ក្នុងឆ្នាំ២០២២នេះ មន្ទីរកសិកម្មខេត្តបាត់ដំបងបន្តចងក្រងបណ្តុំសហគមន៍ដាំដុះឬស្សីទំពាំងផ្អែមបាន២បណ្តុំ ដើម្បីផ្គត់ផ្គង់តម្រូវការបរិភោគប្រចាំថ្ងៃរបស់ប្រជាកសិករ និងយកទៅលក់លើទីផ្សារបង្កើនប្រាក់ ចំណូល។
លោក អ៊ិន សុវណ្ណមុន្នី អនុប្រធានមន្ទីរកសិកម្ម រុក្ខា ប្រមាញ់និងខេត្តបាត់ដំបង បានឱ្យដឹងថា មន្ទីរបានចងក្រងបណ្តុំកសិកម្មប្ញស្សីទំពាំងផ្អែមបានចំនួន២បណ្តុំ មានសមាជិកជាង១០០គ្រួសារ ដែលស្ថិតនៅស្រុកបវេល និងនៅស្រុកសំពៅលូន ហើយការចងក្រងឲ្យសហគមន៍នាំគ្នាដាំប្ញស្សីទំពាំងផ្អែមនេះ ព្រោះកំពុងមានតម្រូវការទីផ្សារ និងបានបង្កើន ប្រាក់ចំណូលសម្រាប់ប្រជាសហគមន៍ ស្របពេលដែលរាជរដ្ឋាភិបាលកម្ពុជាកំពុងជំរុញឱ្យមានការធ្វើកសិកម្មក្នុងប្រទេសឱ្យកាន់តែច្រើន ។
លោកបានបន្តថា បច្ចុប្បន្ននេះទីផ្សារប្ញស្សីទំពាំងផ្អែមមានការពេញនិយមពីអ្នកបរិភោគក្នុងស្រុក និងកំពុងមានតម្លៃខ្ពស់ គឺនៅរដូវប្រាំងអាចលក់បានជាង ១ម៉ឺនរៀលក្នុងមួយគីឡូក្រាម ហើយរដូវវស្សាលក់បានពី ៥ពាន់រៀលទៅ ៨ពាន់រៀល ក្នុងមួយគីឡូក្រាម ។
«ការដាំប្ញស្សីទំពាំងផ្អែមនេះគឺដាំក្នុងព្រៃសហគមន៍ យើងឱ្យគាត់ដាំបន្ថែមដោយខាងមន្ទីរបានផ្តល់នូវអណ្តូងទឹកសម្រាប់ស្រោចស្រពទំពាំងបន្ថែមទៀត ។មួយវិញទៀតយន្តការដែលយើងឱ្យដាំចម្រុះឱ្យជួយមើលថែទាំដោយទាញយកអនុផលព្រៃឈើផងនិងពីឬស្សីទំពាំងផងយកមកលក់ជាបន្លែធម្មជាតិនៅទីផ្សារ»។
លោកបានបន្ថែមថា ការដាំប្ញស្សីទំពាំងផ្អែមនេះ ក៏បានជួយការពារដី កុំឱ្យទឹកហូរច្រោះនិងរក្សាបាននូវភាពបៃតងជាប់ជានិច្ច ដំណាំប្ញស្សីទំពាំងផ្អែម វាមានភាពងាយស្រួលដាំ និងងាយថែទាំជាងដំណាំផ្សេងៗ ដោយ មានការលូតលាស់ អាចទាញយកផលទំពាំងបានគ្រប់រដូវកាល។
សូមបញ្ជាក់ថា មន្ទីរកសិកម្មខេត្តបាត់ដំបងបានផ្តល់ពូជប្ញស្សីទំពាងផ្អែមដល់សហគមន៍កសិកម្មដាំដុះប្ញស្សីទំពាំងផ្អែមនៅស្រុកបវេលនិងស្រុកសំពៅលូន ដែល បានដាំដុះលើផ្ទៃដីសហគមន៍ក្នុងតំបន់ការពារជិត៤ហិកតា៕
