រដ្ឋមន្រ្តីក្រសួងសុខាភិបាលសិង្ហបុរី លោក Ong Ye Kung បាននិយាយនៅក្នុងសភាកាលពីថ្ងៃទី៩ ខែមីនាថា រលកនៃការផ្ទុះវីរុសបម្លែងថ្មីអូមីក្រុងនាពេលបច្ចុប្បន្នរបស់ប្រទេសសិង្ហបុរីបានឈានដល់កម្រិតកំពូល ខណៈដែលចំនួននៃករណីឆ្លងនៅទូទាំងប្រទេសឥឡូវនេះកំពុងមានការធ្លាក់ចុះ។
ករណីឆ្លងប្រចាំថ្ងៃរបស់ប្រទេសសិង្ហបុរីមានចំនួនសរុបប្រហែល ២២ ០០០នាក់កាលពីថ្ងៃទី៨ ខែមីនា បើធៀបទៅនឹងចំនួន ២៦ ០០០នាក់កាលពីពីរសប្តាហ៍មុន។ ក្នុងចំណោមករណីឆ្លងទាំងនោះ មាន ១ ៤៩៩នាក់កំពុងសម្រាកព្យាបាលនៅមន្ទីរពេទ្យ ដែលក្នុងនោះរួមមាន ៤៩នាក់នៅកំពុងស្ថិតនៅបន្ទប់សង្រ្គោះបន្ទាន់។
លោកវេជ្ជបណ្ឌិត Janil Puthucheary ទេសរដ្ឋមន្ត្រីសិង្ហបុរីបាននិយាយថា គ្លីនិកមួយចំនួនដែលដំណើរការដោយគ្រូពេទ្យទូទៅ ក៏ដូចជាមន្ទីរពេទ្យ និងបុគ្គលិកថែទាំសុខភាពនៅតែស្ថិតក្រោមសម្ពាធដែលបណ្តាលមកពីរលកនៃការផ្ទុះវីរុសបម្លែងថ្មីអូមីក្រុង។ សម្ពាធនេះភាគច្រើនមកពីអ្នកដែលនៅតែមិនបានទទួលការចាក់វ៉ាក់សាំង។
លោកបាននិយាយថា ៣ភាគរយនៃចំនួនប្រជាជនពេញវ័យរបស់ប្រទេសនេះដែលមិនបានចាក់វ៉ាក់សាំងគ្រប់ដូស មានចំនួន ២៥ភាគរយនៃករណីដែលស្ថិតនៅបន្ទប់ ICU និងករណីស្លាប់។ លោកបានសង្កត់ធ្ងន់ថា ផ្ទុយមកវិញ អ្នកដែលបានទទួលការវ៉ាក់សាំងដូសជំរុញទំនងជាមានចំនួនប្រមាណ ៣៣ដងផុតពីករណីស្លាប់ដោយសារជំងឺកូវីដ-១៩ បើធៀបទៅនឹងអ្នកដែលមិនបានទទួលការចាក់វ៉ាក់សាំងពេញលេញ។
ប្រទេសសិង្ហបូរីនៅតែអនុវត្តវិធានការគ្រប់គ្រងសុវត្ថិភាពនៃការចាក់វ៉ាក់សាំងផ្សេងៗគ្នា (VDS) ដើម្បីការពារប្រជាជនដែលមិនបានចាក់វ៉ាក់សាំង ឬចាក់វ៉ាក់សាំងដោយផ្នែក ខណៈដែលប្រទេសនេះអនុញ្ញាតឱ្យប្រជាជនធ្វើសកម្មភាពធម្មតាឡើងវិញ។
ដើម្បីបង្កើនគ្រែ ICU ដោយគិតត្រឹមខែមករា ប្រទេសនេះបានផ្តល់ការបណ្តុះបណ្តាលដល់គិលានុបដ្ឋាយិកាដែលមិនមែនជា ICU ជាង ៨០០នាក់ ដើម្បីជាទុនបម្រុងក្នុងការបង្កើនបុគ្គលិកគិលានុបដ្ឋាយិកា ICU ឱ្យបានដល់ ៥៧ភាគរយ៕
