថៃសម្រាប់ពិធីបុណ្យសង្រ្កានឆ្នាំថ្មី ចាប់ពីថ្ងៃទី១១ ដល់ថ្ងៃទី១៧ ខែមេសា។

លោក Nirat បានប្រាប់សារព័ត៌មានក្នុងស្រុកថា ខេត្តឈៀងរ៉ៃមានគ្រោះថ្នាក់ចរាចរណ៍ច្រើនជាងគេដោយមានចំនួន ៦៦ករណី។ ខេត្តឈៀងម៉ៃមានអ្នករបួសច្រើនជាងគេបំផុត ដោយមានចំនួន ៦៣នាក់ ហើយទីក្រុងបាងកកបានកត់ត្រាចំនួនអ្នកស្លាប់ច្រើនជាងគេដោយមានចំនួន ១៣នាក់។ ខេត្តចំនួនប្រាំមួយដែលរួមមានខេត្តណាផានុម ខេត្តប៉ាតានី ខេត្តយ៉ាឡា ខេត្តរ៉ាណុង ខេត្តសាមុតសាខន និងខេត្តស៊ីងបុរី មិនមានកត់ត្រាអ្នកស្លាប់ដោយសារគ្រោះថ្នាក់ចរាចរណ៍ក្នុងអំឡុងពេលនេះទេ។

លោក Boontham Lertsukkheekasem អគ្គនាយកនៃនាយកដ្ឋានបង្ការ និងកាត់បន្ថយគ្រោះមហន្តរាយ បាននិយាយថា ចំនួនគ្រោះថ្នាក់ និងអ្នករងរបួសមានការថយចុះ ប៉ុន្តែករណីស្លាប់នៅតាមដងផ្លូវមានការកើនឡើងក្នុងរយៈពេលដូចគ្នាកាលពីឆ្នាំមុន។

ស្ថិតិបានបង្ហាញថា ក្នុងអំឡុងពេលនៃពិធីបុណ្យសង្រ្កានឆ្នាំថ្មីក្នុងឆ្នាំ២០២១ ប្រទេសថៃបានកត់ត្រាគ្រោះថ្នាក់ចរាចរណ៍សរុបចំនួន ២ ៣៦៥ករណីដែលបានឆក់យកជីវិតមនុស្សចំនួន ២៧៧នាក់ និងអ្នករងរបួសចំនួន ២ ៣៥៧ នាក់។ ការបើកបរហួសល្បឿនកំណត់ គឺជាមូលហេតុធំបំផុតនៃគ្រោះថ្នាក់ទាំងនោះ (៣២,០១ភាគរយ) បន្ទាប់មកគឺការបើកបរក្នុងស្ថានភាពស្រវឹង (២៨,២៩ភាគរយ) និងការជិះខុសគន្លងផ្លូវ (១៨,២៧ភាគរយ)។

នៅក្នុងករណីគ្រោះថ្នាក់ទាំងនោះ មានករណីម៉ូតូចំនួន ៨៦,០១ភាគរយ បន្ទាប់មករថយន្តដឹកទំនិញ (៦,១៧ភាគរយ) និងរថយន្ត (២,៦៧ភាគរយ) ។

នៅមុនពេលពិធីបុណ្យសង្ក្រាន្តឆ្នាំថ្មីក្នុងឆ្នាំនេះ ប្រទេសថៃបានកំណត់គោលដៅសម្រាប់ខេត្តនីមួយៗ ដើម្បីកាត់បន្ថយចំនួនគ្រោះថ្នាក់ ករណីស្លាប់ និងរបួសដោយគ្រោះថ្នាក់ចរាចរណ៍ឱ្យបានយ៉ាងហោចណាស់ ៥ភាគរយ បើធៀបទៅនឹងអត្រាជាមធ្យមក្នុងពិធីបុណ្យក្នុងរយៈពេល ៣ឆ្នាំកន្លងមក៕(ប្រភព VNA បកប្រែដោយលោក យា ចិន្តាខន្តី)