«យើងពុំគួរចាត់ទុកជនពិការជាបន្ទុករបស់សង្គមជាតិនោះទេ ព្រោះពួកគាត់ក៏មានលទ្ធភាព ក្នុងការរស់នៅចិញ្ចឹមជីវិតដោយខ្លួនឯង និងមានសមត្ថភាពក្នុងការបំពេញការងារដូចមនុស្សធម្មតាដែរ អ្វីដែលយើងទាំងអស់គ្នាត្រូវធ្វើ គឺជួយគាំទ្រ និងការពារពួកគាត់ ដើម្បីឱ្យពួកគាត់ទទួលបាននូវសិទ្ធិ សេរីភាពស្របច្បាប់។ ជនពិការមែនពិត តែចិត្តគំនិត និងឆន្ទៈរបស់ពួកគាត់មិនពិការឡើយ ពួកគាត់ក៏ជាធនធានមនុស្សដ៏សំខាន់សម្រាប់អភិវឌ្ឍន៍សេដ្ឋកិច្ច សង្គមជាតិ ដែលពុំអាចខ្វះបានផងដែរ»។នេះជាការថ្លែងរបស់ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាននៅក្នុងសន្និសីទសារព័ត៌មាន និង ការធ្វើបទបង្ហាញផែនការរៀបចំកម្មវិធីប្រឡងសំនៀងជនពិការកម្ពុជា ពានរង្វាន់សម្ដេចអគ្គមហាសេនាបតី តេជោ ហ៊ុន សែន លើកទី២ នៅថ្ងៃទី២៦ខែមីនាឆ្នាំ២០២២នេះ។
ឯកឧត្តម រដ្ឋមន្ត្រីក្រសួងព័ត៌មាន បានថ្លែងឱ្យដឹងថា កម្មវិធីប្រឡងសំនៀងជនពិការកម្ពុជានេះ មិនមែនជាការរៀបចំឡើងដោយចៃដន្យនោះឡើយ គឺជាកម្មវិធីមួយដែលរៀបចំឡើងក្នុងគោលបំណងបង្ហាញពីគោលនយោបាយ របស់រាជរដ្ឋាភិបាលកម្ពុជា ដែលជានិច្ចកាល សម្តេចតេជោនាយករដ្ឋមន្ត្រី តែងតែគាំទ្រ លើកស្ទួយ និងយកចិត្តទុកដាក់ខ្ពស់ចំពោះជនពិការកម្ពុជា ដើម្បីធ្វើឱ្យជីវភាពរស់នៅរបស់ពួកគាត់ប្រកបដោយភាពសមរម្យនិងមានទឹកចិត្តស្នេហាជាតិមាតុភូមិដូចពលរដ្ឋទូទៅដែរ និងដើម្បីផ្តល់ឱកាសដល់ជនពិការកម្ពុជា បញ្ចេញនូវសមត្ថភាព និងទេពកោសល្យក្នុងវិថីសិល្បៈសំដៅឱ្យមហាជនទូទៅបានយល់ដឹង និងចាប់អារម្មណ៍ពីស្នាដៃរបស់ពួកគាត់លើវិស័យសិល្បៈ តន្ត្រី ចម្រៀងប្រពៃណី និងសម័យ។
ឯកឧត្តម រដ្ឋមន្ត្រីក្រសួងព័ត៌មាន បានថ្លែងឱ្យដឹងទៀតថា មែនទែនទៅ កម្មវិធីនេះធ្លាប់បានរៀបចំម្តងរួចហើយកាលពីឆ្នាំ២០១៧-២០១៨ ដោយមានការអនុញ្ញាតដ៏ខ្ពង់ខ្ពស់ សម្តេចអគ្គមហាសេនាបតីតេជោ នាយករដ្ឋមន្ត្រីនៃព្រះរាជាណាចក្រកម្ពុជា ដោយប្រសិទ្ធនាមឈ្មោះកម្មវិធី “ប្រឡងសំនៀងជនពិការកម្ពុជា ពានរង្វាន់សម្តេចអគ្គមហាសេបតីតេជោ ហ៊ុន សែន”។
ក្រោមស្មារតីលើកកម្ពស់ជនពិការនៅកម្ពុជា និងដោយពិនិត្យឃើញពីស្ថានភាពជំងឺកូវីដ-១៩ នៅក្នុងប្រទេស និងលើពិភពលោក មានលក្ខណៈល្អប្រសើរ ប្រជាពលរដ្ឋទូទាំងប្រទេស ទទួលបានវ៉ាក់សាំងបង្ការជំងឺកូវីដ-១៩ ហើយរាជរដ្ឋាភិបាលកម្ពុជា បានបើកដំណើរការប្រទេសឡើងវិញលើគ្រប់វិស័យផងកម្មវិធីនេះត្រូវបានទទួលការអនុញ្ញាតឱ្យរៀបចំបន្តទៀត នៅឆ្នាំ២០២១-២០២២
ដោយមានការសហការរវាងអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន និងអង្គភាពសារព័ត៌មាន AP Times ដោយមានការឯកភាពដ៏ខ្ពង់ខ្ពស់ពីប្រមុខរាជរដ្ឋាភិបាលកម្ពុជាតាមរយៈលិខិតលេខ១៣១ សជណ ចុះថ្ងៃទី២២ ខែកុម្ភៈ ឆ្នាំ២០២២ របស់ទីស្តីការគណៈរដ្ឋមន្ត្រី។
ឯកឧត្តម ផុស សុវណ្ណ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានព័ត៌មាន និង សោតទស្សន៍ និងជាប្រធានក្រុមការងាររៀបចំកម្មវិធីប្រឡងសំនៀងជនពិការកម្ពុជា ពានរង្វាន់សម្តេចអគ្គមហាសេបតីតេជោ ហ៊ុន សែន លើកទី២ បានថ្លែងថា កម្មវិធីប្រឡងសំនៀងជនពិការនេះគ្រោងរៀបចំកម្មវិធីបើកនៅរាជធានីភ្នំពេញកម្មវិធីពាក់កណ្តាលផ្តាច់ព្រ័ត្រ នៅខេត្តព្រះសីហនុ និងកម្មវិធីផ្តាច់ព្រ័ត្រនៅខេត្តសៀមរាប។ ដោយចាប់ផ្តើមនៅខែមីនា ឆ្នាំ២០២២និងគ្រោងបញ្ចប់មុនពេលយុទ្ធនាការបោះឆ្នោតឆ្នាំ២០២៣។
ខ្លឹមសារនៃកម្មវិធីនេះ គឺរៀបចំឡើងដើម្បីលើកទឹកចិត្តជនពិការកម្ពុជាទូទាំងប្រទេសឱ្យបានបញ្ចេញសមត្ថភាព និងទេពកោសល្យ។ ប៉ុន្តែដោយសារមានបញ្ហាជំងឺកូវិដ-១៩ បំប្លែងថ្មីប្រភេទអូមីក្រុងរីករាលដាលខ្លាំងចាប់ពីខែមករាមក អគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន និងអង្គភាពសារព័ត៌មាន AP Times នៃក្រុមហ៊ុន អឹស្ត អ៊ីឡាយមិនស៍ ស៊ិនធើណេសិនណល ខលល័រ មេឌា ឯ.ក បានគោរពសុំការអនុញ្ញាតពន្យាការរៀបចំកម្មវិធីប្រឡងសំនៀងជនពិការកម្ពុជាបានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី២ ដោយចាប់ពីខែមេសា ឆ្នាំ២០២២ បញ្ចប់នៅក្នុងខែឧសភា ឆ្នាំ២០២៣៕
