ក្នុងឆ្នាំ២០២២នេះ អាជ្ញាធរឃុំពង្រ គ្រោងរៀបចំឱ្យមានសហគមន៍ដាំបន្លែសុវត្ថិភាព ដើម្បីធានានិរន្តរភាពបន្លែសុវត្ថិភាពលើទីផ្សារ និងលើក ស្ទួយវិស័យកសិកម្មក្នុងមូល ដ្ឋានឱ្យកាន់តែប្រសើរ សម្រាប់សម្រួលដល់ជីវភាពកសិករ ដែលខិតខំផលិតបាន។
អ្នកយកព័ត៌មានយើងធ្វើសេចក្តីរាយការណ៍បន្ថែម…… លោក ឃឹម ប៉ោទៀង មេឃុំពង្រ ស្រុកកោះសូទិន ខេត្តកំពង់ចាមបានមានប្រសាសន៍ប្រាប់វិទ្យុជាតិកម្ពុជាថា សម្រាប់ឆ្នាំ២០២២នេះអាជ្ញា ធរក្នុងឃុំពង្រ មានផែនការចំនួន២ ក្នុងការលើកកម្ពស់ វិស័យកសិកម្មនៅមូលដ្ឋានឱ្យកាន់តែមានភាពល្អប្រសើរដែលជួយឱ្យប្រជាពលរដ្ឋនៅ ក្នុងសហគមន៍មានជីវភាពធូរធារថែមមួយកម្រិត ខណៈដែលប្រជាពលរដ្ឋនៅក្នុងតំបន់នេះស្ទើរតែ៨០%ប្រកប របរកសិកម្ម។
លោកបានបន្តថា គម្រោងដែលបានលើក ឡើងនៅក្នុងឆ្នាំ២០២២នេះ រួមមាន៖ ១ ការរៀបចំបណ្តុំសហគមន៍ ដើម្បីធានាតម្លៃទីផ្សារមាន់ និងទី២ការរៀបចំសហគមន៍ដាំដុះបន្លែសរីរាង្គ ដើម្បីបង្កើនការផ្គត់ផ្គង់ទៅទីផ្សារឱ្យគ្រប់គ្រាន់ ទៅតាមតម្រូវការអ្នកបរិភោគ។
លោកបានបន្តទៀតថា នៅពេលដែលគម្រោងនេះសម្រេចបានជោគជ័យ នោះនឹងអាចជួយឱ្យប្រជាពលរដ្ឋមានទំនុកចិត្តក្នុងការផលិត ហើយមិនព្រួយ បារម្ភលើបញ្ហាទីផ្សារឡើយ។ សំឡេង៖ ខ្ញុំសង្ឃឹមយ៉ាងមុត មាំថា នៅពេលណាដែលប្រជា ពលរដ្ឋយើងចូលរួម គម្រោងនេះ ដើរបានលទ្ធផលល្អ និងសម្រួលជីវភាព បញ្ហាទីមួយគឺប្រជាពលរដ្ឋមានទីផ្សារសម្រាប់លក់ដូរនូវផលិតផលរបស់ខ្លួនដែលផលិតបាន ទីពីរទៀតគឺមានចំណេះដឹងក្នុងការផលិតមួយចំណែក សម្រាប់ផលិតនិងបានទិន្ន ផលខ្ពស់ ហើយសម្រាប់ការហូបចុកគឺមានសុខភាពល្អ ហើយនឹងលក់ជូនទៅដល់ទីផ្សារ ជាពិសេសអ្នកទិញយកទៅហូបនឹង ក៏មានសុខ ភាពល្អដែរ ។
លោកបានបញ្ជាក់ថា ដំណាំដែលមានសក្តានុពលនៅក្នុងឃុំពង្រ ស្រុកកោះសូទិន ដែលប្រជាកសិករកំពុងដាំរួមមាន៖ ដំណាំពោត ត្រប់ ម្ទេស ននោង ត្រសក់ អំពៅ ត្រឡាច និងល្ង ជាដើម ហើយផ្ទៃដីដាំដុះដំណាំកសិកម្មមានសរុបប្រហែលជាង៣០០ហិកតា៕
