មន្ទីរកសិកម្មខេត្តបាត់ដំបងបានចងក្រងជាបណ្តុំសហគមន៍ចិញ្ចឹមមាន់ សម្រាប់ផ្គត់ផ្គង់ទីផ្សារ ដើម្បីជួយបង្កើនប្រាក់ចំណូលក្នុងគ្រួសារ និងកាត់បន្ថយការនាំចូល ។
លោក អ៊ិន សុវណ្ណមុន្នី អនុប្រធានមន្ទីរកសិកម្ម រុក្ខា ប្រមាញ់ និងនេសាទខេត្តបាត់ដំបង និងជាអនុប្រធានគ្រប់គ្រងអនុកម្មវិធីASPIRE ខេត្តបាត់ដំបង បានមានប្រសាសន៍ថា ការចងក្រងជាបណ្តុំសហគមន៍ចិញ្ចឹមមាន់នេះ សង្កេតឃើញថាបងប្អូនប្រជាកសិករមួយចំនួនមានការ រីកចម្រើនពីមួយថ្ងៃទៅមួយថ្ងៃ ដោយគាត់បានជោគជ័យក្នុងការចិញ្ចឹម ធ្វើឱ្យប្រជាកសិករមានជីវភាពប្រសើរជាងមុន ។
លោកបានបន្តថា មន្រ្តីជំនាញ របស់មន្ទីរបានសហការជាមួយគម្រោងដៃគូអភិវឌ្ឍន៍ ក្នុងការផ្តល់បច្ចេកទេសថ្មីដែលធន់នឹងការប្រែប្រួលអាកាសធាតុ ដើម្បីបង្កើនការចងក្រងបណ្តុំសហគមន៍ចិញ្ចឹមមាន់បន្ថែមទៀត តាមលក្ខណៈបច្ចេកទេសត្រឹមត្រូវក្នុងការជ្រើសរើសពូជ ការប្រើប្រាស់វ៉ាក់សាំងសម្រាប់ការពារជំងឺផ្សេងៗ ចេះប្រើប្រាស់ជីវសុវត្ថិភាពក្នុងការបាញ់សម្លាប់មេរោគនៅពេលចិញ្ចឹម នឹងជួយពួកគាត់ឱ្យមានទីផ្សារលក់មានតម្លៃខ្ពស់ ។
« មាន់មានការកើនឡើងមែនទែន ទាំងទូភ្ញាស់ ពង្រីកកន្លែងដែលភ្ញាស់កូនមាន់ ចែកចាយលក់នៅក្នុងតំបន់ នៅក្នុងសមាជិកពួកគាត់មានតម្លៃទាបជាងអ្នកដទៃយើងប្រើយុទ្ធសាស្រ្តហ្នឹង ហើយយើងបានផ្តល់កូនមាន់បន្ថែមទៅដល់សមាជិកចិញ្ចឹម » ។
លោកបន្ថែមថា ការចងក្រងជាបណ្តុំសហគមន៍ចិញ្ចឹមមាន់ ពិតជាបានធ្វើឱ្យពួកគាត់អាចទទួល បានទាំងបទពិសោធន៍ បច្ចេកទេសក្នុងការចិញ្ចឹមបានត្រឹមត្រូវ មានស្តង់ដារនិងទទួល បានប្រាក់ចំណូលច្រើនពីមុខរបរមួយនេះ សម្រាប់លើកកម្ពស់ជីវភាពគ្រួសារហើយមន្ទីរសង្ឃឹម ថានៅឆ្នាំក្រោយៗប្រជាកសិករនឹង ពង្រីកការចិញ្ចឹមរបស់ពួកគាត់បន្ថែមទៀត ។
សូមបញ្ជាក់ថា មកទល់ពេលនេះបណ្តុំសហគមន៍ចិញ្ចឹមមាន់សរុបនៅទូទាំងខេត្តបាត់ដំបងមានចំនួនប្រហែលពី៣០ទៅ ៤០បណ្តុំ ៕
