ប្រធានាធិបតីឥណ្ឌូណេស៊ី លោក ចូកូ វីដូដូ និងនាយករដ្ឋមន្ត្រីសិង្ហបុរី លោក លី សៀនឡុង បានពិភាក្សាគ្នាអំពីវិធានការនៃការពង្រឹងកិច្ចសហប្រតិបត្តិការសម្រាប់ការស្តារសេដ្ឋកិច្ចឡើងវិញក្រោយជំងឺរាតត្បាតកូវីដ-១៩ និងការទទួលស្គាល់ការចាក់វ៉ាក់សាំង នៅឯកិច្ចប្រជុំរបស់មេដឹកនាំសិង្ហបុរី-ឥណ្ឌូណេស៊ីកាលពីថ្ងៃទី២៥ ខែមករា។
ថ្លែងនៅក្នុងសន្និសីទសារព័ត៌មានមួយក្រោយជំនួបនោះ លោក វីដូដូ បាននិយាយថា លោក និងលោក លី បានផ្តោតការពិភាក្សារបស់ពួកគេទៅលើរបៀបនៃការពង្រឹងកិច្ចសហប្រតិបត្តិការទ្វេភាគីលើវិស័យជាច្រើន ជាពិសេសកិច្ចសហប្រតិបត្តិការលើវិស័យសេដ្ឋកិច្ច។
សារព័ត៌មាន Antara News បានដកស្រង់សម្តីរបស់លោក វីដូដូ ដែលបាននិយាយថា ប្រទេសសិង្ហបុរីនាពេលបច្ចុប្បន្ននេះគឺជាអ្នកវិនិយោគធំជាងគេនៅក្នុងប្រទេសឥណ្ឌូណេស៊ី។ ចាប់ពីខែមករាដល់ខែកញ្ញា ឆ្នាំ២០២១ ប្រទេសសិង្ហបុរីបានវិនិយោគទឹកប្រាក់ ៧,៣ប៊ីលានដុល្លារអាម៉េរិកនៅក្នុងប្រទេសឥណ្ឌូណេស៊ី។
នៅក្នុងកិច្ចប្រជុំនោះ ភាគីសិង្ហបុរីបានប្តេជ្ញាក្នុងការវិនិយោគបន្ថែមទឹកប្រាក់ ៩,២ប៊ីលានដុល្លារអាម៉េរិកទៀត ដោយរួមមានទាំងគម្រោងថាមពលកកើតឡើងវិញ និងថាមពលថ្មីនៅលើកោះ Batam ក្នុងប្រជុំកោះ Riau កោះ Sumba និងស្រុក Manggarai ខាងលិចក្នុងខេត្ត Nusa Tenggara ខាងកើត ក៏ដូចជាមជ្ឈមណ្ឌលដឹកជញ្ជូននៅកំពង់ផែ Tanjung Priok ក្នុងទីក្រុងហ្សាការតាផងដែរ។
លោក វីដូដូ បានសង្កត់ធ្ងន់ថា ការវិនិយោគទៅលើវិស័យថាមពល និងថាមពលកកើតឡើងវិញ នៅតែបន្តជាវិស័យអាទិភាពរបស់រដ្ឋាភិបាលឥណ្ឌូណេស៊ី ដើម្បីលើកកម្ពស់សេដ្ឋកិច្ចបៃតង និងនិរន្តរភាព។
យោងតាមមេដឹកនាំឥណ្ឌូណេស៊ីរូបនេះបានឱ្យដឹងថា ដើម្បីគាំទ្របរិយាកាសវិនិយោគបៃតង ភាគីទាំងពីរបានចុះហត្ថលេខាលើអនុស្សរណៈនៃការយោគយល់ (MoU) មួយចំនួននៅក្នុងកិច្ចប្រជុំនោះ ដែលរួមមានទាំង MoU ស្តីពីកិច្ចសហប្រតិបត្តិការថាមពល និង MoU មួយទៀត ស្តីពីកិច្ចសហប្រតិបត្តិការក្នុងវិស័យសេដ្ឋកិច្ចបៃតង និងសារាចរសេដ្ឋកិច្ច។
ដើម្បីបន្តរក្សាស្ថេរភាពហិរញ្ញវត្ថុ និងរូបិយវត្ថុ ក្នុងការគាំទ្រដល់ការស្តារសេដ្ឋកិច្ចឡើងវិញក្រោយជំងឺរាតត្បាត កិច្ចព្រមព្រៀងសហប្រតិបត្តិការមួយចំនួនទៀតក៏ត្រូវបានចុះហត្ថលេខាដោយភាគីទាំងពីរផងដែរ ដោយរួមទាំងកិច្ចសហប្រតិបត្តិការហិរញ្ញវត្ថុ និងការបន្តរយៈពេលមួយឆ្នាំទៀតសម្រាប់កិច្ចព្រមព្រៀងប្តូររូបិយប័ណ្ណទ្វេភាគី (LCBSA) ។
លោក វីដូដូ បានប្រកាសថា ប្រទេសទាំងពីរក៏កំពុងបញ្ចប់កិច្ចព្រមព្រៀងសហប្រតិបត្តិការលើការទទួលស្គាល់ការចាក់វ៉ាក់សាំង និងការធ្វើសមកាលកម្មទិន្នន័យវ៉ាក់សាំង ក៏ដូចជាអន្តរប្រតិបត្តិការរវាងវេទិកាប្រកាសវេជ្ជសាស្រ្ដតាមប្រព័ន្ធអនឡាញ៕
