ការប្រកួតកីឡាចំបាប់ ជ្រើសរើសជើងឯកថ្នាក់ជាតិឆ្នាំ២០២១ បានដំណើរការដោយរលូនរយៈពេល៤ថ្ងៃ និងបញ្ចប់ជោគ ជ័យ កាលពីល្ងាចថ្ងៃ៦រោច ខែបុស្ស ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃអាទិត្យ ទី២៣ ខែមករា ឆ្នាំ២០២២ នៅសាលកីឡាសហភាពសហព័ន្ធយុវជនកម្ពុជា រាជធានីភ្នំពេញ។
ក្នុងនាមតំណាងក្រសួងអប់រំ យុវជន និងកីឡា លោក ប៉ែន វុទ្ធី អនុប្រធាននាយកដ្ឋានអប់រំកាយ និងកីឡា បានវាយតម្លៃខ្ពស់ចំពោះការខិតខំរបស់សហព័ន្ធកីឡាចំបាប់កម្ពុជា ដែលរៀបចំការប្រកួតជើងឯកថ្នាក់ជាតិនេះ ដើម្បីជ្រើសរើសកីឡាករ កីឡាការិនី ដែលមានសមត្ថភាព និងបច្ចេកទេសខ្ពស់យកទៅហ្វឹកហាត់ក្នុងក្រុមជម្រើសជាតិត្រៀមការប្រកួតអន្តរជាតិ ក៏ដូចជាត្រៀមឆ្ពោះទៅការប្រកួតកីឡា ស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ លោកបន្ថែមថា នៅក្នុងឆ្នាំ២០២០ និងឆ្នាំ២០២១ គឺមានចំនួន៤២សហព័ន្ធកីឡាជាតិដូចៗ ដែលក្រសួងបានផ្តល់ថវិកាគាំទ្រ ខណៈសហព័ន្ធកីឡាចំបាប់កម្ពុជាទទួលបានថវិកាគាំទ្រ ៨០លានរៀល សម្រាប់ដំណើរការទ្រទ្រង់ដល់សហព័ន្ធលើផ្នែករដ្ឋបាល បណ្ដុះបណ្ដាលធនធានមនុស្ស និងរៀបចំការប្រកួត។ សម្រាប់៤២សហព័ន្ធកីឡាជាតិ ក្នុងឆ្នាំ២០២១ ក្រសួងអប់រំបានផ្តល់ថវិកាគាំទ្រសរុបចំនួន ៣ ១០០លានរៀល។
លោក ធិន វិចិត្រ អគ្គលេខាធិការ សហព័ន្ធកីឡាចំបាប់កម្ពុជាបញ្ជាក់ថា ផ្អែកតាមលក្ខណៈបច្ចេកទេស រយៈពេល៤ថ្ងៃកន្លងមក លោកកត់សម្គាល់ថា កីឡាករ កីឡាការិនីបានខិតខំប្រឹងប្រែងយកអស់កម្លាំងកាយ កម្លាំងចិត្ត ប្រាជ្ញាស្មារតី និងបញ្ចេញសមត្ថភាពប្រកួតប្រជែងប្រកបដោយក្រមសីលធម៌ តាមគោលការណ៍ Fair Play របស់គណៈកម្មការបច្ចេកទេស។ ទោះបីស្ថិតក្នុងបរិបទកូវីដ-១៩ក្តី ក៏សហព័ន្ធនៅតែបន្តសម្រួចគោលដៅតាមស្ថានភាពជាក់ស្តែង ដើម្បីបន្តការអភិវឌ្ឍប្រភេទកីឡាចំបាប់ ដូចជាហេដ្ឋារចនាសម្ព័ន្ធ ធនធានមនុស្ស អាជ្ញាកណ្តាល ចៅក្រម កីឡាករ កីឡាការិនី ឱ្យទទួលបានលទ្ធផលល្អ គុណភាពល្អ គុណផលខ្ពស់។ អ្វីដែលពិសេសគឺក្នុងព្រឹត្តិការណ៍ថ្នាក់ជាតិនេះ សហព័ន្ធបានរៀបចំការប្រកួតតាមទម្រង់អន្តរជាតិ និងទម្រង់ស៊ីហ្គេម ដូចជាការរៀបចំប្រព័ន្ធដាក់ពិន្ទុ ដោយមន្ត្រីបច្ចេកទេសបានអនុវត្តន៍ផ្ទាល់ នូវការប្រើប្រាស់បច្ចេកវិទ្យាទំនើបនេះ។ ការប្រកួតថ្នាក់ជាតិលក្ខណៈបិទខ្ទប់នេះ មាន៤ក្លិបចូលរួមមកពី២រាជធានី-ខេត្ត ដោយមានកីឡាករចំនួន ៣៥នាក់ (កីឡាការិនី១០នាក់)។
ឯកឧត្តម វ៉ាត់ ចំរើន ប្រធានសហព័ន្ធកីឡាចំបាប់កម្ពុជាមានប្រសាសន៍ថា ឆ្នាំ២០២២នេះ គឺសហព័ន្ធមានផែនការសម្រាប់ការហ្វឹកហាត់របស់ក្រុមជម្រើសជាតិ និងការប្រកួតអន្តរជាតិឱ្យបានច្រើន ដើម្បីជាក្តីសង្ឃឹមឱ្យកាន់តែមុតមាំ ត្រៀមដណ្តើមមេដាយជូនជាតិ ក្នុងស៊ីហ្គេម ឆ្នាំ២០២៣។
ឯកឧត្តមស្នើសុំឱ្យកីឡាករ កីឡាការិនីចំបាប់ទាំងអស់ ត្រូវបន្តឆន្ទៈក្នុងការហ្វឹកហាត់ឱ្យបានខ្លាំងក្លា ដើម្បីជំរុញឱ្យជោគវាសនាកីឡាចំបាប់ ដណ្តើមឱ្យបានកិត្តិយសជាតិក្នុងឋានៈជាម្ចាស់ផ្ទះ ស៊ីហ្គេម ឆ្នាំ២០២៣។
ដើម្បីត្រៀមគោលដៅស៊ីហ្គេម ២០២៣ សហព័ន្ធត្រៀមបញ្ជូនក្រុមជម្រើសជាតិចំបាប់ទៅបោះជំរុំហ្វឹកហាត់នៅប្រទេសអ៊ីរ៉ង់ មុនពេលចេញទៅប្រកួតស៊ីហ្គេម នៅវៀតណាម ក្នុងខែឧសភា ឆ្នាំ២០២២ និងបន្តចូលរួមប្រកួតកីឡាអាស៊ី នៅចិន ឆ្នាំ២០២២ និងចុងក្រោយនឹងធ្វើម្ចាស់ផ្ទះ ការប្រកួតជើងឯកអាស៊ីអាគ្នេយ៍ មួយទៀត ដើម្បីតេស្តសមត្ថភាពកីឡាករចុងក្រោយ។ប្រភេទកីឡាចំបាប់កម្ពុជាត្រូវបានស្ថាប័ន កីឡាដាក់សន្ទសន៍មេដាយមាសយ៉ាងតិច៣គ្រឿង សម្រាប់ស៊ីហ្គេម ឆ្នាំ២០២៣ ៕
