ក្រុមការងារជាតិសម្រាប់ការបង្ការ និងគ្រប់គ្រងជំងឺកូវីដ-១៩ នៅក្នុងប្រទេសឡាវបានប្រកាសថា ប្រទេសនេះកំពុងប្រឈមមុខនឹងរលកទីបីនៃការផ្ទុះជំងឺកូវីដ-១៩។
មន្ត្រីម្នាក់មកពីក្រុមការងារជាតិនេះបាននិយាយថា បើទោះបីជាចំនួនឆ្លងថ្មីៗនេះមានកម្រិតទាបដោយពេលខ្លះមានតិចជាង ២០០នាក់ក្នុងមួយថ្ងៃក៏ដោយ ក៏ប្រទេសនេះកំពុងឃើញចំនួនឆ្លងថ្មីកាន់តែខ្ពស់នៅពេលនេះ ក្នុងអំឡុងពេលនៃការផ្ទុះឡើងថ្មី។
លោកបាននិយាយថា ការកើនឡើងនៅក្នុងករណីនៃការឆ្លងវីរុសបម្លែងថ្មីអូមីក្រុង ជាពិសេសនៅក្នុងរដ្ឋធានីវៀងចន្ទន៍ អាចនឹងបណ្តាលឱ្យប្រទេសនេះជួបប្រទះនូវរលកទីបីរបស់ខ្លួន។
បើទោះបីជាករណីស្លាប់ដោយសារវីរុសបម្លែងថ្មីអូមីក្រុងជាធម្មតាមានចំនួនតិចជាងការបង្កឡើងដោយវីរុសបម្លែងឌែលតា និងវីរុសបម្លែងផ្សេងៗទៀតនៃជំងឺកូវីដ-១៩ ក៏ដោយ ប៉ុន្តែវីរុសបម្លែងអូមីក្រុងនៅតែមានគ្រោះថ្នាក់សម្រាប់មនុស្សដែលមានអាយុលើសពី ៦០ឆ្នាំ ឬអ្នកដែលមានជំងឺប្រចាំកាយរ៉ាំរ៉ៃ។
មន្ត្រីនៃសុខាភិបាលឡាវបាននិយាយនៅពេលមុននេះថា ដោយសារការកើនឡើងនៃការធ្វើតេស្ត និងការថែទាំព្យាបាលតាមផ្ទះ របាយការណ៍ប្រចាំថ្ងៃដែលត្រូវបានរាយការណ៍ជាផ្លូវការអាចនឹងមិនឆ្លុះបញ្ចាំងពីចំនួនពិតប្រាកដនៃករណីឆ្លងនៅក្នុងសហគមន៍ឡើយ។
ក្រសួងសុខាភិបាលបានរាយការណ៍ថា ក្នុងរយៈពេល ២៤ម៉ោងកន្លងមក ប្រទេសឡាវបានកត់ត្រាករណីឆ្លងថ្មីនៃជំងឺកូវីដ-១៩ ចំនួន ៤១៣នាក់ និងករណីស្លាប់ដែលពាក់ព័ន្ធចំនួន ៣នាក់។
រហូតមកដល់ពេលនេះ ករណីឆ្លងសរុបនៅក្នុងប្រទេសនេះមានជាង ១៤៥ ៥០០នាក់ ហើយចំនួនអ្នកស្លាប់សរុបមាន ៦៤០នាក់៕
