ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់សា ជាថ្មីថា សម្តេចនឹងមិនគាំទ្រឱ្យឯកឧត្តម ហ៊ុន ម៉ាណែត ធ្វើជានាយករដ្ឋមន្រ្តីដាច់ខាត ប្រសិនបើប្រព្រឹត្តិអំពីអាក្រក់ ដែលអាចបំផ្លាញ ដល់ប្រជាជន សង្គមជាតិ និងគណបក្សប្រជាជនកម្ពុជានោះ។
សម្តេចតេជោ ហ៊ុន សែន បានបញ្ជាក់បែបនេះ បន្ទាប់ពីកន្លងទៅ សម្តេចបានប្រកាសគាំទ្រពេញទំហឹងឱ្យ ឯកឧត្តម ហ៊ុន ម៉ាណែត ដែលត្រូវជាកូន ធ្វើជានាយករដ្ឋមន្រ្តី ដោយឆ្លងកាត់ការបោះឆ្នោត ។
ថ្លែងក្នុងពិធីបើកការដ្ឋានសាងសង់ស្ថានីយប្រព្រឹត្តកម្មទឹកកខ្វក់បឹងជើងឯក លើផ្ទៃដីទំហំ ៣ហិកតា ស្ថិតនៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ នៅព្រឹកថ្ងៃទី២២ ខែកុម្ភៈ ឆ្នាំ២០២២ សម្តេចតេជោ ហ៊ុន សែន បានមាន ប្រសាសន៍ថា ឯកឧត្តម ហ៊ុន ម៉ាណែត គឺជាកូនប្រុសច្បងរបស់សម្តេច ប្រសិនបើធ្វើអំពើអាក្រក់ណាមួយ ដែលសង្គមស្អប់ខ្ពើម គឺសម្តេចមិនអាចគាំទ្រ ឱ្យធ្វើជានាយករដ្ឋមន្រ្តីនោះទេ ហើយសម្តេច ក៏មិនអាចបណ្តោយឱ្យ គណបក្សប្រជាជនកម្ពុជា និងប្រជាជន កម្ពុជា ត្រូវបំផ្លាញដោយសារកូនរបស់សម្តេចដែរ។ « រឿងអីកូនគេធ្វើបាន អ្នកដទៃធ្វើបាន ឯកូនខ្ញុំទទួលបានការបណ្តុះបណ្តាលប៉ុណ្ណឹងធ្វើមិនបាន។ ប៉ុន្តែខ្ញុំសូមបញ្ជាក់ បើសិនជាកូនខ្ញុំវាធ្វើអំពើអាក្រក់ខ្ញុំមិនអាចនិងគាំទ្រវាបានទេនិយាយឱ្យច្បាស់។
ខ្ញុំមិនអាចឱ្យគណបក្សប្រជាជន ត្រូវបំផ្លាញ ដោយកូនរបស់ខ្ញុំទេ ហើយខ្ញុំក៏មិនទុកឱ្យប្រជាពលរដ្ឋត្រូវបំផ្លាញដោយស្នាដៃកូនរបស់ខ្ញុំទេ។ សម្រាប់កូនអ្នកដទៃទោះបីកូនអ្នកនៅជាមួយគ្នាឬកូនគណបក្សប្រឆាំងខ្ញុំមិនដែលស្តីបន្ទោសនិងបង្អាប់ណាមួយនោះទេ ទោះបីគេវាយប្រហារកូនរបស់ខ្ញុំថារៀននៅសាលា West Point គេឱ្យសញ្ញាប័ត្រកិត្តិយស ទៅសាកលវិទ្យាល័យ New York យកអនុបណ្ឌិតសេដ្ឋកិច្ចនៅទីនោះ គេថាអាហ្នឹងសញ្ញាប័ត្រកិត្តិយសទៀត ទៅដល់វិទ្យាល័យ Bristol សញ្ញាប័ត្របណ្ឌិត របស់គេនោះគេថាសញ្ញាប័ត្រកិត្តិយសទៀត ឱ្យគេបង្អាប់ចុះតែខ្ញុំសរសើរកូនរបស់គេ » ។
គួរជម្រាបថា ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការ កងទ័ព ជើងគោក គឺជាកុលបុត្រខ្មែរដ៏ឆ្នើមមួយរូប ដែលមានគ្រប់លក្ខណៈសម្បត្តិ មានការសិក្សាខ្ពង់ខ្ពស់ជ្រៅជ្រះ មានសមត្ថភាព មានទេពកោសល្យខ្ពស់ មានគុណធម៌ និងសីលធម៌ល្អ ទទួលបានការកោតសរសើរ និងការគោរពស្រឡាញ់ពីសំណាក់ប្រជាជន ទូទៅ ពីមន្ត្រីរាជការ និងពីកងកម្លាំងប្រដាប់អាវុធ ហើយបាននិងកំពុងរួមចំណែកដឹកនាំ និងចូលរួមយ៉ាងសកម្មក្នុងបេសកកម្ម ដើម្បីបុព្វហេតុជាតិ មាតុភូមិ និងប្រជាជនកម្ពុជា៕
