ក្រសួងព័ត៌មាន វប្បធម៌ និងទេសចរណ៍របស់ប្រទេសឡាវ កាលពីថ្ងៃទី៤ ខែមេសា បានដាក់ចេញនូវបម្រាមចំពោះសកម្មភាពដែលមានហានិភ័យខ្ពស់នៃការឆ្លងជំងឺកូវីដ-១៩ ក្នុងឱកាសពិធីបុណ្យចូលឆ្នាំថ្មីប្រពៃណីរបស់ប្រទេសនេះនាពេលខាងមុខ។
យោងតាមសេចក្តីសម្រេចនេះបានឱ្យដឹងថា រាល់ការប្រគុំតន្ត្រី ការសម្តែង និងកម្មវិធីនៅទីធ្លាខាងក្រៅទាំងអស់នឹងត្រូវហាមឃាត់រហូតដល់ចុងខែមេសា។
ការហាមប្រាមនេះត្រូវបានដាក់ចេញបន្ទាប់ពីមានការកើនឡើងនៃការឆ្លងថ្មីនៃជំងឺកូវីដ-១៩ ដោយករណីឆ្លងប្រចាំថ្ងៃបានកើនឡើងដល់ជាង ២ ០០០នាក់ក្នុងរយៈពេលប៉ុន្មានសប្តាហ៍ថ្មីៗនេះ។ អាជ្ញាធរឡាវមានការព្រួយបារម្ភថា ចំនួនអ្នកឆ្លងថ្មីអាចនឹងមានការកើនឡើងនៅក្នុងពិធីបុណ្យចូលឆ្នាំប្រពៃណីរបស់ប្រទេសឡាវដែលនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែមេសា។
ខេត្តផ្សេងៗ និងទីក្រុងវៀងចន្ទន៍ ក៏បានដាក់ចេញនូវវិធានការរឹតបន្តឹងផងដែរ។ នៅក្នុងរដ្ឋធានីរបស់ប្រទេសនេះ រដ្ឋបាលទីក្រុងវៀងចន្ទន៍បានហាមប្រាមភ្នាក់ងាររដ្ឋ ស្ថាប័នឯកជន និងបុគ្គលគ្រប់រូបមិនឱ្យរៀបចំពិធីសុំពរជ័យសម្រាប់ឆ្នាំថ្មីទេ។ ប្រជាជនក្នុងតំបន់ក៏ត្រូវបានហាមឃាត់មិនឱ្យលេងជះទឹកដាក់គ្នាទៅវិញទៅមក ដែលជាសកម្មភាពប្រពៃណីក្នុងពិធីបុណ្យចូលឆ្នាំថ្មីផងដែរ។
ក្រសួងសុខាភិបាលឡាវបានរាយការណ៍កាលពីថ្ងៃទី៥ ខែមេសានូវករណីឆ្លងថ្មីនៃជំងឺកូវីដ-១៩ ចំនួន ២ ២៧២នាក់ក្នុងរយៈពេល ២៤ម៉ោង៕(ប្រភព VNA បកប្រែដោយលោក យា ចិន្តាខន្តី)
