អន្តរជាតិ៖ ទីភ្នាក់ងារសារព័ត៌មានរដ្ឋ KCNA បានរាយការណ៍ថា លោកស្រី Kim Yo Jong ដែលជាប្អូនស្រីរបស់មេដឹកនាំកូរ៉េខាងជើងលោក Kim Jong Un កាលពីថ្ងៃអាទិត្យបានថ្កោលទោសការលើកឡើង របស់រដ្ឋមន្ត្រីការពារជាតិកូរ៉េខាងត្បូងអំពីសមត្ថភាពរបស់ ប្រទេសជិតខាងក្នុងការវាយប្រហារប្រឆាំងនឹងកូរ៉េខាងជើង។
នេះបើយោងតាមការចេញផ្សាយដោយសារព័ត៌មាន CNA។ ការអត្ថាធិប្បាយបានឱ្យដឹងថា “ទំនាក់ទំនងអន្តរកូរ៉េកាន់តែអាក្រក់ និងមានភាពតានតឹងផ្នែកយោធានៅលើឧបទ្វីបកូរ៉េ”។ លោក Kim អនុប្រធាននាយកដ្ឋាននៃគណៈកម្មាធិការកណ្តាលនៃគណបក្សពលករកូរ៉េ ក៏បាននិយាយផងដែរថា ប្រទេសនេះនឹង “ពិចារណាឡើងវិញនូវរឿងជាច្រើន” ហើយថាកូរ៉េខាងត្បូង “អាចប្រឈមមុខនឹងការគំរាមកំហែងយ៉ាងធ្ងន់ធ្ងរ”។ រដ្ឋមន្ត្រីការពារជាតិកូរ៉េខាងត្បូង លោក Suh Wook បាននិយាយកាលពីថ្ងៃសុក្រថា យោធារបស់ប្រទេសលោកមានមីស៊ីលជាច្រើនប្រភេទ ដែលមានរយៈចម្ងាយបាញ់ប្រសើរឡើងគួរឱ្យកត់សម្គាល់ និងថាមពលជាមួយនឹង “សមត្ថភាពក្នុងការវាយលុកគោលដៅណាមួយក្នុងប្រទេសកូរ៉េខាងជើងបានយ៉ាងត្រឹមត្រូវ និងរហ័ស”។ លោក Suh ក៏បាននិយាយផងដែរថា ក្រសួងការពារជាតិកូរ៉េខាងត្បូងនឹងគាំទ្រយ៉ាងសកម្មដល់យោធា ដើម្បីធានាថា ខ្លួនមានសមត្ថភាពឆ្លើយតបយ៉ាងលើសលប់ចំពោះការគំរាមកំហែងមីស៊ីលរបស់កូរ៉េខាងជើង ដោយគាត់បានហៅភាគខាងជើងថាជា “សត្រូវ”។
នៅក្នុងសេចក្តីថ្លែងការណ៍ ដាច់ដោយឡែកមួយកាលពីថ្ងៃអាទិត្យ លោក Pak Jong Chon លេខាធិការនៃគណៈកម្មាធិការកណ្តាលនៃគណបក្សពលករកូរ៉េបាននិយាយថា កូរ៉េខាងជើង “នឹងដឹកនាំកម្លាំងយោធាទាំងអស់របស់ខ្លួនដោយគ្មានមេត្តា ក្នុងការបំផ្លាញគោលដៅសំខាន់ៗនៅក្នុងទីក្រុងសេអ៊ូល” ប្រសិនបើកងទ័ពកូរ៉េខាងត្បូងចូលរួមក្នុងសកម្មភាពយោធាដ៏គ្រោះថ្នាក់ ដូចជាការវាយប្រហារទុកជាមុន។ ទោះជាយ៉ាងនេះក្តី កូរ៉េខាងជើងមិនបានបញ្ជាក់លម្អិតអំពីកន្លែងដែលខ្លួនមើលឃើញថាជាគោលដៅសំខាន់ៗនៅក្នុងទីក្រុងសេអ៊ូលនោះទេ។ ភាពតានតឹងអាចនឹងកើនឡើងបន្ថែមទៀត នៅពេលដែលប្រធានាធិបតីជាប់ឆ្នោតកូរ៉េខាងត្បូងលោក Yoon Suk-yeol នឹងត្រូវចូលកាន់តំណែងនៅខែក្រោយនេះ ៕
