ក្រសួងសុខាភិបាលរបស់ប្រទេសឡាវបាននិយាយថា យុទ្ធនាការចាក់វ៉ាក់សាំងការពារជំងឺកូវីដ-១៩ នៅក្នុងប្រទេសនេះទទួលបានលទ្ធផលល្អកាលពីឆ្នាំមុន។
រដ្ឋាភិបាលបានសម្រេចគោលដៅរបស់ខ្លួនក្នុងការចាក់វ៉ាក់សាំងឱ្យដល់ប្រជាជនយ៉ាងហោចណាស់ ៥០ភាគរយនៃចំនួនប្រជាជនរបស់ខ្លួននៅត្រឹមចុងឆ្នាំ២០២១ ដោយជំងឺរាតត្បាតត្រូវបានដាក់ឱ្យស្ថិតក្រោមការគ្រប់គ្រងបាន។ ទោះជាយ៉ាងណាក៏ដោយ បញ្ហាប្រឈមមួយចំនួននៅតែមាន ហើយមេរៀនជាច្រើនទៀតត្រូវបានរៀនសូត្រដើម្បីធានាថា ចំនួនប្រជាជនកាន់តែច្រើននឹងទទួលបានការចាក់វ៉ាក់សាំងនៅក្នុងឆ្នាំ២០២២។
កាសែត Vientiane Times កាលពីថ្ងៃទី២៤ ខែមករា បានដកស្រង់សម្តីលោក Phonepaseuth Ounaphom អគ្គនាយកនៃនាយកដ្ឋានអនាម័យ និងលើកកម្ពស់សុខភាព នៃក្រសួងសុខាភិបាល ដែលបាននិយាយថា ប្រទេសនេះមានការរីកចម្រើនល្អកាលពីឆ្នាំមុន ក្រោមផែនការដាក់ពង្រាយ និងចាក់វ៉ាក់សាំងថ្នាក់ជាតិ។
ប្រជាជនមួយចំនួនធំនៅក្នុងក្រុមអាទិភាពបានទទួលការចាក់វ៉ាក់សាំងពេញលេញ រួមទាំងកុមារដែលមានអាយុចាប់ពី ១២ឆ្នាំឡើងទៅ ស្ត្រីមានផ្ទៃពោះ និងអ្នកធ្វើការសំខាន់ៗមួយចំនួនដូចជាគ្រូបង្រៀននៅតាមសាលារៀនជាដើម។
ដើម្បីបង្កើនការគ្របដណ្តប់ទៅលើការចាក់វ៉ាក់សាំង ដោយខិតខំសម្រេចគោលដៅយ៉ាងហោចណាស់ឱ្យបាន ៨០ភាគរយនៃប្រជាជនដែលត្រូវទទួលការចាក់វ៉ាក់សាំងនៅចុងឆ្នាំ២០២២ ក្រសួងសុខាភិបាលបានណែនាំដល់អាជ្ញាធរឱ្យបង្កើតមជ្ឈមណ្ឌលចាក់វ៉ាក់សាំងបន្ថែមទៀតនៅតាមស្ថានីយសុខភាពសហគមន៍ និងតាមភូមិនានាដើម្បីធ្វើកាន់តែងាយស្រួលសម្រាប់ប្រជាជនក្នុងតំបន់ក្នុងការទៅទទួលបានការចាក់វ៉ាក់សាំង។ ក្រសួងក៏បានជំរុញឱ្យអ្នកដែលមិនបានទទួលការចាក់វ៉ាក់សាំង ឬអ្នកដែលមិនបានទាន់បានទទួលការចាក់វ៉ាក់សាំងគ្រប់ចំនួនពីរដូសឱ្យទៅទទួលការចាក់វ៉ាក់សាំងដើម្បីកាត់បន្ថយផលប៉ះពាល់ដល់សុខភាព និងសេដ្ឋកិច្ចរបស់ប្រជាជន។
គិតត្រឹមថ្ងៃទី២១ ខែមករា ភាគរយនៃអ្នកដែលបានទទួលការចាក់វ៉ាក់សាំងការពារជំងឺកូវីដ-១៩ មួយដូសមានប្រមាណជិត ៦៤ភាគរយនៃចំនួនប្រជាជន ខណៈដែលអ្នកដែលបានទទួលការចាក់វ៉ាក់សាំងចំនួនពីរដូសបានឈានដល់ចំនួន ៥៣ភាគរយ។
ពាក់ព័ន្ធនឹងស្ថានភាពជំងឺកូវីដ-១៩ នៅក្នុងប្រទេសឡាវ ក្រសួងសុខាភិបាលបានឱ្យដឹងកាលពីថ្ងៃទី២៤ ខែមករាថា ក្នុងរយៈពេល ២៤ម៉ោងកន្លងទៅនេះ ប្រទេសឡាវបានកត់ត្រានូវករណីឆ្លងថ្មីចំនួន ៣៤០នាក់ និងករណីស្លាប់ម្នាក់ ដែលជាចំនួនទាបបំផុតក្នុងរយៈពេលជាច្រើនខែកន្លងមកនេះ។ ចំនួនអ្នកជំងឺកូវីដ-១៩ សរុបនៅក្នុងប្រទេសឡាវបានឈានដល់ ១៣០ ២៩៣នាក់ និងមានអ្នកស្លាប់ចំនួន ៥២៧នាក់៕
