សហគមន៍កសិកម្មអូររាំងឪមានជ័យខេត្តត្បូងឃ្មុំចាប់ផ្តើមប្រមូលផលដំណាំឆៃថាវហើយឱ្យទាន់រដូវសែន ចូលឆ្នាំចិន ខណៈដែលរដូវនេះមានតម្រូវការច្រើន និងលក់បានថ្លៃជាងរដូវផ្សេងៗ។
អ្នកយកព័ត៌មានយើងធ្វើសេចក្តីរាយការណ៍… សហគមន៍កសិកម្មអូររាំងឪមានជ័យនៃខេត្តត្បូងឃ្មុំ នឹងចាប់ផ្ដើមប្រមូលផលឆៃថាវនៅចុងខែមករានេះលើផ្ទៃដីសរុបចំនួន៤ហិកតា ដែលទទួលបានទិន្នផលជាមធ្យមក្នុងបរិមាណ១២០តោន ហើយការប្រមូលផល ឆៃថាវនេះ ក៏ស្របពេលដែលប្រជា ជនខ្មែរជាប់សែចិន វៀតណាមត្រូវការបន្លែប្រភេទនេះសម្រាប់ធ្វើម្ហូបក្នុងពិធីសែនតាមទំនៀមទំលាប់របស់ពួក គេផងដែរ។
លោក ហាន សុខមឿន ប្រធានសហគមន៍កសិកម្មអូររាំងឪមានជ័យនៃខេត្តត្បូងឃ្មុំបានប្រាប់វិទ្យុជាតិកម្ពុជាឱ្យដឹងថា លោកបានប្រកបមុខរបរដាំឆៃថាវរយៈពេលជាង ១០ ឆ្នាំមកហើយ ដោយសារដំណាំប្រភេទនេះងាយស្រួលដាំមិនសូវរើសដី ហើយប្រើពេលខ្លីត្រឹមតែ ៤៥ថ្ងៃប៉ុណ្ណោះអាចប្រមូលផលបានពិសេសមានទីផ្សារល្អ ។
លោកបានបន្តថា លោកនិងសមាជិកបានដាំឆៃថាវតាំងពីពាក់កណ្តាលខែធ្នូឆ្នាំ២០២១ដែលមកដល់បច្ចុប្បន្ននេះមានអាយុជាង ៤០ថ្ងៃហើយ លើផ្ទៃដីជាង ២០០០ម៉ែត្រក្រឡា ឬស្មើនឹង ២០អា ដោយប្រមូលផលម្តងបានប្រហែលជាង៣តោន។ រីឯសមាជិកសហគមន៍របស់លោកមានចំនួន ៧គ្រួសារហើយក្នុងមួយគ្រួសារៗដាំឆៃថាវជាងកន្លះហិកតាដែលប្រមូលនៅចុងខែមករានេះក្នុងតម្លៃ១២០០រៀលក្នុង១ គីឡូក្រាម ។
លោកបានបន្ថែមថា សម្រាប់ដីនៅតំបន់លោក រដូវនេះគឺជារដូវល្អបំផុតសម្រាប់ការដាំឆៃថាវឱ្យលូតលាស់ល្អព្រោះ ថា ជារដូវដែលមិនសូវមានភ្លៀងធ្លាក់ដែលធ្វើឱ្យរលួយមើម និងពុំសូវមានសត្វល្អិតមកបំផ្លាញដំណាំឡើយ។
សំឡេង៖ « បើតាមស្ថានដីខាងខ្ញុំ ឆៃថាវដាំបានតែរដូវ ប្រាំងទេ ហើយខ្ញុំដាំផ្ទៃដីប្រហែលជា ២០អាប៉ុន្តែខាងសមាជិកខ្ញុំគេដាំបានច្រើនៗជាងខ្ញុំហើយជិតប្រមូលហើយ ព្រោះរយៈពេលដាំវាជាង៤០ ថ្ងៃហើយ។ ហើយ២០អាជាងនេះ ប្រហែលជាបានពី ៣ តោនជាងទៅ ៤តោន និយាយទៅទិន្នផលហ្នឹង វាសមរម្យសមស្របទៅតាមស្ដង់ដារ»។
សូមបញ្ជាក់ថា ឆៃថាវ ឬស្ពៃមើម ជាដំណាំបន្លែមួយប្រភេទក្នុងចំណោមបន្លែមើមជាច្រើន ដែលកសិករកម្ពុជា និយមដាំ។ ឆៃថាវ ក៏ជាប្រភេទបន្លែមិនអាចខ្វះបានក្នុងម្ហូប អាហារប្រចាំថ្ងៃ ដោយសារឆៃថាវ គេអាចច្នៃថាម្ហូបដោយការចម្អិនក៏បាន និងហូបឆៅក៏បាន ដូចជា ជ្រក់ ឬធ្វើឆៃប៉ូវ ជាដើម៕ 
