រដ្ឋមន្ត្រីក្រសួងហិរញ្ញវត្ថុឥណ្ឌណេស៊ី លោកស្រី Sri Mulyani Indrawati បាននិយាយថា ប្រទេសឥណ្ឌូណេស៊ីនឹងត្រៀមទុកថវិកាចន្លោះពី ២៧ទ្រីលានរូពៀទៅ ៣០ទ្រីលានរូពៀ (ពី ១,៨៨ ទៅ ២ប៊ីលានដុល្លារអាម៉េរិក) នៅឆ្នាំក្រោយសម្រាប់ការអភិវឌ្ឍរដ្ឋធានីថ្មីរបស់ប្រទេសនេះ។
ថ្លែងនៅក្នុងសន្និសីទសារព័ត៌មានមួយកាលពីថ្ងៃទី១៤ ខែមេសា លោកស្រីរដ្ឋមន្ត្រីបាននិយាយថា ថវិកានេះនឹងត្រូវចំណាយទៅលើហេដ្ឋារចនាសម្ព័ន្ធមូលដ្ឋាន ការិយាល័យ សាលារៀន និងបរិក្ខារពេទ្យ និងការចំណាយទាក់ទងនឹងសន្តិសុខនៅក្នុងរដ្ឋធានីថ្មី។
បើទោះបីជាមានការរឹតបន្តឹងសារពើពន្ធក៏ដោយ ក៏ឥណ្ឌូណេស៊ីនឹងត្រៀមថវិកាពី ៣៦៧ទ្រីលានរូពៀ ដល់ ៤០២ទ្រីលានរូពៀសម្រាប់ការចំណាយទៅលើហេដ្ឋារចនាសម្ព័ន្ធនៅទូទាំងប្រទេសនៅក្នុងឆ្នាំក្រោយ។
ប្រធានាធិបតីឥណ្ឌូណេស៊ី លោក ចូកូ វីដូដូ មានគោលបំណងផ្លាស់ប្តូររដ្ឋធានីមុនពេលបញ្ចប់អាណត្តិរបស់លោកនៅក្នុងឆ្នាំ២០២៤។ សភាឥណ្ឌូណេស៊ីបានអនុម័តច្បាប់ផ្លាស់ប្តូររដ្ឋធានីរបស់ប្រទេសនេះពីរដ្ឋធានីហ្សាការតាទៅកាន់រដ្ឋធានីកាលីម៉ាន់តាន់នៅលើកោះបូណេអូកាលពីខែមករាកន្លងទៅ ដោយបង្កើតមូលដ្ឋានច្បាប់មួយដើម្បីអនុវត្តគម្រោងនេះ។
រដ្ឋធានីថ្មីនេះនឹងត្រូវបានគេហៅថា «នូសាន់តារ៉ា» ឬប្រជុំកោះក្នុងន័យជាភាសាអង់គ្លេស ដែលវាត្រូវបានជ្រើសរើសដោយលោកប្រធានាធិបតី។
វានឹងក្លាយជាមជ្ឈមណ្ឌលរដ្ឋាភិបាល ខណៈដែលទីក្រុងហ្សាការតាដែលមានប្រជាជនជាង ១០លាននាក់នឹងនៅតែជាមជ្ឈមណ្ឌលពាណិជ្ជកម្ម និងសេដ្ឋកិច្ចរបស់ប្រទេសឥណ្ឌូណេស៊ីដែលជាប្រទេសសេដ្ឋកិច្ចធំបំផុតរបស់តំបន់អាស៊ីអាគ្នេយ៍៕(ប្រភព VNA បកប្រែដោយលោក យា ចិន្តាខន្តី)
