វេជ្ជបណ្ឌិត Anas Alam Faizli នាយកប្រតិបត្តិក្រុមហ៊ុន ProtectHealth បាននិយាយថា បច្ចុប្បន្ននេះ ខណៈដែលប្រទេសម៉ាឡេស៊ីចាត់ទុកជំងឺកូវីដ-១៩ ថាជាជំងឺឆ្លង ដូច្នេះវាជាការសំខាន់ណាស់ក្នុងការបន្តផ្តល់កិច្ចការពារដ៏ល្អប្រសើរសម្រាប់ក្រុមងាយរងគ្រោះបំផុត ដែលរួមទាំងក្រុមមនុស្សចាស់ និងបុគ្គលដែលមានហានិភ័យខ្ពស់ក្នុងការឆ្លង។
លោកបាននិយាយបន្តថា ផែនការនៃការចាក់វ៉ាក់សាំងដូសជំរុញទីពីរ គឺជាកិច្ចខិតខំប្រឹងប្រែងមួយក្នុងចំណោមកិច្ចខិតខំប្រឹងប្រែងនានា ជាពិសេសនៅពេលពិធីបុណ្យហារីរ៉ាយ៉ា ដែលជាពិធីបុណ្យដ៏ធំបំផុតរបស់សាសនាឥស្លាមខិតជិតមកដល់ក្នុងពេលឆាប់ៗនេះ។
នាយកប្រតិបត្តិរបស់ក្រុមហ៊ុន ProtectHealth ផ្តល់ដំបូន្មានដល់បុគ្គលដែលមានហានិភ័យខ្ពស់ដើម្បីការការពារខ្លួនពីមេរោគឆ្លងជំងឺនេះ ដោយឱ្យពួកគេទៅទទួលការចាក់វ៉ាក់សាំងដូសជំរុញទីពីរ។
រដ្ឋមន្ត្រីក្រសួងសុខាភិបាលរបស់ប្រទេសម៉ាឡេស៊ី លោក Khairy Jamaluddin បានប្រកាសកាលពីថ្ងៃទី១៤ ខែមេសាថា អ្នកដែលមានអាយុលើសពី ៦០ឆ្នាំដែលមានជំងឺប្រចាំកាយដូចជា ជំងឺទឹកនោមផ្អែម ជំងឺសួតរ៉ាំរ៉ៃ ជំងឺតម្រងនោមរ៉ាំរ៉ៃ ការលាងឈាម ឬជំងឺថ្លើមរ៉ាំរ៉ៃ ក៏ដូចជាបុគ្គលនៅតាមមណ្ឌលថែទាំតាមផ្ទះសម្រាប់រយៈពេលវែងដែលងាយនឹងឆ្លងជំងឺកូវីដ-១៩ ឥឡូវនេះអាចទទួលការចាក់វ៉ាក់សាំងដូសជំរុញទីពីរបានបន្ទាប់ពីរយៈពេលពី ៤ខែទៅ ៦ខែ នៃការចាក់វ៉ាក់សាំងដូសជំរុញទីមួយ។
វ៉ាក់សាំងដែលនឹងត្រូវប្រើសម្រាប់ការចាក់ដូសជំរុញទីពីរនេះ គឺវ៉ាក់សាំង Pfizer-BioNTech ។
លោក Anas បាននិយាយថា មនុស្សចាស់ដែលមានសុខភាពល្អ និងមានអាយុលើសពី ៦០ឆ្នាំដោយគ្មានជំងឺ អាចទទួលការចាក់វ៉ាក់សាំងដូសជំរុញទីពីរបានតាមការណែនាំរបស់គ្រូពេទ្យជំនាញប៉ុណ្ណោះ។
លោកបាននិយាយថា ក្មេងជំទង់ដែលមានអាយុ ១២ឆ្នាំដែលមានជំងឺមហារីក ឬការលាងឈាមរយៈពេលវែង អាចទទួលបានការចាក់វ៉ាក់សាំងដូសជំរុញបានយ៉ាងហោចណាស់ក្នុងរយៈពេល ២៨ថ្ងៃបន្ទាប់ពីបញ្ចប់នៃការចាក់វ៉ាក់សាំងដូសមូលដ្ឋានទីពីរ៕(ប្រភព VNA បកប្រែដោយលោក យា ចិន្តាខន្តី) 
