យោងតាមអ្នកនាំពាក្យរបស់ប្រធានាធិបតីកូរ៉េខាងត្បូង លោកស្រី Kim Eun-hye បានឱ្យដឹងថា ប្រធានាធិបតីជាប់ឆ្នោតរបស់កូរ៉េខាងត្បូង លោក Yoon Suk-yeol ពិភាក្សាអំពីមធ្យោបាយធ្វើឱ្យទំនាក់ទំនងទ្វេភាគីកាន់តែស៊ីជម្រៅ នៅក្នុងអំឡុងពេលនៃកិច្ចសន្ទនាតាមទូរស័ព្ទជាមួយប្រធានាធិបតីវៀតណាម លោក Nguyen Xuan Phuc នៅថ្ងៃទី២៣ ខែមីនា។
លោកស្រី Kim ត្រូវបានដកស្រង់សម្តីដោយប្រព័ន្ធផ្សព្វផ្សាយក្នុងស្រុកដែលលោកបាននិយាយនៅក្នុងសន្និសីទសារព័ត៌មានមួយថា «ប្រទេសវៀតណាម គឺជាប្រជាជាតិមួយដ៏រួសរាយសម្រាប់យើង ហើយបានរក្សាទំនាក់ទំនងនៃការជឿទុកចិត្តគ្នា បើទោះបីជាមានការរំខានពីជំងឺរាតត្បាតកូវីដ-១៩ និងខ្សែសង្វាក់ផ្គត់ផ្គង់សកលលោកក៏ដោយ»។
លោកស្រីបាននិយាយថា នៅក្នុងឆ្នាំ២០២២ នេះ ប្រទេសទាំងពីរនឹងប្រារព្ធខួបលើកទី៣០ នៃទំនាក់ទំនងការទូតទ្វេភាគី ហើយទំនាក់ទំនងទ្វេភាគីនាពេលនេះត្រូវបានធ្វើឱ្យប្រសើរឡើងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ។
អ្នកនាំពាក្យរូបនេះក៏បានគូសបញ្ជាក់ផងដែរថា ប្រទេសវៀតណាមក្នុងនាមជាអ្នកសម្របសម្រួលទំនាក់ទំនងកូរ៉េខាងត្បូង-អាស៊ាន បានដើរតួនាទីយ៉ាងសំខាន់ក្នុងភាពជាដៃគូរបស់កូរ៉េខាងត្បូងជាមួយសមាគមប្រជាជាតិអាស៊ីអាគ្នេយ៍ (អាស៊ាន)។
ប្រធានាធិបតីវៀតណាមនឹងក្លាយជាមេដឹកនាំបរទេសទីប្រាំមួយដែលបាននិយាយជាមួយលោក Yoon ចាប់តាំងពីការបោះឆ្នោតរបស់លោកកាលពីថ្ងៃទី១០ ខែមីនា បន្ទាប់ពីប្រធានាធិបតីសហរដ្ឋអាមេរិក លោក ចូ បៃដិន នាយករដ្ឋមន្ត្រីជប៉ុន លោក ហ្វ៊ូមិអូ គីស៊ីដា នាយករដ្ឋមន្ត្រីអង់គ្លេស លោក បូរីស ចនសុន នាយករដ្ឋមន្ត្រីអូស្ត្រាលី លោក ស្កុត ម៉ូរីសុន និងនាយករដ្ឋមន្ត្រីឥណ្ឌា លោក ណារេនដ្រា ម៉ូឌី៕(ប្រភព VNA បកប្រែដោយលោក យា ចិន្តាខន្តី)
