ក្រសួងព័ត៌មាន និងក្រសួងមហាផ្ទៃ បានសម្រេចរួមគ្នាមួយ ក្នុងការបង្កើតឱ្យមានអ្នកនាំពាក្យ និងមានការបណ្តុះបណ្តាល ដើម្បីមានលទ្ធភាពផ្សព្វផ្សាយព័ត៌មានឱ្យបានទូលំទូលាយ។
នៅក្នុងឱកាសសិក្ខាសាលាស្តីពី “ការិយាល័យព័ត៌មានឈ្លាសវៃ និងអភិបាលកិច្ចល្អក្នុងវិស័យព័ត៌មាន” ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នៅព្រឹកថ្ងៃទី២២ ខែមីនា ឆ្នាំ២០២២ នៅខេត្តកោះកុង ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានជម្រាបជូនថា ការដែលក្រសួងព័ត៌មាន និងក្រសួងមហាផ្ទៃ បានសម្រេចរួមគ្នាមួយ ក្នុងការបង្កើតឱ្យមានអ្នកនាំពាក្យ និងមានការបណ្តុះបណ្តាល ដោយសារកាលពី១០ ឆ្នាំមុន ឱ្យប្រធានមន្ទីរព័ត៌មាន ធ្វើជាអ្នកនាំពាក្យតែមិនហ៊ានជួបអភិបាលខេត្ត រាជធានី របស់ខ្លួននោះទេ ដែលធ្វើឱ្យការទទួលព័ត៌មាន មិនបានគ្រប់ ជ្រុងជ្រោយ ។ ដូច្នេះក្រោយ មក ទើបសម្រេចប្ដូរមន្រ្តីអ្នក នាំពាក្យ គឺត្រូវយកអ្នកដែលនៅជិតបំផុត ជាមួយអភិបាល ខេត្ត រាជធានី មានន័យថា អ្នកដែលដឹងរឿង ហើយនៅជិតអ្នកដែលមានសិទ្ធិសម្រេច ។ មន្រ្តីអ្នកនាំពាក្យ ត្រូវបានជ្រើសរើស អភិបាលរងខេត្ត ម្នាក់ មន្រ្តីសាលាខេត្ត ដែលនៅច្រកចេញចូលតែមួយ និងមន្ត្រីនៃមន្ទីរព័ត៌មាន ម្នាក់ ។
មន្ត្រីអ្នកនាំពាក្យត្រូវតែមាន ភាពវៃឆ្លាត និង មានការទំនាក់ទំនងល្អជាមួយ គ្រប់ស្ថាប័ន មន្ទីរ អង្គភាព ជុំវិញខេត្ត ហើយ មន្ត្រី អ្នកនាំពាក្យ មិនអាចឆ្លើយគ្រប់តែរឿងបាននោះទេ គឺទុកឱ្យមន្ត្រីជំនាញពាក់ពន្ធ័ ជាអ្នកឆ្លើយបំភ្លឺ ទើបជាការត្រឹមត្រូវ ។ ដូច្នេះប្រធាន ស្ថាប័ននៅថ្នាក់ក្រោមជាតិ គួរតែមាន មន្រ្តីអ្នកនាំពាក្យ ១ ព្រោះជារបាំងការពារមួយដ៏សំខាន់ ដោយហេតុថា មន្រ្តីអ្នកនាំពាក្យ ឬមន្ត្រីព័ត៌មាន ធ្វើការ ២៤ ម៉ោង និង៧ថ្ងៃក្នុង១សប្តាហ៍ ។ ប្រធាន អង្គភាព ស្ថាប័ន អាចចាំតែឆ្លើយរឿងសំខាន់ៗ និងធំៗ ដែលពាក់ពន្ធ័ការងារ ស្ថាប័នខ្លួនបានហើយ ។
ឯកឧត្តម មានប្រសាសន៍បន្តថា ការងារព័ត៌មានសំខាន់ណាស់ នាពេលបច្ចុប្បន្ននេះ ព្រោះថាពីមុនដើររកព័ត៌មាន តែឥឡូវព័ត៌មាន ចូលដល់ក្នុងមុងតែម្តង ហើយអ្នកណាក៏អាចប្រើ Facebook និង Internet បាន ហើយមនុស្សម្នាក់ គឺជាស្ថានីយ៍ផ្សាយ ១ អញ្ចឹង នៅពេលគាត់ផ្សាយរឿងអ្វីមួយទៅ មានមនុស្ស១០ នាក់មើល ក្នុង១០ នាក់ មាន៥នាក់ជឿអាចបន្តទៅអ្នកដ៏ទៃលឿនណាស់ ។
សូមបញ្ជាក់ថា ដូច្នេះ សម្រាប់ក្រសួងព័ត៌មាន បានដាក់ចេញនូវទិសស្លោកចំនួន៥ លឿន ប្លែក រហ័ស ទុកចិត្តបាន នៅទីណា ពេលណាក៏បាន ហើយក្នុងចំណុចទាំង ៥ នេះ អ្វីដែលសំខាន់ គឺទុកចិត្តបាន ៕
