ក្រសួងសុខាភិបាលរបស់ប្រទេសឥណ្ឌូណេស៊ីបានសម្រេចកាត់បន្ថយគម្លាតពេលវេលារវាងការចាក់វ៉ាក់សាំងការពារជំងឺកូវីដ-១៩ ដូសទី២ និងទី៣ ដែលជាដូសជំរុញ សម្រាប់មនុស្សចាស់ដែលមានអាយុចាប់ពី ៦០ឆ្នាំឡើងទៅ។
អ្នកនាំពាក្យសម្រាប់កម្មវិធីចាក់វ៉ាក់សាំងការពារជំងឺកូវីដ-១៩ នៃក្រសួងសុខាភិបាល លោកស្រី Siti Nadia Tarmizi បាននិយាយថា កាលពីមុន គម្លាតពេលវេលាយ៉ាងតិចប្រាំមួយខែ គឺជាតម្រូវការសម្រាប់ការចាក់វ៉ាក់សាំងការពារជំងឺកូវីដ-១៩ រវាងដូសទីពីរ និងដូសជំរុញ។ ការចាក់វ៉ាក់សាំងដូសជំរុញសម្រាប់មនុស្សចាស់អាចត្រូវបានផ្តល់ជូនសម្រាប់អ្នកដែលមានគម្លាតពេលវេលាយ៉ាងហោចណាស់ ៣ខែបន្ទាប់ពីការចាក់វ៉ាក់សាំងមូលដ្ឋានគ្រប់ដូស។
ការអនុវត្តនេះត្រូវបានធ្វើឡើងទៅតាមអនុសាសន៍របស់ក្រុមប្រឹក្សាបច្ចេកទេសស្តីពីភាពស៊ាំ (ITAGI) របស់ប្រទេសឥណ្ឌូណេស៊ី។
លោកស្រីបានសង្កត់ធ្ងន់ថា វ៉ាក់សាំងគ្រប់ប្រភេទទាំងអស់ដែលទទួលបានពីទីភ្នាក់ងារត្រួតពិនិត្យចំណីអាហារ និងឱសថ (BPOM) និងតាមការណែនាំរបស់ ITAGI អាចត្រូវបានប្រើប្រាស់សម្រាប់ការចាក់ដូសជំរុញសម្រាប់មនុស្សចាស់។ ទោះជាយ៉ាងណាក៏ដោយ ដោយសារតែចំនួនវ៉ាក់សាំង Sinovac មានកម្រិត ដូច្នេះវាត្រូវបានផ្តល់អាទិភាពដល់កុមារដែលមានអាយុពី ៦-១១ឆ្នាំ ហើយវ៉ាក់សាំងប្រភេទផ្សេងទៀតត្រូវបានណែនាំសម្រាប់ប្រើប្រាស់ជាដូសជំរុញ៕
