ប្រធានសហភាពសហព័ន្ធយុវជនកម្ពុជា បានកោតសរសើរទឹកចិត្តរបស់ក្រុមការងារសហភាពសហព័ន្ធយុវជនកម្ពុជា ទាំងអស់ ដែលបានចូលរួមចំណែកក្នុងការងារប្រយុទ្ធប្រឆាំងជំងឺកូវីដ១៩ ក្នុងស្មារតីទទួលខុសត្រូវ និងរួមសុខរួមទុក្ខជាមួយប្រជាជនគ្រប់កាលៈទេសៈ។
ថ្លែងក្នុងពិធីប្រកាសទទួលស្គាល់សមាសភាពគណៈកម្មាធិការសហភាពសហព័ន្ធយុវជនកម្ពុជា ខេត្តសៀមរាប កាលពីរសៀលថ្ងៃទី២០ ខែកុម្ភៈ ឆ្នាំ២០២២ ឯកឧត្តម ហ៊ុន ម៉ានី ប្រធានគណ:កម្មការទី៧ នៃរដ្ឋសភា និងជាប្រធានគណ:កម្មាធិការសហភាពសហព័ន្ធយុវជនកម្ពុជា បានមានប្រសាសន៍ថា
ដោយឈលើគោលការណ៍ស្ម័គ្រចិត្ត ក្រុមការងារ សសយក ទាំងអស់ បានខិតខំប្រឹងប្រែង ក្នុងសកម្មភាពបំពេញការងារមនុស្សធម៌ក្នុងសង្គម ជាពិសេស តាំងពីដំណាក់កាលដំបូង នៃការឆ្លងរីករាលដាលជំងឺកូវីដ១៩ សមាជិកសមាជិកា សសយក ទូទាំងប្រទេសរួមទាំងសមាជិកក្នុងខេត្តសៀមរាបផ្ទាល់ បានចូលរួមយ៉ាងសកម្មនៅតាមមូលដ្ឋាន ក្នុងការចុះអនុវត្តយុទ្ធនាការបញ្រ្ជាបការយល់ដឹងអំពីគ្រោះថ្នាក់ជំងឺកូវីដ១៩ បានសហការជាមួយអាជ្ញាធរគ្រប់លំដាប់ថ្នាក់ក្នុងការផ្សព្វផ្សាយវិធានការ ការពារខ្លួន។ឯកឧត្តមបន្តថា បន្ថែមពីនេះក្រុមការងារ សសយក បានចូលរួមសម្របសម្រួល ជាមួយប្រជាពលរដ្ឋ ឱ្យមកទទួលការចាក់វ៉ាក់សាំងការពារជំងឺកូវីដ១៩ចាប់ពីដូសមូលដ្ឋាន រហូតដល់ដូសទី៤ ដែលជាផ្នែកមួយនៃការជំរុញឱ្យសម្រេចបាន នូវអត្រាចាក់វ៉ាក់សាំង ដ៏ច្រើនលើសលុប រហូតឈានដល់ការបើកដំណើរការសង្គម និងសេដ្ឋកិច្ចមកដល់បច្ចុប្បន្ន។
ឯកឧត្តមបន្តទៀតថា ទោះបីត្រូវប្រឈមមុខនឹងហានិភ័យខ្ពស់យ៉ាងណាក៏ដោយ ប៉ុន្តែសមាជិក សសយកទាំងអស់នៅតែមានឆន្ទៈ និងស្មារតីទទួលខុសត្រូវខ្ពស់ ដើម្បីរួមសុខរួមទុក្ខជាមួយរាជរដ្ឋាភិបាល និងប្រជាជនគ្រប់កាលៈទេសៈ។
ទោះប្រឈមមុខហានិភ័យនៃជំងឺកូវីដ១៩ក្តីប៉ុន្តែទឹកចិត្ត ឆន្ទៈ សេចក្តីក្លាហាន និងស្មារតីទំនួលខុសត្រូវ របស់សមាជិកសមាជិកា សហភាពសហព័ន្ធយុវជនកម្ពុជាគ្រប់រូបបានបង្ហាញយ៉ាងច្បាស់ ពីការលះបង់សេចក្តីសុខផ្ទាល់ខ្លួនក្នុងការរួមសុខរួមទុក្ខជាមួយប្រជាជន និងប្រជាជាតិនៅគ្រប់កាលៈទេសៈ ទោះឈរនៅមូលដ្ឋានស្ម័គ្រចិត្តក្តី ប៉ុន្តែសកម្មភាព សមាជិកសមាជិការបស់យើងគ្រប់ៗរូបបានចូលរួមនិងសម្រេចបានជាបន្តបន្ទាប់បានបង្ហាញពីការយកចិត្តទុកដាក់និងទំនួលខុសត្រូវខ្ពស់បំផុតរបស់រចនាសម្ព័ន្ធគ្រប់លំដាប់ថ្នាក់និងសមាជិកសមាជិកាគ្រប់រូបផងដែរ។
ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានផ្តល់អនុសាសន៍ណែនាំ មួយចំនួន ជាការបង្ហាញទិស ដល់សមាជិក សមាជិកា សសយក ទាំងអស់ថា ក្នុងនាមយុវជនជំនាន់ក្រោយ ការគោរពចាស់ទុំ គឺចេញមកពីសីលធម៌ គុណធម៌ និងប្រពៃណី។ ការគោរពឋានានុក្រម គឺចេញមកពីការចាត់តាំង ហើយការគោរពគំនិតនិងភាពជាអ្នកដឹកនាំ គឺចេញមកពីឧត្តមគតិ៕
