ប្រទេសហ្វីលីពីនបានលុបចោលនូវការហាមប្រាមនៃការចូលទៅក្នុងប្រទេសនេះសម្រាប់ជនបរទេសដែលទទួលបានការចាក់វ៉ាក់សាំងការពារជំងឺកូវីដ-១៩ ក្នុងគោលបំណងស្តារវិស័យទេសចរណ៍ដែលកំពុងជួបការលំបាករបស់ខ្លួនឡើងវិញ។
នៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃទី២៨ ខែមករា រដ្ឋមន្ត្រីក្រសួងទេសចរណ៍ហ្វីលីពីន លោកស្រី Romulo-Puyat បាននិយាយថា ពលរដ្ឋមកពីជាង ១៥០ប្រទេស ដែលរួមមានទាំងសហរដ្ឋអាមេរិក កូរ៉េខាងត្បូង ជប៉ុន អូស្ត្រាលី កាណាដា និងចក្រភពអង់គ្លេស ដែលបានទទួលការលើកលែងទិដ្ឋាការតាំងពីមុនពេលមានជំងឺរាតត្បាត ត្រូវបានអនុញ្ញាតិឱ្យចូលទៅក្នុងប្រទេសហ្វីលីពីន។
លោកស្រីបាននិយាយថា ការអនុញ្ញាតឱ្យអ្នកធ្វើដំណើរដែលទទួលបានការចាក់វ៉ាក់សាំងចូលទៅក្នុងប្រទេសហ្វីលីពីន ត្រូវបានគេរំពឹងថានឹងរួមចំណែកយ៉ាងច្រើនដល់កិច្ចខិតខំប្រឹងប្រែងដោះស្រាយបញ្ហាការងារ ជាពិសេសនៅតាមតំបន់ដែលពឹងផ្អែកខ្លាំងទៅលើវិស័យទេសចរណ៍ ក៏ដូចជាកិច្ចខិតខំប្រឹងប្រែងដើម្បីស្តារឡើងវិញនូវប្រតិបត្តិការអាជីវកម្មទេសចរណ៍។
ទន្ទឹមនឹងការលុបចោលនូវបម្រាមនេះ រដ្ឋាភិបាលហ្វីលីពីនក៏នឹងលុបចោលបទប្បញ្ញត្តិស្តីពីការដាក់ឱ្យធ្វើចត្តាឡីស័កសម្រាប់ពលរដ្ឋរបស់ខ្លួនដែលត្រឡប់មកពីបរទេសវិញចាប់ពីថ្ងៃទី១ ខែកុម្ភៈ និងសម្រាប់ជនបរទេសចាប់ពីថ្ងៃទី១០ ខែកុម្ភៈ។ ទោះជាយ៉ាងណាក៏ដោយ ពួកគេត្រូវតែបង្ហាញវិញ្ញាបនបត្រនៃការចាក់វ៉ាក់សាំងការពារជំងឺកូវីដ-១៩ និងលទ្ធផលអវិជ្ជមាននៃការធ្វើតេស្តសម្រាប់ជំងឺកូវីដ-១៩។
ប្រទេសហ្វីលីពីន ដែលជាគោលដៅទេសចរណ៍ដ៏ពេញនិយមមួយដែលមានឆ្នេរស្អាត និងជីវចម្រុះតាមសមុទ្រ បានត្រៀមបើកវិស័យទេសចរណ៍របស់ខ្លួនឡើងវិញតាំងពីខែធ្នូ ឆ្នាំ២០២១។ ប៉ុន្តែទោះជាយ៉ាងណាក៏ដោយ ផែនការនេះត្រូវបានលុបចោលវិញដោយសារតែការលេចឡើងនូវវីរុសបម្លែងថ្មីអូមីក្រុង ។
វិស័យទេសចរណ៍ គឺជាកម្លាំងចលករដ៏សំខាន់មួយនៃកំណើនសេដ្ឋកិច្ចហ្វីលីពីន។ កាលពីឆ្នាំមុន ដោយសារផលប៉ះពាល់នៃជំងឺកូវីដ-១៩ ចំនួនភ្ញៀវទេសចរណ៍មកពីទីផ្សារឈានមុខរបស់ខ្លួន ដូចជាប្រទេសជប៉ុន កូរ៉េខាងត្បូង និងចិន ត្រូវបានកាត់បន្ថយចំនួន ៨៣ភាគរយ ដោយមានចំនួនត្រឹមតែ ១,៤លាននាក់ប៉ុណ្ណោះ៕
