ទីភ្នាក់ងារព័ត៌មាន Antara បានរាយការណ៍ថា ការចំណាយថវិកាក្នុងវិស័យសុខាភិបាលរបស់ប្រទេសឥណ្ឌូណេស៊ីក្នុងឆ្នាំ២០២១ បានកើនឡើង ៦៩,២ភាគរយ ដែលឈានដល់ចំនួន ២៩១,៤ទ្រីលាន IDR (ជាង ២០,៣៣ប៊ីលានដុល្លារអាម៉េរិក) ពីចំនួន ១៧២,៣ទ្រីលាន IDR កាលពីឆ្នាំមុន។
អគ្គនាយកថវិកានៅក្រសួងហិរញ្ញវត្ថុ លោក Isa Rachmatarwata បាននិយាយនៅក្នុងសវនាការមួយជាមួយគណៈកម្មការទី៩ របស់សភាតំណាងរាស្រ្តនៅទីក្រុងហ្សាការតាកាលពីថ្ងៃទី២៥ ខែមករាថា ការចំណាយថវិកានេះ រួមមានថវិកាចំនួន ២១២,៤៨ទ្រីលាន IDR ជាការចំណាយនៅក្នុងក្រសួង ថវិកាចំនួន ១២,៤១ទ្រីលាន IDR ជាការចំណាយរបស់ស្ថាប័នរដ្ឋាភិបាលនានាដែលមិនមែនក្រសួង និងថវិកាចំនួន ៦៦,៤៩ទ្រីលាន IDR ជាការចំណាយសម្រាប់ការផ្ទេរទៅមូលនិធិតំបន់ និងភូមិ។
លោកបានបង្ហើបឱ្យដឹងថា ការកើនឡើងនៃការចំណាយថវិកាក្នុងវិស័យសុខាភិបាលក្នុងឆ្នាំ២០២១ ដោយសារការចំណាយទៅលើវិស័យសុខាភិបាលនៅក្នុងក្រសួងដែលមានការកើនឡើង ៧៤,៦ភាគរយ និងការផ្ទេរមូលនិធិទៅឱ្យតំបន់ និងភូមិ ដែលមានការកើនឡើង ៧៩,២ភាគរយ។
មន្ត្រីរូបនោះបាននិយាយថា ថវិកាសម្រាប់វិស័យសុខាភិបាលក្នុងឆ្នាំ២០២១ ត្រូវបានចំណាយទៅលើការទូទាត់វិក្កយបត្ររបស់មន្ទីរពេទ្យដែលមានតម្លៃ ៨៣,៣ទ្រីលាន IDR សម្រាប់ការព្យាបាលអ្នកជំងឺចំនួន ១,៤លាននាក់ ការទិញវ៉ាក់សាំងការពារជំងឺកូវីដ-1១៩ ចំនួន៣១០,៩លានដូសដែលមានតម្លៃ ៣៣,២ទ្រីលាន IDR និងការផ្តល់ការលើកទឹកចិត្តដល់បុគ្គលិកថែទាំសុខភាព។
លោកបាននិយាយថា រដ្ឋាភិបាលឥណ្ឌូណេស៊ីបានផ្តល់ប្រាក់លើកទឹកចិត្តចំនួន ១០,៣ទ្រីលាន IDR ដល់បុគ្គលិកថែទាំសុខភាពចំនួន ១,៥លាននាក់នៅថ្នាក់កណ្តាល និង ៦,៨ទ្រីលាន IDR ក្នុងការលើកទឹកចិត្តដល់បុគ្គលិកថែទាំសុខភាពចំនួន ៦៤៦ ៥០០នាក់នៅថ្នាក់តំបន់។
លោកបាននិយាយបន្ថែមថា ក្នុងពេលជាមួយគ្នានេះដែរ រដ្ឋាភិបាលក៏បានផ្តល់ថវិកាចំនួន ៤៤,៩ទ្រីលាន IDR សម្រាប់អ្នកទទួលជំនួយផ្នែកសន្តិសុខសុខភាពជាតិចំនួន ៩៤លាននាក់ និងបានឧបត្ថម្ភធនដល់ការរួមចំណែកសន្តិសុខសុខភាពជាតិសម្រាប់កម្មករនិយោជិតដែលមិនបានទទួលប្រាក់ឈ្នួលថ្នាក់ទី ៣៕
