សម្ដេចក្រឡាហោម ស ខេង បានបញ្ជាឱ្យអាជ្ញាធរគ្រប់ជាន់ថ្នាក់ត្រូវខិតខំដោះស្រាយទំនាស់ និង សកម្មភាពទាមទារតវ៉ានានា ក្នុងមូលដ្ឋានរបស់ខ្លួន ដោយសន្ដិវិធី និងបញ្ចៀសអំពើហិង្សាជាដាច់ខាត។
អ្នកយកព័ត៌មានយើងធ្វើសេចក្តីរាយការណ៍បន្ថែម ថ្លែងក្នុងពិធីបូកសរុបលទ្ធផល នៃអង្គសន្និបាតរបស់ក្រសួងមហាផ្ទៃ និងផ្តល់អនុសាសន៍ផ្តាំផ្ញើជូនដល់ថ្នាក់ដឹកនាំ ចំណុះក្រសួង មហាផ្ទៃ សម្រាប់ទិសដៅឆ្នាំ២០២២ នាថ្ងៃទី២៣ ខែកុម្ភៈ ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រី ក្រសួងមហាផ្ទៃ បានថ្លែងថា អាជ្ញាធរទាំងអស់ត្រូវបង្កើនការគ្រប់គ្រងសភាពការណ៍នៅមូលដ្ឋាន ដើម្បីបង្ការទប់ស្កាត់ រាល់ សកម្មភាពនានានៅក្នុងសង្គម។ ត្រូវខិតខំសហការសម្របសម្រួល ដោះស្រាយទំនាស់ និងសកម្មភាពទាមទារតវ៉ានានា នៅ មូលដ្ឋាន ដោយសន្តិវិធី និងខិតខំបញ្ចៀសឱ្យបាននូវ រាល់អំពើហិង្សាតាមគ្រប់រូបភាព។
សម្ដេចក៏បានស្នើឱ្យអាជ្ញាធរ បន្តរួមគ្នារក្សាការពារសុខសន្តិភាព ស្ថិរភាពនយោបាយ និងសន្តិសុខជាតិឱ្យកាន់តែរឹងមាំ សំដៅធានា ប្រក្រតីភាពនៃស្ថាប័នជាតិ, ធានាការពារព្រះរាជសុវត្ថិភាពព្រះមហាក្សត្រ, សុវត្ថិភាពថ្នាក់ដឹកនាំជាន់ខ្ពស់របស់ជាតិ, បង្កើនការ ការពារគោលដៅនយោបាយ ការទូត សេដ្ឋកិច្ច វប្បធម៌ ទេសចរណ៍ ពាណិជ្ជកម្ម និងសកម្មភាពវិនិយោគនានានៅកម្ពុជា។
« បង្កើនការគ្រប់គ្រងសភាពការណ៍នៅមូលដ្ឋាន ដើម្បីបង្ការទប់ស្កាត់រាល់សកម្មភាពអុជអាល បំផុសបំផុល ញុះញង់ ប៉ុនប៉ងបង្កឱ្យមានភាពចលាចលវឹកវរនៅក្នុងសង្គម ត្រូវខិតខំសហការ សម្រួលដោះស្រាយទំនាស់ និងសកម្មភាពទាមទារតវ៉ានានា ដែលមានតាមមូលដ្ឋានដោយសន្តិវិធីនិងខិតខំបញ្ចៀសឱ្យបាននូវរាល់អំពើហិង្សាតាមគ្រប់រូបភាព។» ក្នុងឱកាសនោះ សម្ដេចណែនាំ អាជ្ញាធរ និងកងកម្លាំងមានសមត្ថកិច្ចគ្រប់លំដាប់ថ្នាក់ ត្រូវផ្តល់ការគាំទ្រ និងសហការជាមួយ គ.ជ.ប ដើម្បីចាត់ចែងអនុវត្តកិច្ចការនានា ស្របតាមច្បាប់តម្រូវ និងធានារក្សាសន្តិសុខ សណ្តាប់ធ្នាប់ និងសុវត្ថិភាពក្នុងដំណើរការនៃ ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ឱ្យប្រព្រឹត្តទៅប្រកបដោយសុវត្ថិភាព និងមានលក្ខណៈ សេរីត្រឹមត្រូវ និងយុត្តិធម៌។
ក្នុងឱកាសនោះ សម្ដេច ក្រឡាហោមក៏បានជំរុញកងកម្លាំងនគរបាលជាតិ ត្រូវបន្តសហការជាមួយ កងយោធពលខេមរភូមិន្ទ បង្កើនការគ្រប់គ្រងព្រំដែន ដើម្បីថែរក្សាការពារបូរណភាពទឹកដី អធិបតេយ្យជាតិ, បង្កើនការរក្សាសន្តិសុខ សណ្តាប់ធ្នាប់ នៅតាមតំបន់ព្រំដែន, បង្ការទប់ស្កាត់បង្ក្រាបឱ្យបានទាន់ពេលវេលា និងមានប្រសិទ្ធភាពនូវបទល្មើស ឆ្លងកាត់ព្រំដែនគ្រប់ប្រភេទ និងពង្រឹងកិច្ចសហការជាមួយអាជ្ញាធរ និងកងកម្លាំងមានសមត្ថកិច្ច នៃប្រទេសជិតខាង ដើម្បីគ្រប់គ្រងការចេញ ចូលឆ្លងកាត់ ព្រំដែន និងបន្តខិតខំជំរុញការអភិវឌ្ឍន៍សេដ្ឋកិច្ច សង្គម និងលើកកម្ពស់ជីវភាពរបស់ ប្រជាពលរដ្ឋតាមតំបន់ព្រំដែន ៕
