ប្រទេសចិន និងអារ៉ាប៊ីសាអូឌីត គឺជាមិត្តល្អ និងជាបងប្អូនដែលមានការជឿទុកចិត្តគ្នាទៅវិញទៅមក និងស្វែងរកការអភិវឌ្ឍរួមគ្នា ហើយប្រទេសទាំងពីរតែងតែគាំទ្រគ្នាទៅវិញទៅមកទៅលើបញ្ហាទាក់ទងនឹងផលប្រយោជន៍ស្នូលរបស់ប្រទេសទាំងពីរ។ នេះបើយោងតាមការលើកឡើងរបស់ទីប្រឹក្សារដ្ឋចិន និងជារដ្ឋមន្រ្តីការបរទេសចិន លោក វ៉ាង យី ដែលកំពុងបំពេញទស្សនកិច្ចនៅប៉ាគីស្ថាន។
លោក វ៉ាង បាននិយាយក្នុងអំឡុងពេលនៃកិច្ចប្រជុំជាមួយរដ្ឋមន្ត្រីការបរទេសអារ៉ាប៊ីសាអូឌីត ព្រះអង្គម្ចាស់ Faisal bin Farhan Al Saud នៅក្នុងរដ្ឋធានីរបស់ប៉ាគីស្ថានដែលនៅទីនោះ លោក វ៉ាង បានចូលរួមក្នុងសម័យប្រជុំលើកទី៤៨ នៃក្រុមប្រឹក្សារដ្ឋមន្ត្រីការបរទេសនៃអង្គការសហប្រតិបត្តិការឥស្លាម (OIC) ថា ប្រទេសចិនមានឆន្ទៈក្នុងការបង្កើនកិច្ចសហប្រតិបត្តិការគ្រប់ជ្រុងជ្រោយ និងក្នុងកម្រិតខ្ពស់ជាមួយអារ៉ាប៊ីសាអូឌីត។
លោក វ៉ាង បាននិយាយថា ប្រទេសចិនកោតសរសើរចំពោះប្រទេសអារ៉ាប៊ីសាអូឌីត ដែលប្រកាន់យកគោលជំហរដ៏ត្រឹមត្រូវមួយទៅលើបញ្ហានានាពាក់ព័ន្ធនឹងប្រទេសចិន និងសម្រាប់ការគាំទ្ររបស់ខ្លួនចំពោះសំណើស្របច្បាប់របស់ប្រទេសចិន។
លោក វ៉ាង បាននិយាយថា ប្រទេសចិនគាំទ្រដល់អារ៉ាប៊ីសាអូឌីតក្នុងការការពារអធិបតេយ្យភាព សន្តិសុខ និងសេចក្តីថ្លៃថ្នូរជាតិ ក៏ដូចជាយុទ្ធសាស្រ្តអភិវឌ្ឍសំខាន់ៗរបស់ខ្លួន ដូចជាគំនិតផ្តួចផ្តើមនៃគម្រោងមជ្ឈឹមបូព៌ាបៃតង និងចក្ខុវិស័យឆ្នាំ២០៣០ ជាដើម ។
លោកបាននិយាយបន្ថែមថា លោកចង់ចាប់យកឱកាសនៃការចូលរួមរបស់លោកនៅក្នុងកិច្ចប្រជុំរដ្ឋមន្ត្រីការបរទេសរបស់ OIC នេះ ដើម្បីលើកកម្ពស់នៃទំនាក់ទំនងរវាងប្រទេសចិន និងបណ្តាប្រទេសអ៊ីស្លាមទៅកាន់កម្រិតថ្មីមួយ។
ចំណែកព្រះអង្គម្ចាស់ Faisal បានមានព្រះបន្ទូលថា ព្រះអង្គមានមោទនភាពចំពោះទំនាក់ទំនង និងកិច្ចសហប្រតិបត្តិការយុទ្ធសាស្ត្រកម្រិតខ្ពស់របស់រវាងប្រទេសទាំងពីរ ហើយព្រះអង្គបានយល់ព្រមធ្វើការងារជាមួយប្រទេសចិនដើម្បីអនុវត្តការឯកភាពគ្នាដ៏សំខាន់ដែលមេដឹកនាំនៃប្រទេសទាំងពីរសម្រេចបាន។
ព្រះអង្គម្ចាស់បានមានព្រះបន្ទូលថា ប្រទេសរបស់ព្រះអង្គមានឆន្ទៈក្នុងការធ្វើសមាហរណកម្មស៊ីជម្រៅជាមួយគំនិតផ្តួចផ្តើមនៃគម្រោងខ្សែក្រវ៉ាត់ និងផ្លូវរបស់ប្រទេសចិន និងពង្រីកកិច្ចសហប្រតិបត្តិការជាក់ស្តែងជាមួយប្រទេសចិនក្នុងវិស័យផ្សេងៗ ដើម្បីសម្រេចបាននូវការបំពេញបន្ថែមនៃផលប្រយោជន៍របស់ប្រទេសនីមួយៗ។
ទាំងអារ៉ាប៊ីសាអូឌីត និងចិន តែងប្រកាន់ខ្ជាប់នូវគោលការណ៍មិនជ្រៀតជ្រែកក្នុងកិច្ចការផ្ទៃក្នុងរបស់គ្នាទៅវិញទៅមក ប្រកាន់ខ្ជាប់នូវពហុភាគីនិយម និងការតស៊ូមតិថា របៀបវារៈអន្តរជាតិគួរតែបម្រើដល់ផលប្រយោជន៍នៃប្រទេសភាគច្រើនជំនួសឱ្យរដ្ឋបុគ្គលនីមួយៗ៕(ប្រភព People’s Daily បកប្រែដោយលោក យា ចិន្តាខន្តី)
