មន្រ្តីជាន់ខ្ពស់ក្រសួងសុខាភិបាលក្រើនរំលឹកប្រជាពលរដ្ឋត្រូវរួមគ្នាទប់ស្កាត់ការចម្លងវីរុសកូវីដ-១៩ ក្នុងអំឡុង ពេលបុណ្យចូលឆ្នាំប្រពៃណីជាតិខ្មែរ ខណៈស្ថានភាពជំងឺនេះនៅកម្ពុជា មានភាពធូរ ស្រាលហើយក្តី ប៉ុន្តែមិនត្រូវធ្វេសប្រហែសនោះទេ។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេសបានមានប្រសាសន៍ថា នៅក្នុងឱកាសបុណ្យចូលឆ្នាំប្រពៃណីជាតិខ្មែរ សូមលើកទឹកចិត្តឱ្យមានការចូលរួមរបស់បុគ្គលគ្រួសារនិងសហគមន៍ព្រមទាំងបងប្អូនប្រជាពលរដ្ឋនិងអ្នកពាក់ព័ន្ធទាំងអស់រួមគ្នាបន្តអនុវត្តវិធានការចាំបាច់នានា ដើម្បីសុខភាព រួមទាំងការចម្លងវីរុសកូវីដ១៩ ប្រកបដោយសុវត្ថិភាព និងភាពរីករាយក្នុងក្រុមគ្រួសារ ។ លោកជំទាវបន្ថែមថា បច្ចុប្បន្ននេះ វត្ថមានវីរុសកូវីដ១៩ នៅមិនទាន់ចប់នៅឡើយទេ ពោលការរាតត្បាតនៃជំងឺនេះ នៅលើ
សកលលោកទាំងក្នុងតំបន់ និងនៅតាមបណ្ដាប្រទេសនីមួយៗ គឺមិនទាន់មានការបញ្ចប់នៅឡើយទេ មិនតែប៉ុណ្ណោះ ការវិវឌ្ឍនៃការបំប្លែងខ្លួនថ្មីនៃវីរុសកូវីដ១៩ក៏វានឹងអាចកើតមាន។ ហេតុដូចនេះ លោកជំទាវសូមអំពាវនាវដោយទទូច ដល់ប្រជាពលរដ្ឋទាំងអស់សូមបន្តបង្កើនការប្រុងប្រយ័ត្នខ្ពស់ដោយអនុវត្តឱ្យបានខ្ជាប់ខ្ជួននូវវិធានការសុខាភិបាលនានា។
«ដើម្បីឱ្យការដើរកម្សាន្តរបស់បងប្អូនមានភាពសប្បាយរីករាយ និងចៀសផុតពីការចម្លងនូវជំងឺដង្កាត់ផ្សេងៗ ជាពិសេសឈឺជំងឺកូវីដ១៩នេះ សូមក្រើនរំលឹកនិងអំពាវនាវដ៏ទទូចដល់ប្រជាពលរដ្ឋទាំង អស់ ត្រូវរួមគ្នាបន្តអនុវត្តនូវវិធានការការពារខ្លួនឱ្យបានម៉ត់ចត់ ជាពិសេស ត្រូវចេះរៀនរស់ជាមួយវត្ថមាននៃវីរុសកូវីដ១៩ដោយបន្តការប្រុងប្រយ័ត្ន និងការរស់នៅធម្មតាក្នុងប្រក្រតីភាពថ្មី ដោយត្រូវបន្តអនុវត្តនូវវិធានការ៣ការពារនិង៣កុំឱ្យបានម៉ត់ចត់ជាទីបំផុត។ »
លោកជំទាវក៏បានអំពាវនាវនិងក្រើនរំលឹក ដល់អ្នកដែលបានចាក់វ៉ាក់សាំងកូវីដ-១៩ គ្រប់ដូស សូមរួសរាន់ទៅចាក់វ៉ាក់សាំងកូវីដ-១៩ ដូសមូលដ្ឋានឱ្យបានគ្រប់គ្នា ដោយក្នុងនោះប្រជាពលរដ្ឋដែលមានអាយុចាប់ពី១៨ឆ្នាំឡើង ដែលបានចាក់វ៉ាក់សាំងកូវីដ-១៩ ដូសមូលដ្ឋានរួចហើយ មានគម្លាតចាប់ពី៤ខែឡើងបន្ទាប់ពីការចាក់វ៉ាក់សាំងដូសទី២រួច ដោយឡែកអ្នកដែលបានចាក់វ៉ាក់សាំងចនសុន ចនសុន ដូសទី១រួច សូមអញ្ជើញទៅចាក់វ៉ាក់សាំងកូវីដ-១៩ដូសបន្ទាប់ ឬដូសជំរុញឱ្យបានគ្រប់គ្នា ដើម្បីបង្កើនកងការពារទប់ទល់ពីជំងឺដ៏កាចសាហាវនេះ៕
