ប្រទេសថៃកំណត់គោលដៅនាំចេញផ្លែឈើចំនួន ៨,៥៣ប៊ីលានដុល្លារអាម៉េរិកនៅក្នុងឆ្នាំ២០២២

ក្រសួងពាណិជ្ជកម្មថៃបានកំណត់គោលដៅប្រមូលថវិកាឱ្យបានចំនួន ២៨៧,៥០ប៊ីលានបាត (ប្រហែល ៨,៥៣ប៊ីលានដុល្លារអាម៉េរិក) ពីការនាំចេញផ្លែឈើនៅក្នុងឆ្នាំ២០២២។

យោងតាមរដ្ឋមន្ត្រីក្រសួងពាណិជ្ជកម្មថៃ លោក Jurin Laksanawisit បានឱ្យដឹងថា ក្រសួងបានព្យាករថា ការនាំចេញទៅក្រៅប្រទេសនឹងកើនឡើង ១៥ភាគរយនៅក្នុងឆ្នាំ២០២២។

លោក Jurin បាននិយាយថា គោលដៅនាំចេញនេះធ្វើឡើងដោយសារមានតម្រូវការខ្លាំងសម្រាប់ផ្លែឈើថៃ និងផលិតកម្មខ្ពស់ជាងមុននៅក្នុងរដូវប្រមូលផលឆ្នាំ២០២២ នេះ។

លោកបាននិយាយបន្ថែមថា ដើម្បីលើកកម្ពស់ការនាំចេញផ្លែឈើ ក្រសួងនេះបានទទួលជោគជ័យរួចហើយក្នុងការលើកកម្ពស់ការលក់ផ្លែឈើតាមរយៈកិច្ចសន្យាបញ្ជាទិញទុកជាមុន ដែលមានរហូតដល់ ៤៥០ ០០០តោន ដោយភាគច្រើនជាមួយក្រុមអ្នកទិញចិន។

យោងតាមរបាយការណ៍មួយរបស់នាយកដ្ឋានពាណិជ្ជកម្មផ្ទៃក្នុងរបស់ក្រសួងនេះបានឱ្យដឹងថា ទិន្នផលផ្លែឈើសរុបក្នុងរដូវប្រមូលផលឆ្នាំ២០២២ ត្រូវបានគេព្យាករថានឹងកើនឡើង ១៣ភាគរយ ដោយមានចំនួន ៥,៤៣លានតោន ដែលភាគច្រើនជាផ្លែធុរេន (កើនឡើង ២២ភាគរយ) ផ្លែមង្ឃុត (កើនឡើង ៤៣ភាគរយ) ផ្លែមៀន ( កើនឡើង ៧,៨ភាគរយ) ផ្លែសាវម៉ាវ (កើនឡើង ៦ភាគរយ) និងផ្លែស្វាយ (កើនឡើង ៥ភាគរយ)។

ប្រហែល ៣០ភាគរយនៃផលិតផលនឹងត្រូវកំណត់សម្រាប់ការប្រើប្រាស់ក្នុងស្រុក និងនៅសល់សម្រាប់ការនាំចេញ៕(ប្រភព VNA បកប្រែដោយលោក យា ចិន្តាខន្តី)