កណ្តាល៖ នៅល្ងាចថ្ងៃសៅរ៍ ១៥កើត ខែចេត្រ ឆ្នាំខាល ចត្វាស័ក ព.ស. ២៥៦៥ ត្រូវនឹង ថ្ងៃទី១៦ ខែមេសា ឆ្នាំ២០២២នេះ
លោក ចាប ច័ន្ទវិទ្យា អភិបាលនៃគណៈអភិបាលស្រុកលើកដែក បានថ្លែងប្រាប់ឲ្យភ្នាក់ព័ត៌មាន The Mirror News ដឹងថា «ក្ក្នុងរយៈពេល៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរនេះ នៅទូទាំងស្រុកលើកដែកគឺចំពោះការងារ សន្តិសុខ សណ្តាប់ធ្នាប់ សុវត្ថិភាព ចរាចរណ៍មានភាពល្អប្រសើរ មិនមានបាតុភាពកើតឡើងនោះទេ»។
លោកអភិបាលស្រុកបានថ្លែងបន្តថា «រយៈពេល៣ថ្ងៃមកនេះ ក៏មិនមានបទល្មើសណាមួយកើតឡើងនោះទេក្នុងមូលដ្ឋានស្រុកលើកដែកដែរ» ។ លោកបន្តទៀត បើនិយាយពីបញ្ហាចរាចរណ៍ មុនពេលបុណ្យចូលឆ្នាំប្រពៃណីខ្មែរចូលមកដល់៣ថ្ងៃ ចរាចរណ៍មានភាពមមាញឹក ប៉ុន្តែមិនបង្កឲ្យស្ទះផ្លូវ និងគ្រោះថ្នាក់ចរាចរណ៍កើតឡើងនោះទេ ដោយសារគណៈបញ្ជាការឯកភាពស្រុករួមជាមួយកងកម្លាំងទាំង៣ប្រភេទ បានយកចិត្តទុកដាក់ខ្ពស់លើគោលដៅទទួលខុសត្រូវ តាមភូមិសាស្ត្រដែលបានកំណត់។
ជាមួយគ្នានោះដែរ លោក ចាប ច័ន្ទវិទ្យា អភិបាលនៃគណៈអភិបាលស្រុកលើកដែកក៏បានគូសបញ្ជាក់ដែរថា «ចំពោះសតិអារម្មណ៍ប្រជាពលរដ្ឋ គឺមានភាពសប្បាយរីករាយពោរពេញដោយស្នាមញញឹម ពិសេសគឺគាត់បានជួបជុំសាច់ញាតិ ក្រុមគ្រួសារ ដែលកន្លងមកយើងខកខានមិនបានប្រារព្ធពិធីបុណ្យចូលឆ្នាំ ២ឆ្នាំមកហើយ ហើយនេះសរបញ្ជាក់ឲ្យឃើញច្បាស់នៅអ្វីដែលជាការខិតខំរបស់ប្រមុខរាជរដ្ឋាភិបាល ដែលដឹកនាំដោយសម្តេចតេជោនាយករដ្ឋមន្ត្រី ដែលនាំយកការបានចាក់វ៉ាក់សាំងស្រោចពេញប្រទេស ដែលបានធ្វើឲ្យសេដ្ឋកិច្ចកម្ពុជាបានបើកដំណើរការវិញកាលពីខែវិច្ឆិកាឆ្នាំ២០២១កន្លងទៅនេះ ដែលនេះជាសាក្ខីភាពឆ្លុះបញ្ចាំងឲ្យឃើញកាន់តែច្បាស់នូវលទ្ធផលនៃការទទួលបានវ៉ាក់សាំងគ្រប់ដូស រួមនិងការអនុវត្តវិធាន ៣ការពារ ៣កុំ»។
លោក ចាប ច័ន្ទវិទ្យា បានបន្តថ្លែងយ៉ាងដូច្នេះទៀតថា ជំនួសមុខឲ្យប្រជាពលរដ្ឋទូទាំងស្រុកលើកដែក លោកសូមសំណូមពរដល់បងប្អូនប្រជាពលរដ្ឋទូទាំងស្រុក មេត្តាគោរពច្បាប់ចរាចរណ៍ បើកបរប្រកបដោយការទទួលខុសត្រូវ និងមានការយោគយល់អធ្យាស្រ័យគ្នាទៅវិញទៅមក សូមទៅទទួលយកការចាក់វ៉ាក់សាំងដែលជាដូសមូលដ្ឋាន និងដូសជំរុញ និងសូមបន្តឲ្យអនុវត្តវិធានសុខាភិបាល និងវិធានការ ៣ការពារ ៣កុំ។
លោកអភិបាលស្រុកសូមអរគុណសន្តិភាព និងបន្តអំពាវនាវសូមឲ្យប្រជាពលរដ្ឋចូលរួមថែរក្សាសុខសន្តិភាពដែលទទួលបានដូចសព្វថ្ងៃក្រោមមគ្គុទេសឯក បិតាស្ថាបនិកសុខសន្តិភាព គឺសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ និងរួមគ្នាដើម្បីអភិវឌ្ឍប្រទេសជាតិឆ្ពោះទៅកាន់ភាពរីកចំរើនបន្តថែមទៀត៕
