ភ្នំពេញ ថ្ងៃទី០៤ ខែមេសា ឆ្នាំ២០២២ —
ដើម្បីបង្កើនកងការពារឡើងវិញ បន្ទាប់ពីបានចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន (ដូសទី២) រួចរាល់ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស បានបន្តអំពាវនាវជាថ្មីដល់ជនរួមជាតិទាំងអស់ ត្រូវតែមកទទួលការចាក់វ៉ាក់សាំងដូសជំរុញបន្ថែមទៀត ដើម្បីឱ្យកងការពារយើងស្ទុះងើបឡើងវិញ។
លោកជំទាវ បានសង្កត់ធ្ងន់ថា ៖ “ខ្ញុំសូមជម្រាបថា បន្ទាប់ពីចាក់វ៉ាក់សាំងបង្ការជំងឺកូវីដ-១៩ដូសទី២រួច ក្នុងរយៈពេលចាប់ពី៦ខែទៅ កងការពារនៅក្នុងខ្លួនរបស់យើង នឹងចាប់ផ្តើមធ្លាក់ចុះនូវប្រសិទ្ធភាពការពារពីការវាយលុកដោយវីរុសកូវីដ-១៩ បន្តិចម្តងៗ រហូតទាល់តែអស់ទាំងស្រុងនៅក្នុងអំឡុងពេល៨ខែ។ ដូច្នេះសូមបងប្អូនប្រជាពលរដ្ឋកុំរង់ចាំរហូតអស់កងការពារនៅក្នុងខ្លួនឱ្យសោះ ត្រូវមកទទួលវ៉ាក់សាំងដូសជំរុញ បន្ទាប់ពីបានចាក់ដូសទី២ បានចំនួន ០៤ខែ”។
លោកជំទាវ បានបន្ថែមផងដែរថា ការមកទទួលវ៉ាក់សាំងដូសជំរុញគឺមានសារៈសំខាន់ណាស់ ព្រោះថា បើយើងរង់ចាំទាល់តែអស់កងការពារ នោះយើងគ្រប់គ្នានឹងត្រូវប្រឈមនឹងការវាយលុកធ្ងន់ធ្ងរមកលើសុខភាព ហើយអាចនឹងឈានដល់មរណភាពក៏ថាបាន នៅពេលដែលយើងបានឆ្លងវីរុសកូវីដ-១៩។
ជាមួយគ្នានេះ លោកជំទាវ ក៏បានបន្តអំពាវនាវដ៏ទទូចដល់ជនរួមជាតិ ត្រូវបន្តនូវការរៀនរស់ជាមួយនឹងវត្តមាននៃវីរុសកូវីដ-១៩ ការរស់នៅតាមគន្លងប្រក្រតីភាពថ្មី អនុវត្តវិធានការ ០៣ការពារ និង០៣កុំ បើទោះជាបានចាក់វ៉ាក់សាំងកូវីដ-១៩ រួចរាល់ រួមទាំងដូសជំរុញក៏ដោយ ដោយលោកជំទាវបញ្ជាក់ថា ៖ “កូវីដ-១៩នឹងមិនងាយចប់ទេ ហើយយើងក៏មិនដឹងថាពួកវានឹងបំប្លែងខ្លួនទៅជាអ្វីទៀតដែរ ដូច្នេះមានតែការចូលរួមអនុវត្តពីគ្រប់បុគ្គលនូវវិធានការទាំងអស់នេះ ទើបសហគមន៍របស់យើងអាចចៀសផុតពីវីរុសដ៏កាចសាហាវនេះបាន”។
បន្ថែមពីលើនេះ លោកជំទាវ ក៏បានណែនាំដល់បងប្អូនជនរួមជាតិ ត្រូវពិនិត្យនៅលើបណ្ណចាក់វ៉ាក់សាំង បើសិនជាមានគម្លាតគ្រប់៤ខែ បន្ទាប់ពីការចាក់ដូសទី២ សូមមកទទួលវ៉ាក់សាំងដូសជំរុញទី៣ ហើយបើបានចាក់ដូសទី៣ហើយៗមានគម្លាត៤ខែផងដែរនោះ សូមមកទទួលវ៉ាក់សាំងដូសជំរុញទី៤ នៅតាមមន្ទីរពេទ្យ មន្ទីរពេទ្យបង្អែក ឬមណ្ឌលសុខភាព ដែលនៅជិតកន្លែងដែលបងប្អូនរស់នៅកុំបីខាន ដោយយើងមានវ៉ាក់សាំងគ្រប់គ្រាន់សម្រាប់ចាក់ដូសជំរុញ៕
