នាយករដ្ឋមន្ត្រីប៉ាគីស្ថាន លោក Imran Khan និងជាទីប្រឹក្សារដ្ឋចិន និងជារដ្ឋមន្ត្រីការបរទេសចិន លោក វ៉ាង យី បានជួបប្រជុំគ្នានៅប្រទេសប៉ាគីស្ថានកាលពីថ្ងៃអង្គារ ដោយបានសន្យាជំរុញឱ្យមានសមិទ្ធិផលបន្ថែមទៀតនៅក្នុងកិច្ចសហប្រតិបត្តិការជាក់ស្តែងលើគ្រប់វិស័យរវាងប្រទេសទាំងពីរ។
នៅក្នុងជំនួបនោះ នាយករដ្ឋមន្ត្រីប៉ាគីស្ថានបានវាយតម្លៃខ្ពស់ចំពោះទំនាក់ទំនង និងការផ្លាស់ប្តូរកាន់តែជិតស្និទ្ធរវាងប្រទេសទាំងពីរ ហើយបានសម្តែងឆន្ទៈក្នុងការធ្វើការងារជាមួយប្រទេសចិនក្នុងការជំរុញកិច្ចសហប្រតិបត្តិការលើគ្រប់វិស័យដើម្បីសម្រេចបានសមិទ្ធិផលបន្ថែមទៀត។
នាយករដ្ឋមន្ត្រីរូបនេះបាននិយាយថា ទំនាក់ទំនងមិត្តភាពរវាងប៉ាគីស្ថាន និងចិន មិនត្រឹមតែជាការសម្រេចចិត្តរបស់រដ្ឋាភិបាលទាំងពីរប៉ុណ្ណោះទេ ប៉ុន្តែក៏ជាជម្រើសរបស់ប្រជាជននៃប្រទេសទាំងពីរផងដែរ។
លោកបានកត់សម្គាល់ថា កិច្ចសហប្រតិបត្តិការរវាងប៉ាគីស្ថាន និងចិនបានផ្តល់នូវថាមពលជាវិជ្ជមានសម្រាប់ភាគីទាំងសងខាង និងពិភពលោក ហើយភាគីប៉ាគីស្ថានពោរពេញដោយទំនុកចិត្តចំពោះការអភិវឌ្ឍសម្រាប់អនាគតនៃទំនាក់ទំនងទ្វេភាគី។
លោក វ៉ាង បាននិយាយថា ភាគីចិនកោតសរសើរចំពោះប៉ាគីស្ថានដែលបានផ្តល់អាទិភាពដល់ការអភិវឌ្ឍ ហើយប្រទេសចិនបានត្រៀមខ្លួនរួចជាស្រេចក្នុងការផ្តល់ជំនួយដល់ប៉ាគីស្ថានក្នុងការកសាងសមត្ថភាពដើម្បីជួយខ្លួនឯងជំនះការលំបាក និងការស្តារសេដ្ឋកិច្ចឡើងវិញ ព្រមទាំងជំរុញកិច្ចសហប្រតិបត្តិការជាក់ស្តែងលើគ្រប់វិស័យរវាងភាគីទាំងពីរដើម្បីធ្វើឱ្យមានសមិទ្ធិផលបន្ថែមទៀត។
លោក វ៉ាង បានកត់សម្គាល់ថា ប្រទេសចិនបានលើកទឹកចិត្តដល់សហគ្រាសចិនឱ្យធ្វើការវិនិយោគនៅក្នុងប្រទេសប៉ាគីស្ថាន ដើម្បីជួយពង្រីកឱកាសការងារ និងបង្កើនល្បឿនឧស្សាហតូបនីយកម្មនៅក្នុងប្រទេសប៉ាគីស្ថាន។
ភាគីទាំងពីរបានវាយតម្លៃខ្ពស់ចំពោះសារៈសំខាន់ជាយុទ្ធសាស្ត្រនៃទំនាក់ទំនងរវាងចិន-ប៉ាគីស្ថាន ដោយបានចាត់ទុកថា ចំពោះមុខស្ថានការណ៍អន្តរជាតិដ៏ចលាចលនាពេលបច្ចុប្បន្ន ប្រទេសចិន និងប៉ាគីស្ថានគួរតែពង្រឹងបន្ថែមទៀតនូវការឯកភាព និងកិច្ចសហប្រតិបត្តិការ ហើយបន្តដើរតួនាទីស្ថេរភាពនៅក្នុងតំបន់ និងក្នុងពិភពលោកទាំងមូល។
ភាគីទាំងពីរបានទទួលស្គាល់យ៉ាងពេញលេញនូវតួនាទីវិជ្ជមាននៃកិច្ចប្រជុំរដ្ឋមន្ត្រីការបរទេសចិន-អាហ្វហ្គានីស្ថាន-ប៉ាគីស្ថាន និងកិច្ចប្រជុំរដ្ឋមន្ត្រីការបរទេសក្នុងចំណោមបណ្តាប្រទេសជិតខាងអាហ្វហ្គានីស្ថាន៕(ប្រភព People’s Daily បកប្រែដោយលោក យា ចិន្តាខន្តី)
