កាលពីថ្ងៃទី១ ខែមេសា គម្រោងកំដៅនុយក្លេអ៊ែរពាណិជ្ជកម្មមួយដែលត្រូវបានបើកដំណើរការដោយក្រុមហ៊ុនសាជីវកម្មវិនិយោគថាមពលរដ្ឋលីមីតធីត (SPIC) បានបំពេញភារកិច្ចនៃការធានាកំដៅសម្រាប់អ្នករស់នៅទីក្រុងហៃយ៉ាងដែលជាទីក្រុងកម្រិតស្រុកមួយនៅក្នុងខេត្តសាងដុងនៅភាគខាងកើតប្រទេសចិន ដោយក្នុងអំឡុងពេលនៃរដូវកាលកំដៅដំបូងចាប់តាំងពីវាមកត្រូវបានដាក់ឱ្យដំណើរការមក ដែលធ្វើឱ្យទីក្រុងហៃយ៉ាងក្លាយជាទីក្រុងដំបូងគេរបស់ប្រទេសចិនដែលរីករាយនឹងរដូវរងាជាមួយនឹងកំដៅដោយគ្មានឧស្ម័នកាបូនិច។
ក្នុងអំឡុងពេលនៃរដូវកំដៅនោះ គម្រោងនេះបានផ្គត់ផ្គង់កំដៅដល់អ្នកប្រើប្រាស់ពីគ្រប់តំបន់ក្នុងទីក្រុងក្នុងលក្ខណៈបន្ត និងស្ថេរភាពសម្រាប់រយៈពេល ១៤៣ថ្ងៃ ជាមួយនឹងសេវាកម្មដែលគ្របដណ្តប់លើផ្ទៃដីប្រមាណជិត ៥លានម៉ែត្រក្រឡា និងផ្តល់អត្ថប្រយោជន៍ដល់អ្នករស់នៅក្នុងទីក្រុងហៃយ៉ាងចំនួន ២០០ ០០០នាក់។ ទន្ទឹមនឹងនេះដែរ សូចនាករនៃការអនុវត្តផ្សេងៗទៀតនៃគម្រោងបានឈានដល់តម្រូវកាសម្រាប់ការររចនា ហើយប្រព័ន្ធទាំងមូលនៃគម្រោងដំណើរការបានយ៉ាងល្អ។
វាត្រូវបានគេជឿជាក់ថា គម្រោងនេះបានផ្តល់នូវគ្រោងការណ៍កំដៅនុយក្លេអ៊ែរដំបូងសម្រាប់ទីក្រុងកម្រិតស្រុកមួយនេះទាំងមូល ដែលអាចអនុវត្តតាម និងផ្សព្វផ្សាយនៅក្នុងទីក្រុងផ្សេងៗទៀតនៅទូទាំងប្រទេសចិន ដែលតំណាងឱ្យការរួមចំណែកដ៏សំខាន់ដល់ការសម្រេចបាននូវកំដៅស្អាតនៅភាគខាងជើងប្រទេសចិន។
គម្រោងកំដៅនុយក្លេអ៊ែរនៅទីក្រុងហៃយ៉ាងបានទទួលការសរសើរយ៉ាងទូលំទូលាយពីអ្នកស្រុក។ យោងទៅតាមអ្នកស្រុកទាំងនោះបានឱ្យដឹងថា សីតុណ្ហភាពនៅក្នុងបន្ទប់នៅតាមផ្ទះរបស់ពួកគេមានស្ថេរភាពល្អ ដែលផ្តល់ភាពកក់ក្តៅគ្រប់គ្រាន់សម្រាប់មនុស្សចាស់ និងកុមារ។ គម្រោងកំដៅនុយក្លេអ៊ែរមិនត្រឹមតែជួយពន្យារពេលសម្រាប់រដូវកំដៅប៉ុណ្ណោះទេ ប៉ុន្តែវាថែមទាំងជួយកាត់បន្ថយថ្លៃកំដៅទៀតផង។
អ្នកស្រុកម្នាក់បាននិយាយថា «គម្រោងកំដៅនុយក្លេអ៊ែរគ្មានការបំពុលបានធ្វើឱ្យយើងឈប់ពឹងផ្អែកទៅលើការប្រើប្រាស់ធ្យូងថ្មសម្រាប់កំដៅ ហើយយើងពិតជាទទួលបានអត្ថប្រយោជន៍ពីការអភិវឌ្ឍថាមពលនុយក្លេអ៊ែរនេះ»។
គម្រោងនេះបានចាត់វិធានការជាច្រើនដើម្បីធានាសុវត្ថិភាពនៃការផ្គត់ផ្គង់កំដៅ រួមទាំងការសាងសង់របាំងដាច់ដោយឡែកជាច្រើនដើម្បីប្រាកដថាមិនមានទំនាក់ទំនងដោយផ្ទាល់រវាងរោងចក្រថាមពលនុយក្លេអ៊ែរ និងអ្នកប្រើប្រាស់ចុងក្រោយ និងការប្រើប្រាស់ឧបករណ៍ត្រួតពិនិត្យតាមអ៊ីនធើណេតដើម្បីធានាថា ដំណើរការនៃការផ្គត់ផ្គង់កំដៅ គឺពិតជាមានសុវត្ថិភាព៕(ប្រភព BRNN បកប្រែដោយលោក យា ចិន្តាខន្តី)
