នៅព្រឹកថ្ងៃទី២៨ ខែមីនា ឆ្នាំ២០២២នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តមបណ្ឌិត ផាក ហ៉ឹងក្យុង ឯកអគ្គរាជទូតនៃសាធារណរដ្ឋកូរ៉េ ប្រចាំនៅកម្ពុជា បានអញ្ជើញជាអធិបតីដ៏ខ្ពង់ ខ្ពស់សម្ពោធដាក់ដំណើរការជាផ្លូវការនូវអគារជំងឺត្រចៀក ច្រមុះ បំពង់ក មិត្តភាពកម្ពុជា-កូរ៉េ ដែលប្រសូត្រចេញពីផ្លែផ្កា នៃគម្រោងការកសាងសមត្ថភាពសម្រាប់មជ្ឈ មណ្ឌលត្រចៀកច្រមុះបំពង់ក នៃមន្ទីរពេទ្យព្រះអង្គឌួង។
រយៈពេលបួនឆ្នាំ បន្ទាប់ពីការចុះហត្ថ លេខាលើកំណត់ត្រានៃកិច្ចពិភាក្សា(RoD) លើ«គម្រោងការកសាងសមត្ថភាពសម្រាប់មជ្ឍមណ្ឌលត្រចៀក ច្រមុះ បំពង់ក នៅមន្ទីរពេទ្យព្រះអង្គឌួង» រដ្ឋាភិបាលនៃសា ធារណរដ្ឋកូរ៉េ តាមរយៈទីភ្នាក់ងារសហ ប្រតិបត្តិការអន្តរជាតិកូរ៉េ(កយកាKOICA) បានប្រគល់អគារជំងឺត្រចៀក ច្រមុះ បំពង់ ក មិត្តភាពកម្ពុជា-កូរ៉េ ដែលមានតម្លៃសរុបក្នុងគម្រាងទាំងមូល ៨លានដុល្លារអាមេរិក ដល់រដ្ឋាភិបាលកម្ពុជា។ អគារជំងឺត្រចៀក ច្រមុះ បំពង់ក ត្រូវបានបង្កើតឡើងដើម្បីផ្តល់ការព្យាបាលឯកទេសសម្រាប់អ្នកដែលមានបញ្ហាត្រចៀក ច្រមុះ និងបំពង់ក ។ អគារមានកម្ពស់ប្រាំជាន់បំពាក់ដោយឧបករណ៍ទំនើបសម្រាប់ការធ្វើរោគវិនិច្ឆ័យ ការព្យាបាល និងការវះកាត់ ត្រូវបានសាង សង់នៅក្នុងបរិវេណមន្ទីរពេទ្យព្រះអង្គឌួង ដើម្បីជួយកែលម្អសេវាវេជ្ជសាស្រ្តនៅក្នុងមន្ទីរពេទ្យនេះ។ អគារជំងឺត្រចៀក ច្រមុះ បំពង់កថ្មីនេះ មានទំហំសរុបជាង៤ពាន់ ម៉ែត្រការ៉េ (៤,១៧៧. ៩៤) មានគ្រែសរុបចំនួន១២៨គ្រែ រួមមាន៖ផ្នែកពិនិត្យពិគ្រោះជំងឺក្រៅ បន្ទប់វះកាត់ បន្ទប់ក្រោយវះកាត់ និងបន្ទប់សង្គ្រោះបន្ទាន់។
ក្រៅពីការធ្វើឱ្យប្រសើរឡើងនូវហេដ្ឋារចនាសម្ព័ន្ធរូបវន្ត សមត្ថភាពរបស់វេជ្ជបណ្ឌិតឯកទេស និងបុគ្គលិកត្រូវបានធ្វើឱ្យប្រសើរឡើងតាម រយៈការផ្តល់នូវកម្មវិធីបណ្តុះបណ្តាលក្នុងសេវាកម្ម និងការផ្ទេរចំណេះដឹងកម្រិតខ្ពស់ និងការចែករំលែកបទពិសោធន៍ពីវេជ្ជ បណ្ឌិតកូរ៉េផងដែរ។
អគារជំងឺត្រចៀក ច្រមុះ បំពង់ក មិត្តភាពកម្ពុជា-កូរ៉េ ត្រូវបានសាងសង់ឡើង បន្ទាប់ ពីការសាងសង់ អគារចក្ខុរោគ មិត្តភាពកម្ពុជា-កូរ៉េ ក្នុងបរិវេណមន្ទីរពេទ្យព្រះអង្គឌួង។អគារចក្ខុរោគ ត្រូវបានសម្ពោធដាក់ឱ្យប្រើប្រាស់កាលពីឆ្នាំ២០១៥។ អគារនេះ ត្រូវបានសាងសង់ឡើងក្រោមជំនួយឥត សំណងពី KOICA ដោយចំណាយទឹក ប្រាក់ចំនួន ៥.៥លានដុល្លារសហរដ្ឋអាមេ រិក។ អគារនេះមាន ៧៥បន្ទប់ រួមទាំងបន្ទប់ពិនិត្យអ្នកជំងឺក្រៅ បន្ទប់អ្នកជំងឺសម្រាកពេទ្យ និងបន្ទប់វះកាត់។ អគារចក្ខុរោគ បានធ្វើឱ្យប្រសើរឡើងនូវសមត្ថភាពនៃការ ស្រាវជ្រាវជំងឺភ្នែក និងសេវាវេជ្ជសាស្រ្ត ហើយរួមចំណែកដល់អត្រានៃការបង្ការពិការភ្នែក និងការកែលម្អសេវាថែទាំភ្នែកទូទៅក្នុងប្រទេសកម្ពុជា ៕
