ដើម្បីលើកកម្ពស់វិជ្ជាជីវៈអ្នកធ្វើការតាមបណ្ដាស្ថានីយវិទ្យុ ទូរទស្សន៍ និងអ្នកធ្វើការក្នុងប្រព័ន្ធផ្សព្វផ្សាយទាំងឡាយ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានស្នើឱ្យពិធីករ ពិធីការិនីត្រូវសិក្សាឈ្វេងយល់ពាក្យពេចន៍នានា ជាពិសេស ពាក្យរាជសព្ទ និង សង្ឃសព្ទឱ្យបានច្បាស់លាស់ ដើម្បីនិយាយទាក់ទាញប្រិយមិត្តអ្នកស្ដាប់ឬ ទស្សនិកជនឱ្យបានកាន់តែច្រើន ប្រយោជន៍ទទួលបានការលើកតម្លៃពីមហាជន និង ការគាំទ្រដល់អង្គភាពដែលខ្លួនកំពុងបំពេញការងារ។
ក្នុងពិធីបិទសិក្ខាសាលាស្តីពី “ការប្រើប្រាស់រាជសព្ទ និងសង្ឃសព្ទ”នៅព្រឹកថ្ងៃទី១៨ខែមករាឆ្នាំ២០២២នេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា អស់លោក លោកស្រី ដែលជាពិធីករចាំបាច់ត្រូវចេះប្រើពាក្យឱ្យបានទូលំទូលាយដើម្បីនិយាយស្ដី បានត្រឹមត្រូវតាមស្ថានភាពនៃកម្មវិធីនីមួយៗ។
ឯកឧត្តម រដ្ឋមន្ត្រីក្រសួងព័ត៌មាន បានប្រសាសន៍សង្កត់ធ្ងន់ថា«អស់លោក លោកស្រី ដែលជាពិធីករ ពិធីការិនី ជាការចាំបាច់ ត្រូវចេះ ព្រោះពេលនិយាយមិនអាចសួរនរណាទាន់ទេ អ៊ីចឹងការចេះប្រើពាក្យរាជសព្ទ សង្ឃសព្ទ នេះវាបង្ហាញពីកម្រិតយល់ដឹងរបស់ពិធីករ ពិធីការិនី របស់យើង ហើយជាការលើកតម្លៃដល់ ពិធីករ ពិធីការិនី របស់យើងឱ្យបានល្អថែមទៀតដែរ ព្រោះបើយើងនិយាយខុស គេអាចកែលម្អ គេអាចថា យើងបានដូច្នេះវាជាការចាំបាច់ត្រូវចេះពាក្យពេចន៍ទាំងនេះ»។
បើតាម ឯកឧត្តម ខៀវ កាញារីទ្ធ ពិធីករ ពិធីការិនី ចាំបាច់និយាយឱ្យត្រឹមត្រូវ ដើម្បីទាក់ទាញទស្សនិកជន និង អ្នកស្ដាប់ ហើយការចេះប្រើពាក្យពេចន៍បានត្រឹមត្រូវនេះ បង្ហាញពីកម្រិតយល់ដឹងរបស់ ពិធីករ ពិធីការិនី និង ជាផ្នែកមួយនៃជោគជ័យរបស់ស្ថានីយវិទ្យុ ទូរទស្សន៍ ហើយក៏ផ្នែកមួយនៃការទាក់ទាញចំណង់ចំណូលចិត្តរបស់ប្រជាជនផងដែរ។ ម្យ៉ាងទៀតសិក្ខាសាលាថ្ងៃនេះ ក៏ជាផ្នែកមួយនៃការស្គាល់គ្នាពីស្ថានីយមួយទៅស្ថានីយមួយដើម្បីផ្លាស់ប្ដូរបទពិសោធន៍គ្នាទៅថ្ងៃក្រោយ ជួយគាំទ្រគ្នាលើកមុខលើកមាត់គ្នាទៅវិញទៅមកឱ្យកាន់តែមានតម្លៃបន្ថែមទៀតក្នុងសង្គម។
ជាមួយគ្នានេះ ឯកឧត្តម រដ្ឋមន្ត្រីក្រសួងព័ត៌មានបានវាយតម្លៃថា សិក្ខាសាលាស្ដីពី ការប្រើប្រាស់រាជសព្ទ និងសង្ឃសព្ទនៅថ្ងៃនេះ ទទួលបានជោគជ័យល្អដោយម្នាក់ៗបានយកចិត្តទុកដាក់ និង មានសំនួរដេញដោលយ៉ាងផុសផុល៕
