ប្រធានាធិបតីឥណ្ឌូណេស៊ី លោក ចូកូ វីដូដូ បានចាប់ផ្តើមបើកការដ្ឋានសាងសង់រោងចក្រឧស្ម័នធ្យូងថ្មដែលមានតម្លៃ ២,៣ប៊ីលានដុល្លារអាម៉េរិក ក្នុងគោលបំណងកាត់បន្ថយការនាំចូលឧស្ម័ន LPG របស់ប្រទេសនេះ ខណៈដែលបង្កើនប្រសិទ្ធភាពធនធានធ្យូងថ្មរបស់ខ្លួនផងដែរ។
រោងចក្រនេះត្រូវបានរចនាឡើងដើម្បីប្រើប្រាស់ធ្យូងថ្មកម្រិតទាបចំនួន ៦លានតោនដើម្បីផលិតឧស្ម័ន dimethyl ether (DME) ឱ្យបាន ១,៤លានតោនក្នុងមួយឆ្នាំ ដែលអាចកាត់បន្ថយការនាំចូលឧស្ម័ន LPG របស់ប្រទេសឥណ្ឌូណេស៊ីបានចំនួន ១លានតោនក្នុងមួយឆ្នាំ។ នេះបើយោងតាមក្រុមហ៊ុនរុករកធ្យូងថ្មរដ្ឋ Bukit Asam ដែលកំពុងសាងសង់រោងចក្រនេះក្នុងភាពជាដៃគូជាមួយក្រុមហ៊ុន Air Products and Chemicals, Inc. របស់សហរដ្ឋអាមេរិក។
រោងចក្រនេះស្ថិតនៅក្នុងតំបន់ Muara Enim នៅភាគខាងត្បូងកោះស៊ូម៉ាត្រា ដែលជាមជ្ឈមណ្ឌលរុករករ៉ែរបស់ក្រុមហ៊ុនរដ្ឋ Bukit Asam។ ការសាងសង់រោងច្រកនេះគ្រោងនឹងចំណាយរយៈពេល ៣០ខែ ហើយក្រុមហ៊ុនថាមពលរដ្ឋ Pertamina ត្រូវបានគេរំពឹងថានឹងប្រើប្រាស់ឧស្ម័នដែលផលិតចេញពីរោងចក្រនេះ។
កាលពីឆ្នាំមុន ប្រទេសឥណ្ឌូណេស៊ីបានប្រើប្រាស់ឧស្ម័ន LPG ចំនួន ៧,៩៥លានតោន ដោយក្នុងនោះមាន ៦,៤លានតោនត្រូវបាននាំចូល។ នេះបើយោងតាមទិន្នន័យរបស់រដ្ឋាភិបាល។
ប្រទេសឥណ្ឌូណេស៊ីបានបែងចែកថវិកាចំនួន ៦៦,៣ទ្រីលានរូពៀ (៤,៦ប៊ីលានដុល្លារអាម៉េរិក) នៅក្នុងថវិកាឆ្នាំ២០២២ ដើម្បីឧបត្ថម្ភធនទៅលើការប្រើប្រាស់ឧស្ម័ន LPG មួយចំនួននៅក្នុងប្រទេស។
ការនាំចូលឧស្ម័ន LPG របស់ប្រទេសឥណ្ឌូណេស៊ីត្រូវបានគេរំពឹងថានឹងមានការធ្លាក់ចុះចំនួន ៦ដងក្នុងឆ្នាំ២០២៥ ពីកម្រិតបច្ចុប្បន្ន ដោយសារការស្វែងរកការបង្កើនការបញ្ចេញឧស្ម័នធ្យូងថ្មដែលស្ថិតនៅក្នុងបញ្ជីវិនិយោគ «អាទិភាព» របស់រដ្ឋាភិបាលដែលផ្តល់នូវការលើកទឹកចិត្ត ដូចជាការបន្ធូរបន្ថយពន្ធជាដើម៕ 
